בבא מציעא עג:

1רַב מָרִי בַּר רָחֵל מַשְׁכֵּן לֵיהּ הָהוּא גּוֹי בֵּיתָא הֲדַר זַבְּנֵהּ לְרָבָא נְטַר תְּרֵיסַר יַרְחֵי שַׁתָּא שְׁקַל אֲגַר בֵּיתָא אַמְטִי לֵיהּ לְרָבָא אֲמַר לֵיהּ הַאי דְּלָא אַמְטַאי לְמָר אֲגַר בֵּיתָא עַד הָאִידָּנָא דִּסְתַם מַשְׁכַּנְתָּא שַׁתָּא אִי בָּעֵי גּוֹי לְסַלֹּקֵי לָא הֲוָה מָצֵי מְסַלֵּק לִי הַשְׁתָּא לִשְׁקוֹל מָר אֲגַר בֵּיתָא

2אֲמַר לֵיהּ אִי הֲוָה יָדַעְנָא דַּהֲוָה מְמוּשְׁכַּן לֵיהּ לְמָר לָא הֲוָה זָבֵינְנָא לֵיהּ הַשְׁתָּא כְּדִינֵיהֶם עָבֵידְנָא לָךְ כׇּל אֵימַת דְּלָא מְסַלְּקִי בְּזוּזֵי לָא שָׁקֵיל אֲגַר בֵּיתָא אֲנָא נָמֵי לָא שָׁקֵילְנָא מִינָּךְ אֲגַר בֵּיתָא עַד דִּמְסַלֵּקְנָא לָךְ בְּזוּזֵי

3אֲמַר לֵיהּ רָבָא מִבַּרְנִישׁ לְרַב אָשֵׁי חֲזִי מָר רַבָּנַן דְּקָא אָכְלִי רִבִּיתָא דְּיָהֲבִי זוּזֵי אַחַמְרָא בְּתִשְׁרִי וּמְבַחֲרִי לֵהּ בְּטֵבֵת

4אֲמַר לֵיהּ אִינְהוּ נָמֵי אַחַמְרָא קָא יָהֲבִי אַחַלָּא לָא קָא יָהֲבִי מֵעִיקָּרָא דְּחַמְרָא חַמְרָא דְּחַלָּא חַלָּא הָהִיא שַׁעְתָּא הוּא דְּקָמְבַחֲרִי

5רָבִינָא הֲוָה יָהֵיב זוּזֵי לִבְנֵי אַקְרָא דְּשַׁנְווֹתָא וְשָׁפְכִי לֵיהּ טְפֵי כּוּפִיתָא אֲתָא לְקַמֵּיהּ דְּרַב אָשֵׁי אֲמַר לֵיהּ מִי שְׁרֵי אֲמַר לֵיהּ אִין אַחוֹלֵי הוּא דְּקָא מָחֲלִי גַּבָּךְ

6אֲמַר לֵיהּ הָא אַרְעָא לָאו דִּידְהוּ הִיא אֲמַר לֵיהּ אַרְעָא לְטַסְקָא מְשַׁעְבְּדָא וּמַלְכָּא אָמַר מַאן דְּיָהֵיב טַסְקָא לֵיכוֹל אַרְעָא

7אֲמַר לֵיהּ רַב פָּפָּא לְרָבָא חֲזִי מָר הָנֵי רַבָּנַן דְּיָהֲבִי זוּזֵי אַכְּרָגָא דְּאִינָשֵׁי וּמְשַׁעְבְּדִי בְּהוּ טְפֵי אֲמַר לֵיהּ הַשְׁתָּא אִיכּוֹ שְׁכֵיבִי לָא אֲמַרִי לְכוּ הָא מִילְּתָא הָכִי אָמַר רַב שֵׁשֶׁת מוּהְרְקַיְיהוּ דְּהָנֵי בְּטֻפְסָא דְמַלְכָּא מַנַּח וּמַלְכָּא אָמַר מַאן דְּלָא יָהֵיב כְּרָגָא לִשְׁתַּעְבַּיד לְמַאן דְּיָהֵיב כְּרָגָא

8רַב סְעוּרָם אֲחוּהּ דְּרָבָא הֲוָה תָּקֵיף אִינָשֵׁי דְּלָא מְעַלּוּ וּמְעַיֵּיל לְהוּ בְּגוּהַרְקָא דְּרָבָא אֲמַר לֵיהּ רָבָא שַׁפִּיר קָא עָבְדַתְּ דִּתְנֵינָא רְאִית[וֹ] שֶׁאֵינוֹ נוֹהֵג כַּשּׁוּרָה מִנַּיִן שֶׁאַתָּה רַשַּׁאי לְהִשְׁתַּעְבֵּד בּוֹ תַּלְמוּד לוֹמַר לְעוֹלָם בָּהֶם תַּעֲבֹדוּ וּבְאַחֵיכֶם יָכוֹל אֲפִילּוּ נוֹהֵג כַּשּׁוּרָה תַּלְמוּד לוֹמַר וּבְאַחֵיכֶם בְּנֵי יִשְׂרָאֵל אִישׁ בְּאָחִיו וְגוֹ'

9אָמַר רַב חָמָא הַאי מַאן דְּיָהֵיב זוּזֵי לְחַבְרֵיהּ לְמִיזְבַּן לֵיהּ חַמְרָא וּפְשַׁע וְלָא זְבַין לֵיהּ מְשַׁלֵּם לֵיהּ כִּדְקָא אָזֵיל אַפַּרְווֹתָא דְזוּלְשְׁפָט

10אָמַר אַמֵּימָר אַמְרִיתָא לִשְׁמַעְתָּא קַמֵּיהּ דְּרַב זְבִיד מִנְּהַרְדְּעָא אָמַר כִּי קָאָמַר רַב חָמָא הָנֵי מִילֵּי בְּיַיִן סְתָם אֲבָל בְּיַיִן זֶה לָא מִי יֵימַר דִּמְזַבְּנִי לֵיהּ נִיהֲלֵיהּ

11רַב אָשֵׁי אָמַר אֲפִילּוּ יַיִן סְתָם נָמֵי לָא מַאי טַעְמָא אַסְמַכְתָּא הִיא וְאַסְמַכְתָּא לָא קָנְיָא

12וּלְרַב אָשֵׁי מַאי שְׁנָא מֵהָא דִּתְנַן אִם אוֹבֵיר וְלָא אֶעֱבֵיד אֲשַׁלֵּם בְּמֵיטְבָא הָתָם בְּיָדוֹ