שבועות מא.

1וּמַאן דְּמַתְנֵי לַהּ אַסֵּיפָא הָכָא הוּא דְּאִיכָּא דְּרָרָא דְמָמוֹנָא אֲבָל הָתָם דְּלֵיכָּא דְּרָרָא דְמָמוֹנָא לָא

2מַאי אִיכָּא בֵּין שְׁבוּעָה דְּאוֹרָיְיתָא לִשְׁבוּעָה דְּרַבָּנַן אִיכָּא בֵּינַיְיהוּ מֵיפָךְ שְׁבוּעָה בִּדְאוֹרָיְיתָא לָא מַפְּכִינַן שְׁבוּעָה בִּדְרַבָּנַן מַפְּכִינַן

3וּלְמָר בַּר רַב אָשֵׁי דְּאָמַר בִּדְאוֹרָיְיתָא נָמֵי מַפְּכִינַן שְׁבוּעָה מַאי אִיכָּא בֵּין דְּאוֹרָיְיתָא לִדְרַבָּנַן אִיכָּא בֵּינַיְיהוּ מֵיחַת לְנִכְסֵיהּ בִּדְאוֹרָיְיתָא נָחֲתִינַן לְנִכְסֵיהּ בִּדְרַבָּנַן לָא נָחֲתִינַן לְנִכְסֵיהּ

4וּלְרַבִּי יוֹסֵי דְּאָמַר בִּדְרַבָּנַן נָמֵי נָחֲתִינַן לְנִכְסֵיהּ

5דִּתְנַן מְצִיאַת חֵרֵשׁ שׁוֹטֶה וְקָטָן יֵשׁ בָּהֶם גָּזֵל מִפְּנֵי דַּרְכֵי שָׁלוֹם רַבִּי יוֹסֵי אוֹמֵר גָּזֵל גָּמוּר וְאָמַר רַב חִסְדָּא גָּזֵל גָּמוּר מִדִּבְרֵיהֶם לְמַאי נָפְקָא מִינַּהּ לְהוֹצִיאוֹ בְּדַיָּינִין מַאי אִיכָּא בֵּין דְּאוֹרָיְיתָא לִדְרַבָּנַן

6אִיכָּא בֵּינַיְיהוּ שֶׁכְּנֶגְדּוֹ חָשׁוּד עַל הַשְּׁבוּעָה בִּדְאוֹרָיְיתָא שֶׁכְּנֶגְדּוֹ חָשׁוּד עַל הַשְּׁבוּעָה אָפְכִינַן לֵיהּ שְׁבוּעָה (וְשָׂמוּ) אַאִידַּךְ בִּדְרַבָּנַן תַּקַּנְתָּא הִיא וְתַקַּנְתָּא לְתַקַּנְתָּא לָא עָבְדִינַן

7וּלְרַבָּנַן דִּפְלִיגִי עֲלֵיהּ דְּרַבִּי יוֹסֵי דְּאָמְרוּ בִּדְרַבָּנַן לָא נָחֲתִינַן לְנִכְסֵיהּ מַאי עָבְדִינַן לֵיהּ מְשַׁמְּתִינַן לֵיהּ

8אֲמַר לֵיהּ רָבִינָא לְרַב אָשֵׁי הַאי נָקְטֵיהּ בְּכוּבְסֵיהּ דְּנִשְׁבְּקֵיהּ לִגְלִימֵיהּ הוּא אֶלָּא מַאי עָבְדִינַן לֵיהּ אֲמַר לֵיהּ מְשַׁמְּתִינַן לֵיהּ עַד דְּמָטֵי זְמַן נִגְדֵּיהּ וְנָגְדִינַן לֵיהּ וְשָׁבְקִינַן לֵיהּ

9אָמַר רַב פָּפָּא הַאי מַאן דְּאַפֵּיק שְׁטָרָא עַל חַבְרֵיהּ וְאָמַר לֵיהּ שְׁטָרָא פְּרִיעַ הוּא אָמְרִינַן לֵיהּ לָאו כֹּל כְּמִינָּךְ זִיל שַׁלֵּים וְאִם אָמַר לִשְׁתְּבַע לִי אָמְרִינַן לֵיהּ אִשְׁתְּבַע לֵיהּ

10אֲמַר לֵיהּ רַב אַחָא בְּרֵיהּ דְּרָבָא לְרַב אָשֵׁי וּמָה בֵּין זֶה לְפוֹגֵם אֶת שְׁטָרוֹ

11אֲמַר לֵיהּ הָתָם אַף עַל גַּב דְּלָא טָעֵין אִיהוּ טָעֲנִינַן לֵיהּ אֲנַן הָכָא אָמְרִינַן לֵיהּ זִיל שַׁלֵּים לֵיהּ וְאִי טָעֵין וְאָמַר אִשְׁתְּבַע לִי אָמְרִינַן לֵיהּ זִיל אִשְׁתְּבַע לֵיהּ וְאִי צוּרְבָּא מֵרַבָּנַן הוּא לָא מַשְׁבְּעִינַן לֵיהּ

12אֲמַר לֵיהּ רַב יֵימַר לְרַב אָשֵׁי צוּרְבָּא מֵרַבָּנַן מַשְׁלַח גְּלִימָא דְּאִינָשֵׁי אֶלָּא לָא מִזְדַּקְקִינַן לֵיהּ לְדִינֵיהּ

13מָנֶה לִי בְּיָדְךָ כּוּ' אָמַר רַב יְהוּדָה אָמַר רַב אַסִּי הַמַּלְוֶה אֶת חֲבֵירוֹ בְּעֵדִים צָרִיךְ לְפוֹרְעוֹ בְּעֵדִים כִּי אַמְרִיתַהּ קַמֵּיהּ דִּשְׁמוּאֵל אָמַר לִי יָכוֹל לוֹמַר לוֹ פְּרַעְתִּיךָ בִּפְנֵי פְּלוֹנִי וּפְלוֹנִי וְהָלְכוּ לָהֶם לִמְדִינַת הַיָּם

14תְּנַן מָנֶה לִי בְּיָדְךָ אָמַר לוֹ הֵן לְמָחָר אָמַר לוֹ תְּנֵהוּ לִי נְתַתִּיו לָךְ פָּטוּר וְהָא הָכָא כֵּיוָן דְּתַבְעֵיהּ בְּעֵדִים כְּמַאן דְּאוֹזְפֵיהּ בְּעֵדִים דָּמֵי וְקָתָנֵי פָּטוּר