כתובות צד:

1וּשְׁמוּאֵל דְּאָמַר כְּרַבִּי אֶלְעָזָר דְּאָמַר עֵדֵי מְסִירָה כָּרְתִי

2לָא דְּכוּלֵּי עָלְמָא כְּרַבִּי אֶלְעָזָר וְהָכָא בְּהָא קָמִיפַּלְגִי רַב סָבַר חֲלוּקָּה עֲדִיפָא וּשְׁמוּאֵל סָבַר שׁוּדָא דְּדַיָּינֵי עֲדִיפָא

3וּמִי מָצֵית מוֹקְמַתְּ לֵיהּ לְרַב כְּרַבִּי אֶלְעָזָר וְהָאָמַר רַב יְהוּדָה אָמַר רַב הֲלָכָה כְּרַבִּי אֶלְעָזָר בְּגִיטִּין כִּי אַמְרִיתַהּ קַמֵּיהּ דִּשְׁמוּאֵל אָמַר אַף בִּשְׁטָרוֹת מִכְּלָל דְּרַב סָבַר בִּשְׁטָרוֹת לָא אֶלָּא מְחַוַּורְתָּא רַב כְּרַבִּי מֵאִיר וּשְׁמוּאֵל כְּרַבִּי אֶלְעָזָר

4מֵיתִיבִי שְׁנֵי שְׁטָרוֹת הַיּוֹצְאִים בְּיוֹם אֶחָד חוֹלְקִין תְּיוּבְתָּא דִשְׁמוּאֵל אָמַר לָךְ שְׁמוּאֵל הָא מַנִּי רַבִּי מֵאִיר הִיא וַאֲנָא דַּאֲמַרִי כְּרַבִּי אֶלְעָזָר

5אִי רַבִּי מֵאִיר אֵימָא סֵיפָא כָּתַב לְאֶחָד וּמָסַר לְאַחֵר זֶה שֶׁמָּסַר לוֹ קָנָה וְאִי רַבִּי מֵאִיר אַמַּאי קָנָה הָאָמַר עֵדֵי חֲתִימָה כָּרְתִי

6תַּנָּאֵי הִיא דְּתַנְיָא וַחֲכָמִים אוֹמְרִים יַחְלוֹקוּ וְכָאן אָמְרוּ מַה שֶּׁיִּרְצֶה הַשָּׁלִישׁ יַעֲשֶׂה

7אִמֵּיהּ דְּרָמֵי בַּר חָמָא כְּתַבְתִּינְהוּ לְנִכְסַהּ לְרָמִי בַּר חָמָא בְּצַפְרָא לְאוּרְתָּא כְּתַבְתִּינְהוּ לְמָר עוּקְבָא בַּר חָמָא

8אֲתָא רָמֵי בַּר חָמָא לְקַמֵּיהּ דְּרַב שֵׁשֶׁת אוֹקְמֵיהּ בְּנִכְסֵי אֲתָא מָר עוּקְבָא לְקַמֵּיהּ דְּרַב נַחְמָן אוֹקְמֵיהּ בְּנִכְסֵי אֲתָא רַב שֵׁשֶׁת לְקַמֵּיהּ דְּרַב נַחְמָן אֲמַר לֵיהּ מַאי טַעְמָא עֲבַד מָר הָכִי אֲמַר לֵיהּ וּמַאי טַעְמָא עֲבַד מָר הָכִי

9אֲמַר לֵיהּ דִּקְדֵים אֲמַר לֵיהּ אַטּוּ בִּירוּשָׁלַיִם יָתְבִינַן דְּכָתְבִינַן שָׁעוֹת אֶלָּא מָר מַאי טַעְמָא עֲבַד הָכִי אֲמַר לֵיהּ שׁוּדָא דְּדַיָּינֵי

10אֲמַר לֵיהּ אֲנָא נָמֵי שׁוּדָא דְּדַיָּינֵי אֲמַר לֵיהּ חֲדָא דַּאֲנָא דַּיָּינָא וּמָר לָאו דַּיָּינָא וְעוֹד מֵעִיקָּרָא לָאו בְּתוֹרַת הָכִי אֲתֵית לַהּ

11הָנְהוּ תְּרֵי שְׁטָרֵי דַּאֲתוֹ לְקַמֵּיהּ דְּרַב יוֹסֵף חַד הֲוָה כָּתוּב בְּחַמְשָׁא בְּנִיסָן וְחַד הֲוָה כָּתוּב בֵּיהּ בְּנִיסָן סְתָמָא אוֹקְמֵיהּ רַב יוֹסֵף לְהָהוּא דְּחַמְשָׁא בְּנִיסָן בִּנְכָסִים

12אֲמַר לֵיהּ אִידַּךְ וַאֲנָא אַפְסֵיד אֲמַר לֵיהּ אַתְּ יָדְךָ עַל הַתַּחְתּוֹנָה אֵימָא בַּר עֶשְׂרִים וְתִשְׁעָה בְּנִיסָן אַתְּ

13אֲמַר לֵיהּ וְנִכְתּוֹב לִי מָר