בבא מציעא טז.

1הָא מִית לֵיהּ וּמַאן דְּאָמַר נִיחָא לֵיהּ דְּלֵיקוּם בְּהֵמָנוּתֵיהּ בַּהֲדֵי בְּנֵי נָמֵי נִיחָא לֵיהּ דְּלֵיקוּם בְּהֵמָנוּתֵיהּ

2סוֹף סוֹף קָרוּ לֵיהּ בְּנֵי לוֹקֵחַ גַּזְלָנָא

3אֶלָּא אִיכָּא בֵּינַיְיהוּ דְּמִית גַּזְלָן מַאן דְּאָמַר נִיחָא לֵיהּ לְאִינִישׁ דְּלָא לִקְרְיוּהּו גַּזְלָן הָא מִית לֵיהּ לְמַאן דְּאָמַר נִיחָא לֵיהּ דְּלֵיקוּם בְּהֵמָנוּתֵיהּ הָכִי נָמֵי אַף עַל גַּב דְּמִית נִיחָא לֵיהּ דְּלֵיקוּם בְּהֵמָנוּתֵיהּ

4סוֹף סוֹף קָרוּ לִבְנֵיהּ בְּנֵי גַּזְלָנָא

5אֶלָּא אִיכָּא בֵּינַיְיהוּ דְּיַהֲבַהּ בְּמַתָּנָה מַאן דְּאָמַר נִיחָא לֵיהּ דְּלֵיקוּם בְּהֵמָנוּתֵיהּ מַתָּנָה נָמֵי נִיחָא לֵיהּ דְּלֵיקוּם בְּהֵמָנוּתֵיהּ מַאן דְּאָמַר נִיחָא לֵיהּ דְּלָא נִקְרְיוּהּו גַּזְלָנָא אָמַר לֵיהּ מַאי גְּזַלִי מִינָּךְ

6פְּשִׁיטָא זַבְּנַהּ אוֹרְתַהּ וְיַהֲבַהּ בְּמַתָּנָה לָאו לְאוֹקֹמַהּ קַמֵּי לוֹקֵחַ קָא בָּעֵי

7נְפַלָה לֵיהּ בִּירוּשָׁה יְרוּשָּׁה מִמֵּילָא הִיא וְלָאו אִיהוּ קָא טָרַח אַבָּתְרַהּ

8גַּבְיַ[הּ] (אִיהוּ) בְּחוֹבוֹ חָזֵינַן אִי אִית לֵיהּ אַרְעָא אַחֲרִיתִי וַאֲמַר הַאי בָּעֵינָא לְאוֹקֹמַהּ קַמֵּיהּ לוֹקֵחַ קָא בָּעֵי

9וְאִי לָא זוּזֵי הוּא דְּבָעֵי אִפְּרוֹעֵי

10יַהֲבַהּ נִהֲלֵיהּ בְּמַתָּנָה פְּלִיגִי בַּהּ רַב אַחָא וְרָבִינָא חַד אָמַר מַתָּנָה כִּירוּשָּׁה דְּהָא מִמֵּילָא וְחַד אָמַר מַתָּנָה כְּמֶכֶר דְּאִי לָאו דְּטָרַח וְאַרְצִי קַמֵּיהּ לָא הָוֵי יָהֵיב לֵיהּ מַתָּנָה לְהָכִי טְרַח וְאַרְצִי קַמֵּיהּ כִּי הֵיכִי דְּלֵיקוּם בְּהֵמָנוּתֵיהּ

11וְעַד אֵימַת נִיחָא לֵיהּ דְּלֵיקוּם בְּהֵמָנוּתֵיהּ אָמַר רַב הוּנָא עַד שְׁעַת הַעֲמָדָה בַּדִּין

12חִיָּיא בַּר רַב אָמַר עַד דְּמָטְ[יָ]א אַדְרַכְתָּא לִידֵיהּ רַב פָּפָּא אָמַר עַד דְּמַתְחֲלִן יוֹמֵי אַכְרַזְתָּא

13מַתְקֵיף לַהּ רָמֵי בַּר חָמָא מִכְּדִי הַאי לוֹקֵחַ בְּמַאי קָנֵי לְהַאי אַרְעָא בְּהַאי שְׁטָרָא הַאי שְׁטָרָא חַסְפָּא בְּעָלְמָא הוּא

14אֲמַר לֵיהּ רָבָא תְּהֵא בְּמַאֲמִינוֹ בְּהָהִיא הֲנָאָה דְּלָא קָאָמַר לֵיהּ מִידֵּי וְקָא סָמֵיךְ עֲלֵיהּ טָרַח וּמַיְיתֵי לֵיהּ גָּמַר וּמַקְנֵי לֵיהּ

15מֵתִיב רַב שֵׁשֶׁת מַה שֶּׁאִירַשׁ מֵאַבָּא מָכוּר לָךְ מַה שֶּׁתַּעֲלֶה מְצוּדָתִי מָכוּר לָךְ לֹא אָמַר כְּלוּם מַה שֶּׁאִירַשׁ מִן אַבָּא הַיּוֹם מָכוּר לָךְ מַה שֶּׁתַּעֲלֶה מְצוּדָתִי הַיּוֹם מָכוּר לָךְ דְּבָרָיו קַיָּימִין

16אָמַר רָמֵי בַּר חָמָא הָא גַּבְרָא וְהָא תְּיוּבְתָּא

17אָמַר רָבָא גַּבְרָא קָא חָזֵינָא וּתְיוּבְתָּא לָא קָא חָזֵינָא הָכָא סָמְכָא דַּעְתֵּיהּ וְהָכָא לָא סָמְכָא דַּעְתֵּיהּ הָכָא סָמְכָא דַּעְתֵּיהּ דְּאָזֵיל טָרַח וּמַיְיתֵי לֵיהּ כִּי הֵיכִי דְּלָא נִקְרְיֵיהּ גַּזְלָנָא הָכָא לָא סָמְכָא דַּעְתֵּיהּ

18שַׁלְחוּהָ לְקַמֵּיהּ דְּרַבִּי אַבָּא בַּר זַבְדָּא אֲמַר לְהוּ זוֹ אֵינָהּ צְרִיכָה לִפְנִים אָמַר רָבָא זוֹ צְרִיכָה לִפְנִים וְלִפְנַי לִפְנִים הָכָא סָמְכָא דַּעְתֵּיהּ וְהָכָא לָא סָמְכָא דַּעְתֵּיהּ

19הֲוָה עוֹבָדָא בְּפוּמְבְּדִיתָא וְאוֹתְבֵיהּ אֲמַר לְהוּ רַב יוֹסֵף זוֹ אֵינָהּ צְרִיכָה לְפָנִים וַאֲמַר לֵיהּ אַבָּיֵי צְרִיכָה לִפְנִים וְלִפְנַי לִפְנִים הָכָא סָמְכָא דַּעְתֵּיהּ הָכָא לָא סָמְכָא דַּעְתֵּיהּ

20וּמַאי שְׁנָא רֵישָׁא וּמַאי שְׁנָא סֵיפָא אָמַר רַבִּי יוֹחָנָן סֵיפָא מַה שֶּׁאִירַשׁ מֵאַבָּא הַיּוֹם מִשּׁוּם כְּבוֹד אָבִיו מַה שֶּׁתַּעֲלֶה מְצוּדָתִי הַיּוֹם