ערכין ג:

1לְאֵתוֹיֵי עֲבָדִים וּלְמַאן דְּתָנֵי עֲבָדִים בְּהֶדְיָא לְאֵתוֹיֵי מַאי לְאֵתוֹיֵי מִנָּוֶה הַיָּפָה לְנָוֶה הָרָעָה

2וְאֵין הַכֹּל מוֹצִיאִין לְאֵתוֹיֵי עֶבֶד שֶׁבָּרַח מֵחוּצָה לָאָרֶץ לָאָרֶץ

3הַכֹּל מַעֲלִין לִירוּשָׁלַיִם לְאֵתוֹיֵי מִנָּוֶה הַיָּפָה לְנָוֶה הָרָעָה וְאֵין הַכֹּל מוֹצִיאִין לְאֵתוֹיֵי מַאי לְאֵתוֹיֵי מִנָּוֶה הָרָעָה לְנָוֶה הַיָּפָה

4הַכֹּל חַיָּיבִין בְּסוּכָּה כֹּהֲנִים לְוִיִּם וְיִשְׂרְאֵלִים פְּשִׁיטָא אִי הָנֵי לָא מִחַיְּיבִי מַאן מִיחַיְּיבִי

5כֹּהֲנִים אִיצְטְרִיכָא לֵיהּ סָלְקָא דַּעְתָּךְ אָמֵינָא הוֹאִיל וּכְתִיב בַּסֻּכּוֹת תֵּשְׁבוּ וְאָמַר מָר תֵּשְׁבוּ שִׁבְעַת יָמִים כְּעֵין תָּדוּרוּ מָה דִּירָה אִישׁ וְאִשְׁתּוֹ אַף סוּכָּה אִישׁ וְאִשְׁתּוֹ וְהָנֵי כֹּהֲנִים הוֹאִיל וּבְנֵי עֲבוֹדָה נִינְהוּ לָא לִיחַיְּיבוּ

6קָא מַשְׁמַע לַן נְהִי דִּפְטִירִי בִּשְׁעַת עֲבוֹדָה בְּלֹא שְׁעַת עֲבוֹדָה חַיּוֹבֵי מִיחַיְּיבִי מִידֵּי דְּהָוֵה אַהוֹלְכֵי דְרָכִים דְּאָמַר מָר הוֹלְכֵי דְרָכִים בַּיּוֹם פְּטוּרִין מִן הַסּוּכָּה בַּיּוֹם וְחַיָּיבִים בַּלַּיְלָה

7הַכֹּל חַיָּיבִין בְּצִיצִית כֹּהֲנִים לְוִיִּם וְיִשְׂרְאֵלִים פְּשִׁיטָא

8כֹּהֲנִים אִיצְטְרִיךְ לֵיהּ סָלְקָא דַּעְתָּךְ אָמֵינָא הוֹאִיל וּכְתִיב לֹא תִלְבַּשׁ שַׁעַטְנֵז גְּדִלִים תַּעֲשֶׂה לָּךְ מַאן דְּלָא אִישְׁתְּרִי כִּלְאַיִם לְגַבֵּיהּ בִּלְבִישָׁה הוּא דִּמְחַיַּיב בְּמִצְוַת צִיצִית וְהָנֵי כֹּהֲנִים הוֹאִיל וְאִישְׁתְּרִי כִּלְאַיִם לְגַבַּיְיהוּ לָא לִחַיְּיבוּ

9קָא מַשְׁמַע לַן נְהִי דְּאִישְׁתְּרִי בְּעִידָּן עֲבוֹדָה בְּלָא עִידָּן עֲבוֹדָה לָא אִישְׁתְּרִי

10הַכֹּל חַיָּיבִין בִּתְפִילִּין כֹּהֲנִים לְוִיִּם וְיִשְׂרְאֵלִים פְּשִׁיטָא כֹּהֲנִים אִיצְטְרִיךְ לֵיהּ סָלְקָא דַּעְתָּךְ אָמֵינָא הוֹאִיל וּכְתִיב וּקְשַׁרְתָּם לְאוֹת עַל יָדֶךָ וְהָיוּ לְטֹטָפֹת בֵּין עֵינֶךָ כׇּל דְּאִיתֵיהּ בְּמִצְוָה דְיָד אִיתֵיהּ בְּמִצְוָה דְרֹאשׁ

11וְהָנֵי כֹּהֲנִים הוֹאִיל וְלֵיתַנְהוּ בְּמִצְוָה דְיָד דִּכְתִיב יִלְבַּשׁ עַל בְּשָׂרוֹ שֶׁלֹּא יְהֵא דָּבָר חוֹצֵץ בֵּינוֹ וּבֵין בְּשָׂרוֹ אֵימָא בְּמִצְוָה דְרֹאשׁ נָמֵי לָא לִיחַיְּיבוּ

12קָא מַשְׁמַע לַן דְּלָא מְעַכְּבִי אַהֲדָדֵי כְּדִתְנַן תְּפִלָּה שֶׁל יָד אֵינָהּ מְעַכֶּבֶת שֶׁל רֹאשׁ וְשֶׁל רֹאשׁ אֵינָהּ מְעַכֶּבֶת שֶׁל יָד

13וּמַאי שְׁנָא דְּיָד דִּכְתִיב יִלְבַּשׁ עַל בְּשָׂרוֹ רֹאשׁ נָמֵי כְּתִיב וְשַׂמְתָּ הַמִּצְנֶפֶת עַל רֹאשׁוֹ

14תָּנָא שְׂעָרוֹ הָיָה נִרְאֶה בֵּין צִיץ לְמִצְנֶפֶת שֶׁשָּׁם מַנִּיחַ תְּפִילִּין

15הַכֹּל חַיָּיבִין בִּתְקִיעַת שׁוֹפָר כֹּהֲנִים לְוִיִּם וְיִשְׂרְאֵלִים פְּשִׁיטָא כֹּהֲנִים אִיצְטְרִיכָא לֵיהּ סָלְקָא דַּעְתָּךְ אָמֵינָא הוֹאִיל וּכְתִיב יוֹם תְּרוּעָה יִהְיֶה לָכֶם מַאן דְּלֵיתֵיהּ אֶלָּא בִּתְקִיעָה דְּחַד יוֹמָא חַיָּיב

16וְהָנֵי כֹּהֲנִים הוֹאִיל וְאִיתַנְהוּ בִּתְקִיעָה כּוּלַּיהּ שַׁתָּא דִּכְתִיב וּתְקַעְתֶּם בַּחֲצֹצְרֹת עַל עֹלֹתֵיכֶם אֵימָא לָא לִיחַיְּיבוּ מִי דָּמֵי הָתָם חֲצוֹצְרוֹת הָכָא שׁוֹפָר

17אִיצְטְרִיךְ סָלְקָא דַּעְתָּךְ אָמֵינָא הוֹאִיל וּתְנַן שָׁוֶה הַיּוֹבֵל לְרֹאשׁ הַשָּׁנָה לַתְּקִיעָה וְלַבְּרָכוֹת דְּאִיתֵיהּ בְּמִצְוַת יוֹבֵל אִיתֵיהּ בְּמִצְוַת רֹאשׁ הַשָּׁנָה דְּלֵיתֵיהּ בְּמִצְוַת יוֹבֵל לֵיתֵיהּ בְּמִצְוַת רֹאשׁ הַשָּׁנָה וְהָנֵי כָּהֲנֵי הוֹאִיל וְלֵיתַנְהוּ בְּמִצְוַת דְּיוֹבֵל דִּתְנַן כֹּהֲנִים וּלְוִיִּם מוֹכְרִין לְעוֹלָם