חולין קיא.

1וּמִשּׁוּם שַׁמְנוּנִיתָא מִשּׁוּם דְּמָא מַאי

2כִּי הֲדַר סְלֵיק אַשְׁכְּחֵיהּ לְרַבִּי זְרִיקָא אֲמַר לֵיהּ הַאי נָמֵי לָא תִּבְּעֵי לָךְ דַּאֲנָא וְיַנַּאי בְּרֵיהּ דְּרַבִּי אַמֵּי אִיקַּלְעַן לְבֵי יְהוּדָה בְּרֵיהּ דְּרַבִּי שִׁמְעוֹן בֶּן פַּזִּי וְקָרִיבוּ לַן קַנְיָא בְּקוֹפֵיהּ וַאֲכַלְנָא

3מַתְקֵיף לַהּ רַב אָשֵׁי וְאִיתֵּימָא רַבִּי שְׁמוּאֵל מִזְּרוּקִינְיָא וְדִלְמָא פִּי קָנֶה חוּץ לִקְדֵרָה הֲוָה אִי נָמֵי מִיחְלָט הֲוָה חָלֵיט לֵיהּ מֵעִיקָּרָא כִּי הָא דְּרַב הוּנָא חָלְטִי לֵיהּ בְּחַלָּא וְרַב נַחְמָן חָלְטִי לֵיהּ בְּרוֹתְחִין

4וּסְבַר רַב פָּפָּא קַמֵּיהּ דְּרָבָא לְמֵימַר חַלָּא אֲסִיר אֲמַר לֵיהּ אִי חַלָּא אֲסִיר אִיהוּ נָמֵי אֲסִיר כִּי הֵיכִי דְּפָלֵיט הֲדַר בָּלַע

5רַב בַּר שְׁבָא אִיקְּלַע לְבֵי רַב נַחְמָן אַיְיתוֹ לֵיהּ כַּבְדָּא שְׁלִיקָא וְלָא אֲכַל אֲמַרוּ לֵיהּ בַּר בֵּי רַב דִּלְגָיו לָא אָכֵיל וּמַנּוּ רַב בַּר שַׁבָּא אֲמַר לְהוּ רַב נַחְמָן גַּאמוּ לְשַׁבָּא

6כְּתַנָּאֵי רַבִּי אֱלִיעֶזֶר אוֹמֵר הַכָּבֵד אוֹסֶרֶת וְאֵינָהּ נֶאֱסֶרֶת מִפְּנֵי שֶׁפּוֹלֶטֶת וְאֵינָהּ בּוֹלַעַת רַבִּי יִשְׁמָעֵאל בְּנוֹ שֶׁל רַבִּי יוֹחָנָן בֶּן בְּרוֹקָה אוֹמֵר מְתוּבֶּלֶת אוֹסֶרֶת וְנֶאֱסֶרֶת שְׁלוּקָה אוֹסֶרֶת וְנֶאֱסֶרֶת

7רַבָּה בַּר רַב הוּנָא אִקְּלַע לְבֵי רַבָּה בַּר רַב נַחְמָן אַיְיתִי לְקַמֵּיהּ תְּלָת סָאוֵי טַחְאֵי אֲמַר לְהוּ מִי הֲוָה יָדְעִיתוּ דְּאָתֵינָא אֲמַרוּ לֵיהּ מִי עֲדִיפַתְּ לַן מִינַּהּ דִּכְתִיב וְקָרָאתָ לַשַּׁבָּת עֹנֶג

8אַדְּהָכִי אַשְׁכַּח הָהוּא כַּבְדָּא דַּהֲוָה בַּהּ סִמְפּוֹנָא דִּבְלִיעָא דְּמָא אֲמַר לְהוּ אַמַּאי עָבְדִיתוּ הָכִי אֲמַרוּ לֵיהּ אֶלָּא הֵיכִי נַעֲבֵיד אֲמַר לְהוּ קְרַעוּ שְׁתִי וָעֵרֶב וְחִיתּוּכָא לְתַחַת

9וְהָנֵי מִילֵּי כַּבְדָּא אֲבָל טְחָלָא שׁוּמְנָא בְּעָלְמָא הוּא כִּי הָא דִּשְׁמוּאֵל עָבְדִי לֵיהּ תַּבְשִׁילָא דִטְחָלֵי בְּיוֹמָא דְּעָבֵיד מִלְּתָא

10אִתְּמַר כַּבְדָּא עִילָּוֵי בִּשְׂרָא שְׁרֵי דְּמָא מִשְׁרָק שָׁרֵיק כַּחְלָא עִילָּוֵי בִּשְׂרָא אָסוּר מַאי טַעְמָא חָלָב סָרוֹכֵי מְסָרֵיךְ

11רַב דִּימִי מִנְּהַרְדְּעָא מַתְנֵי אִפְכָּא כַּחְלָא עִילָּוֵי בִּשְׂרָא שְׁרֵי מַאי טַעְמָא חֵלֶב שְׁחוּטָה דְּרַבָּנַן כַּבְדָּא עִילָּוֵי בִּשְׂרָא אֲסִיר דָּם דְּאוֹרָיְיתָא

12דָּרֵשׁ מָרִימָר הִלְכְתָא בֵּין כַּבְדָּא בֵּין כַּחְלָא תּוּתֵי בִּשְׂרָא שְׁרֵי עִילָּוֵי בִּשְׂרָא דִּיעֲבַד אִין לְכַתְּחִלָּה לָא

13רַב אָשֵׁי אִיקְּלַע לְבֵי רָמֵי בַּר אַבָּא חֲמוּהּ חַזְיֵיהּ לִבְרֵיהּ דְּרָמֵי בַּר אַבָּא דְּקָא