נזיר מט.

1וּלְרַבִּי עֲקִיבָא מִכְּדֵי לָא שְׁנָא כֹּהֵן גָּדוֹל לְחוֹדֵיהּ וְלָא שְׁנָא כֹּהֵן גָּדוֹל וְהוּא נָזִיר נָפְקָא מִלְּאָחִיו לְאָבִיו וּלְאִמּוֹ לְמָה לִי

2צְרִיכִי דְּאִי כְּתַב אָבִיו הֲוָה אָמֵינָא הַיְינוּ טַעְמָא דְּלָא מִיטַּמֵּא לֵיהּ מִשּׁוּם דַּחֲזָקָה בְּעָלְמָא הוּא אֲבָל אִמּוֹ דְּיָדְעִין דִּילֵידְתֵּיהּ לִיטַמֵּא לַהּ

3וְאִי כְּתַב רַחֲמָנָא אִמּוֹ הֲוָה אָמֵינָא אִמּוֹ לָא לִיטַמֵּא לַהּ דְּלָאו אָזֵיל זַרְעַהּ בָּתְרַהּ אֲבָל אָבִיו כֵּיוָן דְּאָמַר מָר לְמִשְׁפְּחוֹתָם לְבֵית אֲבוֹתָם אֵימָא לִיטַמֵּא לֵיהּ קָא מַשְׁמַע לַן

4וְעַל כׇּל נַפְשׁוֹת מֵת לֹא יָבֹא לְמָה לִי