חולין קי.

1שֶׁבִּשְּׁלָהּ בַּחֲלָבָהּ אֲסוּרָה דַּאֲפִילּוּ דִּיעֲבַד נָמֵי לָא תְּנָא נָמֵי רֵישָׁא שֶׁבִּשְּׁלָהּ

2כִּי סְלֵיק רַבִּי אֶלְעָזָר אַשְׁכְּחֵיהּ לִזְעֵירִי אֲמַר לֵיהּ אִיכָּא תַּנָּא דְּאַתְנְיֵיהּ לְרַב כְּחָל אַחְוְיֵיהּ לְרַב יִצְחָק בַּר אֲבוּדִימִי אֲמַר לֵיהּ אֲנִי לֹא שָׁנִיתִי לוֹ כְּחָל כׇּל עִיקָּר וְרַב בִּקְעָה מָצָא וְגָדַר בָּהּ גָּדֵר

3דְּרַב אִיקְּלַע לְטַטְלְפוּשׁ שַׁמְעַהּ לְהַהִיא אִיתְּתָא דְּקָאָמְרָה לַחֲבִירְתַּהּ רִיבְעָא דְּבִשְׂרָא כַּמָּה חֲלָבָא בָּעֵי לְבַשּׁוֹלֵי אָמַר לָא גְּמִירִי דְּבָשָׂר בְּחָלָב אָסוּר אִיעַכַּב (וְקָאָסַר) [וַאֲסַר] לְהוּ כַּחְלֵי

4רַב כָּהֲנָא מַתְנֵי הָכִי רַבִּי יוֹסֵי בַּר אַבָּא מַתְנֵי אֲנָא כְּחָל שֶׁל מְנִיקָה שָׁנִיתִי לוֹ וּמִפִּלְפּוּלוֹ שֶׁל רַב חִיָּיא שְׁנָה לֵיהּ כְּחָל סְתָם

5רָבִין וְרַב יִצְחָק בַּר יוֹסֵף אִיקְּלַעוּ לְבֵי רַב פַּפֵּי אַיְיתוֹ לְקַמַּיְיהוּ תַּבְשִׁילָא דִּכְחָל רַב יִצְחָק בַּר יוֹסֵף אֲכַל רָבִין לָא אֲכַל אָמַר אַבָּיֵי רָבִין תַּכָּלָא אַמַּאי לָא אֲכַל מִכְּדֵי דְּבֵיתְהוּ דְּרַב פַּפֵּי בְּרַתֵּיה דְּרַבִּי יִצְחָק נַפָּחָא הֲוַאי וְרַבִּי יִצְחָק נַפָּחָא מָרֵיהּ דְּעוֹבָדָא הֲוָה אִי לָאו דִּשְׁמִיעַ לַהּ מִבֵּי נָשָׁא לָא הֲוָה עָבְדָא

6בְּסוּרָא לָא אָכְלִי כַּחְלֵי בְּפוּמְבְּדִיתָא אָכְלִי כַּחְלֵי רָמֵי בַּר תַּמְרֵי דְּהוּא רָמֵי בַּר דִּיקּוּלֵי מִפּוּמְבְּדִיתָא אִיקְּלַע לְסוּרָא בְּמַעֲלֵי יוֹמָא דְכִפּוּרֵי אַפְּקִינְהוּ כּוּלֵּי עָלְמָא לְכַחְלִינְהוּ שְׁדִינְהוּ אֲזַל אִיהוּ נַקְטִינְהוּ אַכְלִינְהוּ

7אַיְיתוּהּ לְקַמֵּיהּ דְּרַב חִסְדָּא אֲמַר לֵיהּ אַמַּאי תַּעֲבֵיד הָכִי אֲמַר לֵיהּ מֵאַתְרָא דְּרַב יְהוּדָה אֲנָא דְּאָכֵיל אֲמַר לֵיהּ וְלֵית לָךְ נוֹתְנִין עָלָיו חוּמְרֵי הַמָּקוֹם שֶׁיָּצָא מִשָּׁם וְחוּמְרֵי הַמָּקוֹם שֶׁהָלַךְ לְשָׁם אֲמַר לֵיהּ חוּץ לַתְּחוּם אֲכַלְתִּינְהוּ

8וּבְמָה טְוִיתִינְהוּ אֲמַר לֵיהּ בְּפוּרְצָנֵי וְדִלְמָא מִיֵּין נֶסֶךְ (הָוְיָא) [הֲווֹ] אֲמַר לֵיהּ לְאַחַר שְׁנֵים עָשָׂר חֹדֶשׁ הֲווֹ

9וְדִלְמָא דְּגָזֵל הֲוָה אֲמַר לֵיהּ יֵאוּשׁ בְּעָלִים הֲוָה דִּקְדַחוּ בְּהוּ חִילְפֵי

10חַזְיֵיהּ דְּלָא הֲוָה מַנַּח תְּפִילִּין אֲמַר לֵיהּ מַאי טַעְמָא לָא מַנְּחַתְּ תְּפִילִּין אֲמַר לֵיהּ חוֹלֵי מֵעַיִין הוּא וְאָמַר רַב יְהוּדָה חוֹלֵי מֵעַיִין פָּטוּר מִן הַתְּפִילִּין

11חַזְיֵיהּ דְּלָא הֲוָה קָא רָמֵי חוּטֵי אֲמַר לֵיהּ מַאי טַעְמָא לֵית לָךְ חוּטֵי אֲמַר לֵיהּ טַלִּית שְׁאוּלָה הִיא וְאָמַר רַב יְהוּדָה