הכוזרי א

1סילת עמא ענדי מן אלאחתגאג עלי מכׄאלפינא מן אלפלאספה ואהל אלאדיאן תׄם עלי אלכׄוארג אלדׄין יכׄאלפון אלגמהור תדׄכרת מה קד סמעתה מן חגג אלחבר אלדׄי כאן ענד מלך אלכׄזר אלדאכׄל פי דין אליהוד מנדׄ ארבע מאיהׄ סנה עלי מא שהד וגא פי כתאב אלתואריךׄ אנה תכרר עליה רויא כאן מלאכא יכׄאטבה ויקול לה אן ניתך מרצׄיה ענד אללה לכן עמלך גׄיר מרצׄי וכאן יגתהד גדא פי אלתעבד פי דין אלכׄזר חתי אנה כאן יכׄדם כׄדמה אלהיכל ואלקראבין בנפסה בניה צאפיה כׄאלצה. פכלמא אגתהד פי תלך אלאעמאל גא אלמלאך פי אלליל יקול לה ניתך מרצׄיה ועמלך עׄיר מרצׄי פסבב לה דׄלך אלבחתׄ ען אלאדיאן ואלנחל ותהוד אכׄרא הוא וגמהור אלכׄזר. וכאן מן חגג אלחבר מא אקנעני וטאבק אעתקאדי פראית אן אתׄבת דׄלך אלאחתגאג כמא וקע והמשכילים יבינו. קיל אן מלך אלכׄזר למא ראה פי רויאה אן ניתה מרצׄיה ענד אללה ועמלה גיר מרצׄי ואמרה פי אלנום אן יטלב אלעמל אלמרצׄי ענד אללה סאל פילסופא ען מעתקדה.

2פקאל לה אלפילסוף, ליס ענד אללה רצׄי ולא בגׄץׄ. לאנה תעׄ מנזה ען אלאראדאת ואלאגׄראץׄ. לאן אלגׄרץׄ ידל עלי נקצאן אלמגׄרץׄ. ואן תמאם גׄרצׄה כמאל לה, ומהמא לם יתם פהו נקצאן. וכדׄלך הו מנזה ענד אלפלאספה ען עלם אלגזאיאת. לאנהא מתגׄירה מע אלאחיאן. וליס פי עלם אללה תגׄיר פהו לא ידריך, פצׄלא ען אן ידרי ניתך ואעמאלך, פצׄלא ען אן יסמע צלאתך וירא חרכאתך. נעם ואן קאלת אלפלאספה אנה כׄלקך פעלי אלמגאז, לאנה עלהׄ אלעלל פי כׄלקהׄ כל מכׄלוק לא לאנה מקצוד מן קבלה. נעם ולא כׄלק קט אנסאנא לאן אלעאלם קדים לם יזל ינשא אלאנסאן מן אנסאן קבלה תתרכב פיה צור וכׄלק ואכׄלאק מן אביה ואמה וקראבתה וכיפיאת אלאהויה ואלבלדאן ואלאגׄדׄיה ואלמיאה, מע קוי אלאפלאך ואלדרארי ואלברוג באלנסב אלחאצלה מנהא, ואלכל ראגע אלא אלסבב אלאול לא ען גׄרץׄ לה, לכן פיץׄ פאץׄ ענה סבב תׄאן, תׄם תׄואלתׄ ורואבע, ותלאזמת אלאסבאב ואלמסבבאת ותסלסלת כמא תראהא ותלאזמהא קדים, כמא אן אלסבב אלאול קדים לא אול לה, פלכל שכׄץ מן אשכׄאץ אלדניא אסבאב בהא יתם. פשכׄץ תכאמלת אסבאבה פגא כאמלא, ושכׄץ נקצת אסבאבה פגא נאקצא כאלחבשי אלדׄי לם יהיא לאכתׄר מן קבול צורה אלאנסאן ואלנטק עלי אנקץ מא ימכן. פאלפילסוף אלדׄי תהיאת לה אסתעדאדאת יקבל בהא אלפצׄאיל אלכׄלקיה ואלכׄלקיה ואלעלמיה ואלעמליה ולם ינקצה שי מן אלכמאל. לכן הדׄה אלכמאלאת באלקוה יחתאג פי אכׄראגהא אלי אלפעל אלי אלתעלים ואלתאדיב פתטׄהר אלהיאת עלי מא היית לה מן כמאל ונקצאן ותוסטאת אלי מא לא נהאיה לה, פאלכאמל יתצל בה מן אלנמט אלאלאהי נור יסמי אלעקל אלפעאל יתצל בה עקלה אלמנפעל אתצאל אתחאד חתי ירי אלשכׄץ אנה הו דׄלך אלעקל אלפעאל לא תגׄאיר בינהמא ותציר אלאתה אעני אעצׄא דׄלך אלשכׄץ לא תתצרף אלא פי אכמל אלאעמאל ופי אופק אלאוקאת ועלי אפצׄל אלחאלאת וכאנהא אלאת ללעקל אלפעאל לא ללעקל אלהיולאני אלמנפעל אלדׄי כאן מן קבל יצרפהא פכאן יציב מרה ויכׄטי מראת. והׄדא יציב דאימא. והדׄא אלדרגה אלגׄאיה אלקצוי אלמרגוה ללאנסאן אלכאמל בעד אן תציר נפסה מטהרה מן אלשכוך מחצלה ללעלום עלי חקאיקהא פתציר כאנהא מלך פתציר באדון רתבה מן אלמלכותיה אלמפארקה ללאגסאד והי רתבה אלעקל אלפעאל והו מלך רתבתה דון אלמלך אלמוכל בפלך אלקמר והי עקול מגרדה ען אלמואד קדימה מע אלסבב אלאול לא תכׄאף אלפנא אבדא, פתציר נפס אלאנסאן אלכאמל ודׄלך אלעקל שיא ואחדא פלא יבאלי בפנא גסדה ואלאתה אדׄ קד צאר ודׄלך שיא ואחדא וטאבת נפסה פי אלחיאה אד צאר פי זמרה הרמס ואסקלאביוס וסקראט ואפלאטון וארסטוטאליס בל הו והם וכל מן כאן פי דרגתהם ואלעקל אלפעאל שי ואחד. פהדׄא אלדׄי יכני ענה ברצׄא אללה עלי סביל אללגׄז או אלתקריב פאתבעה ואתבע אלעלם בחקאיק אלאמור ליציר עקלך פעלא לא מנפעלא ואלזם אעדל אלטרק פי אלאכׄלאק ואלאעמאל לאנה מעונה פי תצור אלחק ולזום אלתעלם ואלתשבה בדׄלך אלעקל אלפעאל ויתבע הדׄא אלקנוע ואלכׄצׄוע ואלכׄשוע וכל כׄלק פאצׄל מע אלתעטׄים ללסבב אלאול לא ליהבך רצׄאה ולא ליזיל ענך סכׄטה בל ללתשבה ללעקל אלפעאל פי איתׄאר אלחק ווצף כל שי במא יגב לה ואעתקאדה עלי מא הו עליה. פהדׄא מן צפאת אלעקל פאדׄ צרת בהדׄה אלצפה מן אלאעתקאד לא תבאלי באי שרע תשרעת או תדינת ועטׄמת ובאי קול ובאי לסאן ובאי אעמאל או אכׄתרע לנפסך דינא למעני אלתכׄשע ואלתעטׄים ואלתסביח ולתדביר אכׄלאקך ותדביר מנזלך ומדינתך אן כנת מקבולא מנהם או תדין באלנואמיס אלעקליה אלמולפה ללפלאספה ואגעל קצדך וגׄרצׄך צפא נפסך ובאלגמלה פאטלב צפא אלקלב באי וגה אמכנך בעד תחציל כליאת אלעלום עלי חקאיקהא פתצאדף מטלובך אעני אלאתצאל בדׄלך אלרוחאני אעני אלעקל אלפעאל ורבמא אנבאך ואמרך בעלם גׄיב מן מנאמאת צאדקה וכׄיאלאת מציבה.

3קאל לה אלכׄזרי, אן כלאמך למקנע לכנה גׄיר מטאבק לטלבתי לאני אעלם מן נפסי אני צאפי אלנפס מסדד אלאעמאל נחו רצׄא אלרב לכן כאן גואבי אן הדׄא אלעמל ליס במרצׄי ואן כאנת אלניה מרצׄיה פלא שך אן תׄם עמלא מא מרצׄיא בדׄאתה לא בחסב אלטׄנון, ואלא פאן אלנצראני ואלמסלם אללדׄין אקתסמא אלמעמורה יתקאתלאן וכל ואחד מנהמא קד אצפי ניתה ללה ותרהב ותזהד וצאם וצלי ומצׄי מצממא לקתל צאחבה, והו יעתקד אן פי קתלה אעטׄם חסנה ותקרב אלי אללה, פיקתתלאן וכל ואחד מנהמא יעתקד אן מסירה אלי אלגנה ואלפרדוס. ותצידקהמא מחאל ענד אלעקל.

4קאל אלפילסוף, ליס פי דין אלפלאספה קתל ואחד מן האולא, אדׄ יומון אלעקל.

5קאל אלכׄזרי, ואי חירה ענד אלפלאספה אעטׄם מן אעתקאדהם אלחדׄת, ואן אלעאלם כׄלק פי סתהׄ איאם, ואן אלסבב אלאול יכלם שכׄצא מן אלנאס, פצׄלא ען דׄלך אלתנזיה אלדׄי תנזהה אלפלאספה ען מערפה אלגזאיאת ומע הדׄא פכאן ינבגׄי עלי אעמאל אלפלאספה ועלומהם ותחקיקיהם ואגתהאדהם אן תכון אלנבוה משהורה פיהם שאיעה בינהם לאתצאלהם באלרוחאניאת, ואן יוצף ענהם גׄראיב ומעגזאת וכראמאת, ולקד נרי אלמנאמאת אלצאדקה למן לם יען באלעלם, ולא באצפא נפסה. ונגד צׄד דׄלך פי מן ראמה. פדל אן ללאמר אלאלאהי וללנפוס סרא סוי מא דׄכרתה יא פילסוף.

6תׄם קאל אלכׄזרי פי נפסה, אסאל אלנצארי ואלמסלמין פאן אחד אלעמלין הו לא שך אלמרצׄי. ואמא אליהוד פכפי מא טׄהר מן דׄלתהם וקלתהם ומקת אלגמיע להם.

7פדעא בעאלם מן עלמא אלנצארי, פסאלה ען עלמה ועמלה.

8פקאל לה אנא מומן באלחדתׄ ללמכׄלוקאת ובאלקדם לכׄאלק תעׄ ואנה כׄלק אלעאלם באסרה פי סתהׄ איאם ואן גמיע אלנאטקין מן דׄריה אדם, תׄם דׄריה נוח, ואליה ינתסבון כלהם. ואן ללה ענאיה באלכׄלק ואתצאלא באלנאטקין, וסכׄטא ורצׄא ורחמה וכלאמא וטׄהורא ותגליא לאנביאה ואוליאה וחלולא פי מא בין מן ירצׄאה מן אלגמאהיר, ואלגמלה פכל מא גא פי אלתוראה ופי אתׄאר בני אסראיל אלתי לא מדפע פי צדקהא לשהרתהא ודואמהא ועלאניתהא פי אלגמאהיר אלעטׄאם. ופי אכׄריאתהא ועאקבה להם תגסמת אללאהותיה וצארת גנינא פי בטן עדׄרא מן אשראף נסא בני אסראיל וולדתה נאסותי אלטׄאהר אלאהותי אלבאטן, נביא מרסלא פי טׄאהרה אלאהא מרסלא פי באטנה, והו אלמסיח אלמסמי ענדני באבן אללה, והו אלאב והו אלאבן והו רוח אלקדס, פנחן מוחדון חקיקה ואן טׄהר עלי לסאננא אלתתׄליתׄ נומן בה ובחלולה פי בני אסראיל אגלאלא להם מא לם יזל אלאמר אלאלאהי יתצל בהם, חתי עצי גמהורהם הדׄא אלמסיח וצלבוה, פצאר אלסכׄט מסתמרא עלי גמהורהם, ואלרצׄא עלי אלאפראד אלתאבעין ללמסיח. תׄם עלי אלאמם אלתאבעין לאולאיך אלאפראד ונחן מנהם, ואן לם נכן מן דׄריהׄ אסראיל פנחן אולי באן נתסמי בני אסראיל לאתבאענא אלמסיח ואצחאבה מן בני אסראיל אתׄני עשר מקאם אלאסבאט, תׄם גמלה מן בני אסראיל תאבעת לאולאיך אלאתׄני עשר, צארוא כאלכׄמירה לאמהׄ אלנצארי ואסתחקו דרגה בני אסראיל, וצאר לנא אלטׄפר ואלאנתשאר פי אלבלאד, וגמיע אלמאם מדעוון אלי הדׄא אלדין מכלפון אלעמל בה מן תעטׄים אלמסיח ותעטׄים צליבה אלדׄי צלב עליה ומא אשבהה וחכאה. ואחכאמנא וסירנא פמן וצאיא שמעון אלחוארי, וקואנין מאכׄודׄה מן אלתוראה אלתי נקראהא ולא מדפע פי חקיקתהא ואנהא מן ענד אללה. וקד קיל פי אלאנגיל ען אלמסיח מא גית לאנקץ שריעה מן שראיע מוסי, בל גית לאעצׄדהא ולאזידהא.

9קאל אלכׄזרי, ליס ההנא מגאל ללקיאס בל אלקיאס יבעד אכתׄר הדׄא אלכלאם. לכן אדׄא צח אלעיאן ואלתגרבה חתי יאכׄדׄ במגאמע אלקלב ולא יגד מנדוחה פי אעתקאד גׄיר מא צח ענדה תחיל עלי אלקיאס בלטפה חתי יקרב דׄלך אלמסתבעד כמא יפעל אלטביעיון פי אלכׄואץ אלגׄריבה אלתי תטרא עליהם ממא לו חדתׄוא בהא קבל רויתהא לאנכרוהא, פאדׄא ראוהא תלטפוא וגעלוא להא אסבאבא מן אלנגום ואלרוחאניאת, ולם ידפעוא אלעיאן, ואנא לא אגדני טיב אלנפס לקבול הדׄה אלאמור, לאני טראת עליהא ולם אנשא פיהא, ואלאסתקצא ואגב עלי.

10תׄם אסתדעי עאלמא מן עלמא אלאסלאם וסאלה ען עלמה ועמלה.

11פקאל אנא נתׄבת אלוחדאניה ואלקדם ללה, ואלחדתׄ ללעאלם, ואלאנתסאב אלי אדם ונוח, וננפי אלתגסים גמלה ואן טׄהר שי פי אלקול תאולנאה וקלנא אנה מגאז ותקריב, מע אקרארנא באן כתאבנא כלאם אללה, והו פי דׄאתה מעגזה, יגב עלינא קבולה מן אגל דׄאתה, אדׄ לם ימכן אחדא אן יאתי במתׄלה ולא במתׄל איה מן איאתה, ואן נבינא כׄאתם אלנביין, ונאסךׄ לכל שריעה תקדמת, ודאעי אלאמם כלהא אלי אלאסלאם, וגזא אלטאיע אעאדהׄ רוחה אלי גסדה פי גנה ונעים לא יכׄלו מן אכל ושרב ונכאח וכל מה ישתהי. וגזא אלעאצי אעאדתה פי נאר לא יפני עדׄאבהא אבדא.

12פקאל לה אלכׄזרי, אן מן יראם הדאיתה באמר אללה ויחקק ענדה אן אללה יכלם אלבשר והו יסתבעד דׄלך, ינבגי אן יקרר ענדה אמור משהורה לא מדפע פיהא. ובלאחרי אן יצדק ענדה אן אללה קד כלם בשריא, ואן כאן כתאבכם מעגזה ואלכתאב ערבי פליס ימיז מעגזתה וגׄראבתה עגמי מתׄלי ואדׄא תלי עלי לם אפרק בינה ובין גירה מן כלאם אלערבי.

13פקאל לה אלעאלם וקד טׄהר עלי ידיה מעזגאת לכן לם תגעל חגה פי קבול שריעתה.

14קאל אלכׄזרי, נעם ולא תסכן אלנפוס אלי אן תקר אן אלאלאה מתצל באלבשר אלא במעגזה יקלב פיהא אלאעיאן פנעלם אן דׄלך לא יקדר עליה אלא מן אכׄתרע אלאשיא מן לא שי, ואן יכול דׄלך אלאמר בין ידי גמאהיר ירונה עיאנא, ולא יאתיהם ברואיה ואסנאד ובאן ידרס דׄלך וימתחן אלמחנה בעד אלמחנה חתי לא יקע פי אלטׄן אן הנאך תכׄיילא או סחרא, ובאלאחרי אן תקבל אלנפוס הדׄא אלאמר אלעטׄים אעני אן כׄאלק אלדניא ואלאכׄרה ואלמלאיכה ואלסמאואת ואלאנואר יתצל בהדׄה אלחמאה אלקדׄרה אעני אלאנסאן ויכלמה ויקצׄי רגׄבתה ותחכמאתה.

15פקאל אלעאלם אליס כתאבנא ממלי מן אכׄבאר מוסי עׄהׄ ובני אסראיל לא מדפע פי מא פעל בפרעון ושקה אלבחר ותסלים מן רצׄי ענה ותגׄריק מן סכׄט עליה, תׄם אלמן ואלסלוי טול ארבעין עאמא, ותכלימה מוסי פי אלטור, ואיקאפה אלשמס לישוע, ונצרתה עלי אלגבארין, ומא כאן קבל דׄלך מן אלטופאן והלאך קום לוט, אליס הדׄא משהורא ולא טׄן פיה ללתחייל ואלתכׄייל.

16קאל אלכׄזרי, בלי כאני אראני מצׄטרא אלי מסאילהׄ אליהוד לאנהם בקיהׄ בני אסראיל לאני אראהם הם אלחגה פי אן ללה שריעה פי אלארץׄ. תׄם אסתדעי חברא מן אחבאר אליהוד וסאלה ען אעתקאדה.

17פקאל לה אנה מומן באלה אברהים ואסחק ואסראיל אלמכׄרג בני אסראיל מן מצר באלאיאת ואלמעגזאת ומכתפלהם פי אלתיה ומעטיהם ארץׄ אלשאם בעד תגויזהם אלים ואלארדן במעגזאת, ומרסל מוסי בשריעתה, תׄם אלאף אנביא בעדה מוכדין לשריעתה באלועד למן תחפטׄ בהא, ואלועיד למן כׄאלפהא, ואימאננא למא אנדרג פי אלתוראה ואלכׄבר טויל.

18קאל אלכׄזרי, קד כנת עאזמא אלא אסאל יהודיא לעלמי בתלאף אתׄארהם ונקצאן אראיהם אדׄ אלמנחסה לם תתרך להם מחמדה, פהלא קלת יא יהודי אנך תומן בכׄאלק אלעאלם ונאטׄמה ומדברה ובמן כׄלקך ורזקך ומא אשבה הדׄה אלאוצאף אלתי הי חגהׄ כל דׄי דין, ומן אגלהא יתבע אלחק אלעדל ללתשבה באלכׄאלק פי חכמתה ועדלה.

19קאל אלחבר, הדׄא אלדׄי תקול הו אלדין אלקיאסי אלסיאסי יודי אליה אלנטׄר ותנטוי פיה שכוך כתׄירה פסל אלפלאספה ענה ולן תגדהם מתפקין עלי עמל ואחד ולא אעתקאד ואחד, אדׄ הי דעאוי, מנהא מא יקדרון אן יברהנוא עליהא, ומנהא מא יקנעון פיהא, ומנהא מא ליס יקנעון פיה פצׄלא ען אלברהאן.

20קאל אלכׄזרי, ארי כלאמך יא יהודי אשבה מן פאתחתה, וקד אריד אלזיאדה.

21קאל אלחבר, בל פאתחהׄ כלאמי הו אלברהאן, בל הו אלעיאן וגׄני ען דליל וברהאן.

22קאל אלכׄזרי, וכיף דׄלך.

23קאל אלחבר, תאדׄן לי פי מקדמאת אקדמהא, פאני אראך מסתחקרא לכלאמי מסתקלא לה.

24קאל אלכׄזרי, קדם מקדמאתך חתי אסמע.

25קאל אלחבר, לו קיל לך אן צאחב אלהנד פאצׄל ינבגׄי לך תעטׄימה ואלתנויה באסמה, ווצף אתׄארה במא יתצל בך מן עדל אהל בלאדה ופצׄל אכׄלאקהם ועדל מעאמלתהם, הל כאן הדׄא ילזמך.

26קאל אלכׄזרי, וכיף ילזמני ואלשך פי אהל אלהנד הל עדלהם מן דׄאתהם וליס להם מלך, או עדלהם מן קבל מלכהם. אם אלאמר מן אלוגהין מעא.

27קאל אלחבר, פלו גאך רסולה בהדאיא הנדיה לא תשך אנהא לא תגד אלא פי אלהנד פי קצור אלמלוך, בכתאב משהוד פיה אנה מן קבלה, ויקתרן בה אדויה תדאויך מן אמראצׄך, ותחפטׄ עליך צחתך, וסמום לאעדאך ומחארביך תקאבלהם בהא פתקתלהם דון אעדאד ולא אעדאד, הל כנת תלתזם טאעתה.

28קאל אלכׄזרי, נעם, וכאן יזול עני אלשך אלקדים הל ללהנד מלך אם לא, וכנת אעתקד אן מלכה ואמרה ואצל אלי.

29קאל אלחבר, ואדׄא סאלת ענה במא דׄא תצפה.

30קאל אלכׄזרי, באלצפאת אלתי צחת ענדי עיאנא, תׄם אתבעהא באלתי כאנת משהורה ותבינהׄ בהדׄה אלאואכׄר.

31קאל אלחבר, ובמתׄל הדׄא אגבתך אדׄ סאלתני, ובמתׄל הדׄא פאתח מוסי פרעון אדׄ קאל לה אלאה אלעבראניין ארסלני אליך, יעני אלאה אברהים ואסחק ויעקוב, אדׄ כאן אמרהם משהורא ענד אלאמם, ואנה צחבהם אמר אלאהי, ועני בהם, וקצׄי להם אלעגאיב. ולם יקל לה רב אלסמא ואלארץׄ, או כׄאלקי וכׄאלקך ארסלני. וכדׄלך פאתח אללה כׄטאבה לגמהור בני אסראיל. אנא אללה מעבודך אלדׄי אכׄרגתך מן בלד מצר. ולם יקל אנא כׄאלק אלעאלם וכׄאלקכם. פהכדׄא פאתחתך יא אמיר אלכׄזר אדׄ סאלתני ען אימאני, גאובתך במא ילזמני, ומעשר בני אסראיל אלדׄין צח ענדהם דׄלך אלעיאן, תׄם אלתואתר אלדׄי הו כאלעיאן.

32קאל אלכׄזרי, פאדׄא" שריעתכם אנמא הי וקף עליכם.

33קאל אלחבר, נעם ומן אנצׄאף אלינא מן אלאמם כׄאצה ינל מן כׄירנא ולם יסתו מענא, ולו כאן לזום אלשרע מן אגל מא כׄלקנא לאסתוי פיה אלאביץׄ ואלאסוד אדׄ כלהם כׄלקתה תעׄ, לכן אלשרע מן אגל אכׄראגה לנא מן מצר, ואתצאלה בנא לכוננא אלצפוה מן בני אדם.

34קאל אלכׄזרי, אראך יא יהודי תתלון, וקד עאד כלאמך גׄתׄא בעד מא כאן סמינא.

35קאל אלחבר, אגׄתׄה אסמנה אן אתסע לי צדרך חתי אתסע פי שרחה.

36קאל אלכׄזרי, קל מא שית.

37קאל אלחבר, אן בחכם אלאמר אלטביעי לזם אלאגׄתדׄא ואלנמו ואלתוליד וקואהא וגמיע שראיטהא, ואכׄתץ בדׄלך אלנבאת ואלחיואן, מן דון אלארץׄ ואלחגארה ואלמעאדן ואלענאצר.

38קאל אלכׄזרי, הדׄה גמלה תחתאג אלי תפציל, לכנהא חק.

39קאל אלחבר, ובאלאמר אלנפסאני אכׄתץ אלחיואן כלה, ולזם מנה חרכאת ואראדאת ואכׄלאק וחואס טׄאהרה ובאטנה וגׄיר דׄלך.

40קאל אלכׄזרי, והדׄא איצׄא לא מדפע פיה.

41קאל אלחבר, ובחכם אלאמר אלעקלי אכׄתץ אלנאטק מן גמלהׄ אלחיואן, ולזם מנה אצלאח אכׄלאק, תׄם אצלאח אלמזל, תׄם אצלאח אלמדינה. וכאנת אלסיאסאת ונואמיס סיאסיה.

42קאל אלכׄזרי, והדׄא חק.

43קאל אלחבר, פאי רתבה תכון פוק הדׄה.

44קאל אלכׄזרי, רתבה אלעלמא אלעטׄמא.

45קאל אלחבר, לם ארד אלא רתבה תפארק צאחבתהא מפארקה גוהריה כמפארקה אלנבאת ללגמאד ומפארקה אלאנסאן ללבהאים. ואמא אלמפארקה באלאכתׄר ואלאקל פלא נהאיה להא אדׄ הי מפארקה ערצׄיה וליסת רתבה עלי אלחקיקה.

46קאל אלכׄזרי, פלא רתבה אדׄא" פי אלמחסוסאת בעד אלאנסאן.

47קאל אלחבר, פאן נגד אנסאנא ידכׄל אלנאר פלא תודׄיה, ויזמן ען אלטעאם פלא יגוע, ויכון לוגהה נור לא תחתמלה אלאבצאר, ולא ימרץׄ, ולא יהרם, חתי אדׄא בלגׄ עמרה מאת מותא אכׄתיאריא כמן יצעד אלי פראשה לינאם פי יום מעלום וסאעה מעלומה, מצׄאפא אלי עלם אלגׄיב ממא כאן ויכון, אליס הדׄה אלרתבה מפארקה פי אלגוהר לרתבה אלנאס.

48קאל אלכׄזרי, בל אן הדׄה אלרתבה הי אלהיה מלכותיה אן כאנת מוגודה, והדׄא מן חכם אלאמר אלאלהי, לא מן אלעקלי, ולא מן אלנפסאני, ולא מן אלטביעי.

49קאל אלחבר, הדׄא בעץׄ צפאת אלנבי אלדׄי לא מכׄתלף עליה, אלדׄי עלי ידיה טׄהר ללגמהור אתצאל אללאהות בהם, ואן להם רבא ידברהם כיף שא, ובחסב טאעתהם ועציאנהן איצׄא, וכשף אלגׄיב ואעלם כיף כאן חדתׄ אלעאלם, ואנסאב אלנאס קבל אלטופאן, וכיף אנתסבוא אלי אדם, תׄם אלטופאן, ונסב אלסבעין אמה אלי סאם וחם ויפת אולאד נוח, וכיף תפרקת אללגׄאת, וחיתׄ סכנוא, וכיף אנשית אלצנאיע ובנית אלמדן, ואלתאריךׄ מן אדם אלי הלם גרא.

50קאל אלכׄזרי, והדׄא גׄריב אן כאן ענדכם תאריךׄ מתחקק לכׄלקהׄ אלעאלם.

51קאל אלחבר, בל בדׄלך נורךׄ, לא אכׄתלאף בין אליהודיין פי דׄלך מן אלכׄזר אלי אלחבשה.

52קאל אלכׄזרי, פכם תעדון אליום.

53קאל אלחבר, ארבעה אלאף וכׄמס מאיה, ותפצילהא משרוח מן עמר אדם ושיתׄ ואנוש אלי נוח, תׄם סאם ועבר אלי אברהים, תׄם אסחאק ויעקוב אלי מוסא עׄהׄ. והאולא עלי אתצאלהם לבאב אדם וצפותה, ולכל ואחד מנהם אולאד כאלקשור לם ישבהוא אלאבא, פלם יתצל בהם אמר אלאהי פצׄבט אלתאריךׄ באלאלאהיין, וכאנוא אפראדא לא גמאעאת, חתי אולד יעקוב אתׄני עשר סבטא כלהם יצלחון ללאמר אלאלאהי, פצארת אלאלאהיה פי גמאעה, ובהם אלתאריךׄ, פנחן נחמל תאריךׄ מן תקדמהם ען מוסי עׄהׄ, ונדרי מא מן מוסי אלי הלם.

54קאל אלכׄזרי, הדׄא אלתפציל יבעד אלטׄן אלסו מן אלכדׄב ואלאצטלאח, אדׄ מתׄל הדׄא לא יתפק עשרה עליה דון אן יתכׄאדׄלוא ויכשפוא סר אצטלאחהם, או ידפעוא קול מן יחקק ענדהם מתׄל הדׄא, פכיף גמאהיר עטׄימה ואלתאריךׄ קריב, לא יתסע ללכדׄב ואלאפתרא.

55קאל אלחבר, נעם ואברהים בעינה חצׄר פי תפריק אללגאת, ובקי הו וקראבתה בלגהׄ עֵבֶר גדה. ובדׄלך תסמי עבראניא. וגא מוסי עׄהׄ בעדה בארבע מאיהׄ עאם, ואלדניא פי אחפל מא כאנת מן תמכן אלעלום אלסמאויה ואלארצׄיה, וורד עלי פרעון ועלמא מצר ועלמא בני אסראיל אלמואקפין לה, ואלבאחתׄין עליה אלדׄין לם יצדקוה תצדיקא תמאמא אן אללה יכׄאטב אלבשר, חתי אסמעהם כׄטאבה באלעשר כלמאת. הכדׄא כאן קומה מעה ליס מן גהלהם, בל מן עלמהם מכׄאפהׄ אלחיל מן אלעלום אלסמאויה וגׄיר דׄלך ממא לא יתׄבת ענד אלתפתיש כאלדלס, ואלאמר אלאלאהי כאלדׄהב אלאבריז, יזיד פי אלכׄבר ללדינאר דינארא. פכיך יתכׄיל אן יצור ענדהם אן אללגׄאת קבלהם בכׄמס מאיהׄ סנה כאנת לגׄהׄ עֵבֶר וחדהא. ותפרקת פי באבל פי איאם פֶּלֶג, ונסב אמה כדׄי ואמה כדׄי אלי סאם ואמה כדׄי אלי חם, ובלאדהם כדׄי וכדׄי, הל יצח אן יכון אליום אחד יצור ענדנא כדׄבא פי אנסאב מלל משהורה ופי קצצהם ולגאתהם, ויכון כׄברה דון כׄמס מאיהׄ עאם.

56קאל אלכׄזרי, הדׄא מחאל, וכיף ונחן נגד אלעלום בכׄטוט ואצׄעיהא מנדׄ כׄמס מאיהׄ עאם, וכׄבר מן כאן אליום כׄמס מאיהׄ עאם לא יגוז אלכדׄב עלי משהוראתה מתׄל אלאנסאב ואללגׄאת ואלכׄטוט.

57קאל אלחבר, פכיף לא ינאקץׄ מוסי פי מא אתי בה וקומה מטאלבוה פצׄלא ען גירהם.

58קאל אלכׄזרי, הדׄה מקבולאת קויה ממכנה.

59קאל אלחבר, אתרי אן אללגאת קדימה לא אול להא.

60קאל אלכׄזרי, בל חדיתׄה מצטלחה עליהא, ידל עלי דׄלך תאליפהא מן אלאסמא ואלאפעאל ואלחרוף, והדׄה מן אלשבהאת אלמאכׄודׄה מן מכׄארג אלנטק.

61קאל אלחבר, הל ראית מכׄתרע לגׄה או סמעת עליה.

62קאל אלכׄזרי, לם אר ולא סמעת, פלא שך אנהא חצלת פי עצר מן אלאעצאר, ולם יכן קבל לגׄה מצטלחא עליהא מן אצטלאח קום דון קום עלי לגה.

63קאל אלחבר, אסמעת ען אמה תכׄאלף פי אלסבוע אלמעלום אבתדאה מן אלאחד ותמאמה פי אלסבת, פהל ימכן אן יתפק פי דׄלך אהל אלצין מע אהל אלגזאיר אלמגׄרביה דון אבתדא ואגתמאע ואצטלאח.

64קאל אלכׄזרי, לא ימכן דׄלך אלא באצטלאח מן אלגמלה. והדׄא בעיד או אן יכון אלנאס כלהם בני אדם או בני נוח או גׄירהמא פיכון אלאסבוע מנקולא ענדהם ען ואלדהם.

65קאל אלחבר, הדׄא ארדת, נעם ועדד אלעשרה אתפאק אלנאס עליה פי אלמשארק ולמגׄארב, אי טבע יקוד אלי וקוף ענד אלעשרה, אלא לאנה מחמול ען מבתד בה.

66קאל אלכׄזרי, כיף לא יכׄל באימאנך הדׄא מא יכׄבר ען אהל אלהנד אן ענדהם אתׄארא ומבאני יחקקון אן להא אלף אלף מן אלסנין.

67קאל אלחבר, כאן יכׄל באימאני לו וגד אעתקאד מצׄבוט, או כתאב אגמע עליה גמהור דון כׄלאף בתאריךׄ, ולן יוגד דׄלך, ואנמא הם אמה סאיבה ולא תחקיק ענדהם, פיגׄאיטׄון אהל אלאדיאן במתׄל הדׄא אלכלאם, כמא יגׄאיטׄונהם באותׄאנהם וטלאסמהם וחילהם ויקולון אנהא תנפעהם, ויסתהזון במן יקול אן ענדה כתאבא מן ענד אללה, וצׄע מע הדׄא כתב קלילה אלפהא אפראד מן אלנאס יגׄתר בהא אלצׄעיף אלראי, כבעץׄ כתב אלמנגמין יצׄעון פיהא תואריךׄ עשראת אלאף מן אלסנין, מתׄל כתאב אלפלאחה אלנבטיה יסמי פיהא ינבושאד, וצגרית, ודואני, יזעם אנהם כאנוא קבל אדם, ואן ינבושאד מנהם הוא מעלם אדם, ומא אשבה הדׄא.

68קאל אלכׄזרי, הב אני חאגגתך בעאמה דהמא ובקום לא תגמע להם כלמה פאצבת אלגואב. פמא דׄא תקול פי אלפלאספה והם מן אלבחתׄ ואלתחריר חיתׄ הם, ואגמעוא עלי אלאזליה ואלקדם ללעאלם, וליס הדׄא עשראת אלאף ולא אלאף אלאף אלא מא לא נהאיה לה.

69קאל אלחבר, אן אלפלאספה למעאדׄיר אדׄ כאנוא קומא לם ירתׄוא עלמא ולא דינא, לאנהם יונאניון, ויונאן מן בני יֶפֶת סאכני אלשמאל, ואלעלם אלמורתׄ מן לדן אדם והו אלעלם אלמויד באמר אלאהי אנמא הו פי דׄריה סאם אלדׄי הו צפוה נוח לם יזל אלעלם ולא יזאל פי תלך אלצפוה מן אדם. ואנמא צאר אלעלם פי יונאן מדׄ צארת להם אליד אלגׄאלבה, פאנתקל אלעלם אליהם מן פארס, ואלי פארס מן אלכסדאניין ונבגׄ פיהם אלפלאספה אלמשהורון פי תלך אלדולה לא מן קבל ולא מן בעד, ומדׄ צארת אלדולה אלי אלרום לם יקם פיהם פילסוף משהור.

70קאל אלכׄזרי, אן הדא יוגב אן לא יצדק ארסטוטאליס פי עלמה.

71קאל אלחבר, נעם אנה כלף דׄהנה ופכרתה למא לם יכן ענדה כׄבר מן יתׄקה תקלידא, פתפכר פי אואיל אלעאלם ואואכׄרה, פצעב עלי פכרה תצור אלאבתדא כמא צעב איצׄא אלקדם, לכן רגח קיאסאתה אלקאילה באלקדם במגרד פכרה, ולם יר אן יסאל ען תאריך מן כאן קבלה, ולא כיף אנתסב אלנאס, ולו כאן אלפילסוף פי אמה ירתׄ מקבולאת ומשהוראת לא מדפע לה פיהא, לצרף קיאסאתה וברהאנה פי תמכינה אלחדתׄ עלי צעובתה כמא מכן אלקדם אלדׄי הו אצעב ללקבול.

72קאל אלכׄזרי, והל פי אלברהאן תרגיח.

73קאל אלחבר, ומן לנא פי אלמסאלה באלברהאן אעודׄ באללה אן יאתי אלשרע במא ידפע עיאנא או ברהאנא, ולכן יאתי במעזגאת וכׄרק עאדאת באכתׄראע אעיאן או קלב עין אלי עין אכׄרי לידל עלי מכׄתרע אלעאלם, וקדרתה עלי פעל מא שא מתי שא, ומסאלהׄ אלקדם ואלחדתׄ גׄאמצׄה ודלאיל אלחגתין מתכאפיה, תׄם ירגח אלחדתׄ אלנקל ען אדם ונוח ומוסי עׄהׄ באלנבוה אלתי הי אצדק מן אלקיאס, ובעד אן ילגא אלמתשרע אלי אלתסלים ואלאקראר בהיולי קדימה, ועואלם כתׄירה קבל הדׄא אלעאלם, ליס פי דׄלך מטען פי אעתקאדה אן הדׄא אלעאלם חאדתׄ מנדׄ מדה מחצלה ואול נאסה אדם וחוה.

74קאל אלכׄזרי, תכפיני הדׄה אלחגג אלמקנעה פי אלבאב. ואן טאלת צחבתי לך סאכלפך אן תערץׄ עלי אלחגג אלקאטעה, לכן עד אלי אדראג חדיתׄך, וכיף תמכן פי נפוסכם הדׄא אלאמר אלעטׄים אן יכול כׄאלק אלאגסאם ואלארואח ואלנפוס ואלעקול ואלמלאיכה אלדׄי תרפע ותקדס ותנזה ען אן תדרכה אלעקול פצׄלא ען אלחואס, לה אתצאל בהדׄא אלכׄלק אלחקיר אלדׄמים פי מאדתה, ואן כאן פי צורתה עגיבא, אדׄ פי אקל חשרה מן עגאיב אלחכמה מא יחאר פיה אלדׄהן.

75קאל אלחבר, קד כפיתני בקולך הדׄא כתׄירא מן גואבך, אתנסב הדׄה אלחכמה אלמוגודה פי כׄלק אלנמלה מתׄלא אלי פלך או אלי כוכב או אלי גיר דׄלך, חאשא אלבארי אלקאדר אלמקדר אלדׄי יעטי כל שי חקה דון זיאדה ולא נקצאן.

76קאל אלכׄזרי, והדׄא הו אלמנסוב אלי פעל אלטביעה.

77קאל אלחבר, ומא אלטביעה.

78קאל אלכׄזרי, הי קוה מן אלקוי עלי מא סמענא פי אלעלום ולא נדרי מא הי, ולאכן אלעלמא קד ערפוהא לא מחאלה.

79קאל אלחבר, בל עלמהם פיהא כעלמנא, חדהא אלפילסוף באנהא אלמבדא ואלסבב אלדׄי בה יתחרך ויסכן אלשי אלדׄי הו פיה באלדׄאת לא באלערץׄ.

80קאל אלכׄזרי, כאנה יקול אן אלשי אלדׄי יתחרך מן דׄאתה ויסכן מן דׄאתה לה סבב מא בה יתחרך ויסכן, ודׄלך אלסבב הו אלטביעה.

81קאל אלחבר, הדא אלדׄי יריד תחדׄק כתׄיר ותדקיק ותפריק בין מא יפעל באלערץׄ עמא יפעל באלטבע, ואשיא תרוק אלסאמעין, ולכן חאצל עלמהם באלטביעה הדׄא.

82קאל אלכׄזרי, פמא אראהם אלא אצׄלונא בהדׄה אלאסמא, וגעלונא משרכין באללה פי קולנא אלטביעה חכימה פאעלה, ורבמא קלנא כׄאלקה עלי פחוי כלאמהם.

83קאל אלחבר, נעם לכן ללענאצר ואלקמר ואלשמס ואלכואכב אפעאל בטריק אלתסכׄין ואלתבריד ואלתרטיב ואלתיביס ותואבעהא מן גׄיר אן ינסב אליהא חכמה, בל סכׄרה. ואמא אלתצויר ואלתקדיר ואלתבריז וכל מא פיה חכמה לגׄרץׄ פלא ינסב אלא ללחכים אלקאדר אלקאהר. פמן סמי הדׄה אלתי תצלח אלמאדה באלתסכׄין ואלתבריד טביעה לם יצׄר אדׄא נפי ענהא אלחכמה כמא ינפי ען אלרגל ואלמראה כׄלקה אלולד אדׄא אגתמעא. ואנמא המא מן אעואן אלמאדה אלקאבלה לצורה אלאנסאן ואלצורה מן ענד אלמצור אלחכים פלא תסתבעד טׄהור אתׄאר אלאהיה שריפה פי הדׄא אלאדני אדׄא תהיאת תלך אלמואד לקבולהא. והדׄא הו אצל אלאימאן ואצל אלעציאן.

84קאל אלכׄזרי, וכיף יכון אצל אלאימאן הו אצל אלעציאן.

85קאל אלחבר, נעם אן אלאשיא אלתי תצלח לקבול דׄלך אלאתׄר אלאלאהי ליסת פי וסע אלבשר ולא ימכנהם אן יקדרוא כמיאתהא וכיפיאתהא, ולו עלמו דׄואתהא פלן יעלמוא אזמנתהא ואמכנתהא וקראינהא ואלתהיו להא, פיחתאג פי דׄלך אלי עלם אלאהי תאם משרוח גאיה אלשרח מן ענד אללה, פמן ורד עליה הדׄא אלאמר ואמתתׄלה עלי חדודה ושרוטה בניה כׄאלצה פהו אלמומן. ומן ראם אצלאח אשיא לקבול דׄלך מן חדׄק וקיאס וטׄנון ממא יוגד פי כתב אלמנגמין מן אסתנזאל אלרוחאניאת ועמל אלטלאסם פהו אלעאצי, לאנה יקרב אלקראבין ויבכׄר אלבכׄוראת ען קיאס וען טׄן, פלא ידרי חקיקה מא אלדׄי ינבגׄי, וכם, וכיף, ופי אי מכאן, ופי אי וקת, ומן מן אלנאס, וכיף ינבגי אן יתנאול דׄלך, וקראין כתׄירה יטול וצפהא, פכאן כאלגאהל אלדׄי דכׄל אלי כׄזאנהׄ טביב משהור באן אדויתה נאפעה. ואלטביב קד עדם, ואלנאס יטלבון תלך אלכׄזאנה טלבא ללמנפעה, ודׄלך אלגאהל יפרק עליהם מן תלך אלאואני, והו לא יערף אלאדויה, ולא כם יצלח אן יסקי מן דוא לשכׄץ שכׄץ, פקתל כׄלקא בתלך אלאדויה אלתי כאנת תנפעהם. ואן אתפק אן ינפע אחדהם באנא מן תלך אלאואני מאל אלנאס אליה וקאלוא אן דׄלך הו אלנאפע, חתי אדׄא כׄאנהם או ראוא לגירה נפעא באלערץׄ, מאלוא איצׄא אליה, ולם ידרוא אן אלנאפע בדׄאתה אנמא כאן ראי דׄלך אלטביב אלעאלם אלדׄי כאן דבר תלך אלאדויה, תׄם כאן אסקאהא עלי מא ינבגׄי וכאן יאמר אלעליל אן יסתעד במא יצלח לדוא דוא מן גדׄא ושראב וריאצׄה וסכון ונום ויקטׄה והוא ומרקד וגיר דׄלך. פהכדׄא צאר אלנאס קבל מוסי, חאשי אלקליל, ינכׄדעון ללנואמיס אלנגומיה ואלטביעיה, וינתקלון מן נאמוס אלי נאמוס, ומן אלאה אלי אלאה, ורבמא תמסכוא בכתׄיר מנהא, וינסון מדברהא ומצרפהא, וגעלוהא סבב מנאפע, והי באעיאנהא סבב מצׄאר בחסב אלתהיו ואלאסתעדאד. ואמא אלמנפעה בדׄאתה פהו אלאמר אלאלאהי, ואלצׄאר בדׄאתה הו עדמה.

86קאל אלכׄזרי, ארגע בנא אלי אלגׄרץׄ ואעלמני כיף נשא דינכם, תׄם כיף פשא וטׄהר, וכיף תאלפת אלכלמה בעד מא אכׄתלפת, ופי כם מן אלמדה תאסס אלדין ואנבני חתי תשיד ותם. לאן מבאדי אלמלל לא מחאלה אנמא תכון באפראד יתצׄאפרון עלי נצרהׄ אלראי אלדׄי ישא אללה אטׄהארה, פלא יזאלון יכתׄרון וינצרון באנפסהם, או יקום להם מלך נאצר יקהר אלגמאהיר עלי דׄלך אלראי.

87קאל אלחבר, אנמא יקום וינשא עלי הדׄה אלצפה אלנואמיס אלעקליה אלתי מבדוהא מן אלאנסאן, ואדׄא טׄהר וצחבה אלתופיק קיל אנה מויד מן אללה מלהם ומא אשבה הדׄא. ואמא אלנאמוס אלדׄי מבדוה מן אללה פאנמא יקום דפעה, קיל לה כן פכאן, מתׄל כׄלקהׄ אלעאלם.

88קאל אלכׄזרי, לקד הולת עלינא יא חבר.

89קאל אלחבר, בל אלאמר אהול, כאן בני אסראיל מסתעבדין במצר סת מאיהׄ אלף רגל ממן כאן פוק אלעשרין עאמא, מסמין מנתסבין אלי אתׄני עשר סבטא, לם ישדׄ מנהם שאדׄ, ולא פר אלי בלד אכׄר, ולא דאכׄלהם גׄריב, מנתטׄרין ועדא ועד בה אגדאדהם אברהים ואסחק ויעקוב עׄהׄ אן יורתׄהם בלד אלשאם, ואלשאם חינידׄ ביד סבע אמם פי גׄאיהׄ אלכתׄרה ואלקוה ואלאקבאל. ובנו אסראיל פי גׄאיה אלדׄלה ואלשקא מע פרעון, יקתל אולאדהם כי לא יכתׄרוא. פארסל מוסי והרון עׄהׄ עלי צׄעפהמא, וואקפא פרעון עלי קותה, באלאיאת ואלמעגזאת וכׄרק אלעאדאת, ולם יקדר אן יחתגב ענהמא, ולא אן יאמר פיהמא בסו, ולא אן יחגב נפסה ען אלאפאת אלעשר אלחאלה באהל מצר, פי מיאההם, תׄם פי ארצׄהם, תׄם פי הואהם ופי נבאתהם ופי חיואנהם ופי אבדאנהם, תׄם פי נפוסהם אדׄ מאת פי טרפהׄ עין שטר אלליל אגל מן כאן פי מנאזלהם, ואחבהם אליהם כל ולד בכר, ולא דאר דון מית, חאשי דור בני אסראיל. וכל הדׄה אלאפאת תנזל בהם באדׄן ואנדׄאר וועד, ותרתפע באדׄן ואנדׄאר, בחיתׄ יעתקד אנהא מקצודהׄ מן אלאה מריד, יפעל מא שא מתי שא, לא טביעיה ולא נגומיה ולא אתפאקיה. פכׄרג בנו אסראיל באמר אללה פי תלך אללילה פי חין ופאהׄ אולאד מצר מן עבודיהׄ פרעון, וצארוא אלי נאחיהׄ בחר אלקלזם וקאידהם עאמוד גׄמאם ועאמוד נאר, סאיר אמאמהם, ומדברהם וסאיסהם ואמאמהם אלשיכׄאן אלאלאהיאן מוסי והרון עׄהׄ, כאנא חין אתאהמא אלנבוה אבני תׄמאנין וניף. ואלי אלאן ליס ענדהם שראיע אלא קלילה מורותׄה ען אולאיך אלאפראד מן לדן אדם ונוח, ולם ינסכׄהא מוסי ולא פסכׄהא, לכן זאד עליהא. תׄם תבעהם פרעון פלם ילגוא אלי סלאח, ולא כאן אלקום ממן ידרי אלחרב. פשק אלבחר וגאזוה וגׄרק פרעון וחשרה, וקדׄף בהם אלבחר אלי בני אסראיל אמואתא, חתי ראוהם עיאנא ואלכׄבר טויל משהור.

90קאל אלכׄזרי, הדׄא הו אלאמר אלאלאהי חקא, ומא אקתרן בה מן אלשרע ואגב קבולה, אדׄ לא ידאכׄל אלקלב מנה שך מן סחר או חילה או תכׄיל לו כׄיל להם בחר ואנשקאקה וגואזהם פיה, כיף יכׄיל להם נגאתהם מן אלעבודיה ומות מסתעבדיהם ואכׄדׄהם לבסהם ובקא אמואלהם באידיהם, הדׄא תעסף מן אלמתזנדקה.

91קאל אלחבר, ובעד הדׄא אדׄ חצלוא פי אלתיה חיתׄ לא זרע, אנזל עליהם טעאם מכׄתרע מכׄלוק יומא יומא, חאשי יום אלסבת, אכלוה טול ארבעין עאמא.

92קאל אלכׄזרי, והדׄא איצׄא לא מדפע פיה, מא ידום ארבעין עאמא לסת מאיהׄ אלף רגל ותואבעהם, ינזל סתה איאם וירתפע פי אלסבת. פאלסבת ואגב קבולה אדׄ צאר אלאמר אלאלאהי כאלמלאזם לה.

93קאל אלחבר, אלסבת מוכד מן הדׄא ומן כׄלקהׄ אלעאלם פי סתה איאם ומא סאדׄכרה. ודׄלך אן אלקום מע אימאנהם במא יאתי בה מוסי עׄהׄ בעד הדׄה אלמעגזאת בקי פי נפוסהם שך כיף יכׄאטב אללה אלבשר, כי לא יכון מבדא אלשריעה מן ראי ופכרה מן קבל אלאנסאן יצחבה אלהאם ותאייד מן ענד אללה, אדׄ כאנוא יסתבעדון אלכׄטאבה מן גׄיר בשר, אדׄ אלכׄטאבה גסמיה, פאראד אללה אזאחהׄ הדׄא אלשך ענדהם ואמרהם באלתזאם באלבאטנה ואלטׄאהרה. וגעל אוכדהא אעתזאל אלנסא ואלתהיו ואלתאהב לסמע כלאם אללה, ואסתעד אלקום ותאהבוא לדרגהׄ אלוחי, בל לסמאע אלכׄטאב גהרא כלהם. וכאן דׄלך בעד תׄלאתׄה איאם, במקדמאת הול עטׄים מן ברוק ורעוד וזלאזל וניראן חפת באלמסמי טור סיני, ובקית תלך אלנאר טול ארבעין יומא עלי אלגבל, יראהא אלקום, וירון מוסי דאכׄלא אליהא וכׄארגא ענהא, וסמע אלקום אלכׄטאב פציחא בעשר כלמאת הי אמאהת אלשראיע ואצולהא. אחדאהא אלאמר באלסבת. וקד כאן תקדם אלאמר בה מקרונא בנזול אלמן. פהדׄה אלעשר כלמאת לם ינקלהא אלגמהור ען רגאל אפראד, ולא ען נבי, לכן ען אללה. ולכן לם תכן להם קוהׄ מוסי עׄהׄ למשאהדהׄ דׄלך אלאמר אלעטׄים, ואמן אלקום מן דׄלך אליום באן מוסי עׄהׄ מכׄאטב בכלאם מבדוה מן אללה, לם יתקדם למוסי עׄהׄ פיה פכרה ולא ראי, כי לא תכון אלנבוה כמא תזעם אלפלאספה מן נפס תצפו אפכארהא ותתצל באלעקל אלפעאל אלמסמי באלרוח אלקדיס או בגבראיל פילהם. ורבמא כׄיל אליה פי דׄלך אלוקת פי אלנום או בין אלנום ואליקטׄה אן שכׄצא יכלמה, ויסמע כלאמה כׄיאלא בנפסה לא באדׄניה. ויראה בוהמה לא בעינה, פיקאל חינידׄ אן אללה כלמה, פאנתפת הדׄה אלטׄנון בהדׄא אלמשהד אלעטׄים. ומא תבע אלכלאם אלאלאהי מן כתאב אלאהי אדׄ רסם הדׄה אלעשר כלמאת פי לוחין מן גוהר רפיע, ודפעהמא אלי מוסי עׄהׄ וראוהא כתאבא אלאהיא כמא סמעוהא כׄטאבא אלאהיא, ועמל להא מוסי עׄהׄ באמר אללה תעׄ תאבותא ואקאם עליהא אלקבה אלמשהורה, ובקי דׄלך בין בני אסראיל טול דולה אלנבוה נחו תסע מאיה סנה, חתי עצי אלקום, פאכׄתפי אלתאבות, וטׄפר בהם בכׄתנצר ואגלאהם.

94קאל אלכׄזרי, אן מן יסמע כלאמכם אן אללה כׄאטב גמהורכם וכתב לכם אלואחא וגׄיר דׄלך, למעדׄור אן ינסב אליכם ראי אלתגסים, ואנתם מעאדׄיר איצׄא אדׄ לא מדפע פי הדׄה אלמשאהד אלעטׄימה אלגלילה אלטׄאהרה, ותעדׄרון פי אטראח אלקיאס ואלנטׄר אלעקלי.

95קאל אלחבר, ואעודׄ באללה מן אלמחאל ומא ינפיה אלעקל ויצׄעה מחאלא, ואול אלעשר כלמאת הו אלאמר באעתקאד אלרבוביה. ואלתׄאני מן אלכלמאת הי אלנהי ען אתכׄאדׄ אלאה דון אללה תעׄ, וען אלאשראך בה, ואלנהי ען אלתשביה ואלתמתׄיל ואלתכׄייל, ובאלגמלה ען אלתגסים, וכיף לא ננזהה ען אלתגסים ונחן ננזה כתׄירא מן מכׄלוקאתה ען דׄלך, כאלנפס אלנאטקה אלתי הי אלאנסאן עלי אלחקיקה. פאן אלדׄי יכׄאטבנא מן מוסי ויעקל וידבר, ליס דׄלך לסאנה ולא קלבה ולא דמאגׄה, בל הדׄה אלאת למוסי. ומוסי נפס נאטקה ממיזה ליסת גסמא ולא תתחיז פי מכאן ולא יצׄיק ענהא מכאן ולא תצׄיק הי ען אן תחצל פיהא צור גמיע אלמכׄלוקאת פנצפהא באוצאף מלכותיה רוחאניה, פצׄלא ען כׄאלק אלכל, ואנמא עלינא אן לא נדפע מא תואתר מן דׄלך אלמשהד, תׄם נקול לא נדרי כיף נגסם אלמעני חתי צאר כלאמא וקרע אדׄאננא, ולא מא אכׄתרע לה תעׄ ממא לם יכן מוגודא, ולא מא סכׄר לה מן אלמוגודאת אדׄ לא תעגזה קדרה כמא נקול אנה תעׄ כׄלק אללוחין וכתבהמא כתב נקש כמא כׄלק אלסמא ואלכואכב במשייתה פקט, שא אללה תעׄ פתגסם באלמקדאר אלדׄי שא, ועלי אלהיאה אלתי שא, ואנתקש פיהא אלכׄט באלעשר כלמאת, כמא נקול אנה שק אלבחר, וצירה אסוארא ואקפה ען ימין אלקום וען שמאלהם, ואזקה מרתבה ואסעה, וארצׄא וטיה ימשון פיהא דון תכלף ולא תכׄלף, ודׄלך אלשק ואלבניאן ואלאתקאן מנסוב אליה תעׄ, לם יחתג פיה אלי אלה ואסבאב מתוסטה כמא יחתאג פי פעל אלמכׄלוקין, פאן אלמא וקף לאמרה ותשכל במשיתה, הכדׄא יתשכל אלהוא אלואצל אלי אדׄן אלנבי באשכאל אלחרוף אלתי תקתצׄי אלמעאני אלתי יריד אללה אן יסמעהא אלנבי ואלגמהור.

96קאל אלכׄזרי, הדׄא תוגיה מקנע.

97קאל אלחבר, ולסת אגזם אן אלאמר עלי הדׄה אלצפה, ולעלה עלי טריק אגׄמץׄ מן אן אתכׄילהא, לכן אלחאצל מן הדׄא תחקק מן שאהד אלמשאהד אן אלאמר מן קבל אלכׄאלק דון ואסטה, אדׄ הי ממאתׄלה ללאכׄתראע אלאול ואלכׄלקה אלאולי, פיחצל פי אלנפוס אלאימאן באלשרע אלמקתרן בהא, מע אלאימאן באן אלעאלם חאדתׄ הכדׄא כׄלקה, כמא תרון אנה אכׄתרע אללוחין ואלמן וגׄיר דׄלך, ותזול מן נפס אלמומן שכוך אלפלאספה ואלדהריה.

98קאל אלכׄזרי, אנטׄר יא חבר לא תצחבך הואדה פי וצף מחאמד קומך, ותתרך משהור עציאנהם מע הדׄה אלמשאהד, פאני סמעת אן פי אתׄנא הדׄא אתכׄדׄוא עגלא ועבדוה דון אללה.

99קאל אלחבר, דׄנב שנע עליהם לגלאלתהם, ואלגליל מן עדת כׄטאיאה.

100קאל אלכׄזרי, והדׄא מן תעצבך ותעספך לקומך, ואי דׄנב אעטׄם מן הדׄא, ואי פצׄל יבקי בעד הדׄא.

101קאל אלחבר, אמהלני קלילא חתי אקרר ענדך שרף אלקום, וכפאני שאהדא אתכׄאדׄ אללה איאהם חזבא ואמה מן בין מלל אלעאלם, וחלול אלאמר אלאלאהי פי גמהורהם חתי וצל גמיעהם אלי חד אלכׄטאב, ותכׄטי אלאמר אלי נסאיהם פכאן מנהן נביאת, בעד אן כאן אלאמר לא יחל אלא פי אפראד מן אלנאס מן לדן אדם, פאן אדם הו אלכאמל דון אסתתׄנא, אדׄ לא עדׄר פי כמאל צנאעה מן צנאע חכים קאדר, מן מאדה אכׄתארהא ללצורה אלתי שאהא, ולם יעק עאיק מן מזג מני אלאב ודם אלאם, ולא מן אלאגׄדׄיה ואלתדביר פי סני אלתרביה ואלטפולה ואתׄר אלאהויה ואלמיאה ואלארצׄין, אדׄ אנמא כׄלקה כאלמתנאהי פי אלשבאב אלכאמל פי כׄלקה ואכׄלאקה, פהו אלדׄי קבל אלנפס עלי כמאלהא ואלעקל עלי גׄאיהׄ מא ימכן מן אלפטרה אלאנסאניה ואלקוה אלאלאהיה בעד אלעקל, אעני אלרתבה אלתי בהא יתצל באללה ובאלרוחאניין, ויערף אלחקאיק דון תעלים בל באהון פכרה. וקד תסמי ענדנא באבן אללה, הו וכל מן ישבהה מן דׄריתה אבנא אללה, ואולד אולאדא כתׄירה ולא יצלח מנהם ליכון כׄליפה אדם גׄיר הֶבֶל לאנה כאן ישבהה, ולמא קתלה קין אכׄוה גׄירה עלי הדׄה אלרתבה עוץׄ בשֵת אלשביה באדם, פכאן צפותה ולבאבה, וגׄירה כאלקשור ואלחשף. וצפוהׄ שת אנוש. וכדׄלך אתצל אלאמר אלי נוח באפראד כאנוא לבאבא ישבהון אדם ויתסמון באבנא אללה, להם אלכמאל פי אלכׄלק ואלאכׄלאק וטול אלאעמאר ועלום וקדרה, ובאעמארהם הו אלתאריךׄ מן אדם אלי נוח, וכדׄלך מן נוח אלי אברהים. ורבמא כאן פיהם מן לם יתצל בה אלאמר אלאלאהי מתׄלתֶּרַח, לכן כאן אברהים אבנהתַּלְמִידלגדהעֵבֶר. נעם ואדרך נוח בעינה. וצאר אלאמר אלאלאהי מתצלא מן אלאגדאד אלי אלחפדה. פאברהים צפוהׄעֵבֶרותלמידׄה ובדׄלך תסמי עבראניא. ועֵבֶרצפוהׄשֵם. ושֵםצפוהׄ נוח, לאנה וארתׄ אלאקאלים אלמעתדלה אלתי וסטהא ונכתתהא אלשאם ארץׄ אלנבוה. וכׄרגיֶפֶתאלי אלשמאל. וחָםאלי אלגנוב. וצפוהׄ אברהים מן גמיע בניה אסחק. וקד אבעד גמיע אולאדה מן הדׄה אלארץׄ אלכׄאצה לתכׄתץ לאסחק. וצפוהׄ אסחאק יעקוב. ואנדפע אכׄוה אלעיס, אדׄ אסתחק יעקוב תלך אלארץׄ ואולאד יעקוב כלהם צפוה, צלח גמיעהם ללאמר אלאלאהי, פחצל להם דׄלך אלמוצׄע אלכׄאץ באלאמר אלאלאהי, והדׄא אבתדא חלול אלאמר אלאלאהי פי גמאעה, בעד אן כאן לא יוגד אלא פי אפראד, פתולי אללה חפטׄהם ואנמאהם ותרביתהם במצר כמא תרבי אלשגרה אלטיבהׄ אלאצל חתי אתׄמרת תׄמרא כאמלא ישבה אלתׄמר אלאול אלדׄי מנה גׄרסת אעני אברהים ואסחק ויעקוב ויוסף ואכׄותה. פגאת אלתׄמרה במוסי עׄהׄ והרון ומרים עׄהׄ, ובמתׄלבְּצַלְאֵלואָהֳלִיאָבורוסא אלאסבאט, ובמתׄל אלסבעין שיכׄא אלדׄין צלחוא ללנבוה מסתמרא, ובמתׄל יושע וכלב וחור וגירהם כתׄיר. וחינידׄ אסתחקוא טׄהור אלנור עליהם ותלך אלענאיה אלרבאניה, ואן כאן פיהם עצאה ממקותון, לכנהם לא מחאלה צפוה במעני אנהם פי גׄריזתהם וטבאיעהם מן אלצפוה, ויולדון מן יכון צפוה פיחאפטׄ עלי אלאב אלעאצי למא כׄאלטה מן אלצפוה אלתי תטׄהר פי ולדה או פי חפידה, כיף מא צפת אלנטפה כמא קלנא פיתֶּרַחוגׄירה ממן לם יתצל בה אלאמר אלאלאהי לכן פי גׄריזתה אן ינתג צפוה מא לם יכן מתׄל דׄלך פי גׄריזה כל מן תנאסל מן חָם ויֶפֶת. ונרי מתׄל הדׄא פי אלאמור אלטביעיה, פכם אנסאן לא ישבה אבאה בתה לכנה ישבה גדה. פלא שך אן תלך אלטביעה ודׄלך אלשבה כאן פי אלואלד כאמנא, ואן לם יטׄהר ללחס, כמא כמנת טביעהׄעֵבֶר פי אולאדה חתי טׄהרת פי אברהים.

102קאל אלכׄזרי, הדׄא הו חק אלשרף אלמנסאק מן לדן אדם, וקד כאן אדם אשרף אלמכׄלוקאת פי אלארץׄ, פוגב לכם אלשרף עלי כל מוגוד פי אלארץׄ. לכן אין הדׄא אלשרף מן הדׄא אלכׄטא.

103קאל אלחבר, אן אלאמם כלהא חינידׄ כאנת תתכׄדׄ מעבודאת צורא ולו כאנוא אלפלאספה יברהנון עלי אלוחדאניה ואלרבוביה פלא בד להם מן צורה יומונהא, ויקולון לעאמתהם וגמהורהם אן הדׄה אלצורה יתצל בהא אמר אלאהי, ואנהא כׄאצה באמר עגיב גׄריב, פמנהם מן ינסב דׄלך אלי אללה כמא נפעל נחן אליום פי מואצׄע מעטׄמה ענדנא, חתי נתבארך בתראבהא וחגארתהא. ומנהם מן ינסב דׄלך אלי רוחאניהׄ כוכב מן אלכואכב, או ברג, או נסבה טלאסם וגׄיר דׄלך. וכאן לא יתאלף גמהור עלי שרע ואחד אלא בצורה מחסוסה אמוהא. וכאן בנו אסראיל קד ועדוא באן ינזל אליהם מן ענד אללה אמר ירונה ויומונה, כמא אמוא עמוד אלגמאם ואלנאר חין כׄרוגהם מן מצר, וישרון אליה ויעטׄמונה ויסתקבלונה ויסגדון נחוה ללה תעׄ. וכדׄלך כאנוא יומון עמוד אלגׄמאם אלדׄי ינזל עלי מוסי עׄהׄ טול מכׄאטבהׄ אללה לה פיקפון בנו אסראיל ויסגדון נחוה ללה תעׄ. פלמא סמע אלקום כׄטאב אלעשר כלמאת וצעד מוסי עׄהׄ אלי אלגבל ינתטׄר אללוחין לינזלהא אליהם מכתובה, ויצנע להא אלתאבות, פיכון להם קבלה מראיה פיהא אלעהד אלאלהי ואלאכׄתראע אלרבאני, אעני אללוחין, סוי מא אתצל באלתאבות מן אלגׄמאם ואלאנואר, ומא טׄהר בתוסטה מן אלמעגזאת, ובקי אלקום מנתטׄרין נזול מוסי עׄהׄ והם עלי חאלהם, לם יגׄירו זיהם וחאלהם וחללהם אלתי עידוא בהא יום אלטור, בל בקוא בהיתהם ינתטׄרון מוסי עׄהׄ מע אללחטׄאת, פאבטא ענהם ארבעין יומא והם לם יתזוד, ולא פארקהם אלא עלי ניהׄ אלאנצראף מן יומה, גׄלב סו טׄן עלי בעץׄ דׄלך אלגמהור אלעטׄים ובדאת אלעאמה תפתרק פרקא, ותכתׄר אלארא ואלטׄנון, חתי לגא קום מנהם אלי אן טלבוא מעבודא יומונה כסאיר אלאמם, מן גׄיר אן יגחדוא רבוביהׄ מן אכׄרגהם מן ארץׄ מצר, בל אן יכון דׄלך מוצׄועא להם ישירון אליה אדׄא וצפוא עגאיב רבהם כמא פעל אלמומנון בתאבות מוסי עׄהׄ קאילין אן אלרב הנאך, וכמא נפעל נחן באלסמא ובכל אמר נתחקק אן חרכתה אנמא הי במשיהׄ אללה דון אתפאק ולא אראדהׄ אנסאן ולא טביעה, פכׄטאהם כאן פי אלתצויר אלדׄי מנעוא ענה, תׄם פי אן נסבוא אמרא אלאהיא לשי מצנוע באידיהם ואכׄתיארהם דון אמר אללה, ועדׄרהם פי דׄלך מא תקדם מן אלתשתת אלואקע בינהם, ולם ינתה אלדׄין עבדוה נחו תׄלאתׄהׄ אלאף מן גמלה סת מאיהׄ אלף. ואמא עדׄר אלכׄאצה אלמסאעדין פי עמלה, פכאן לגׄרץׄ עסי אן יטׄהר אלעאצי מן אלמומן, ליקתל אלעאצי אלעאבד ללעגל, וכאן פי דׄלך עליהם נקד אדׄ אכׄרגוא אלעציאן מן אלקוה ואלצׄמיר אלי חד אלפעל. פלם יכן דׄלך אלדׄנב כׄרוגא ען גמלה טאעהׄ מן אכׄרגהם מן מצר, לכן כׄאלפוא לבעץׄ אואמרה, פאנה תעׄ נהי ען אלצור, פאתכׄדׄוא צורה, וכאן להם אן יצברוא ולא יצׄעוא לאנפסהם קדוה וקבלה ומדׄבחא וקראבין. וכאן דׄלך מן תעקל מן כאן בינהם מן אלמנגמין ואלמטלסמין, זעמוא אנהם סתקרב אעמאלהם אלקיאסיה מן אעמאל אלחקיקה, וכאן סבילהם פי דׄלך סביל אלגאהל אלדׄי דׄכרנאה אנה תולי כׄזאנהׄ אלטב פקתל אלנאס אלדׄין כאנוא ינתפעון בהא קבל דׄלך, מע אן אלקום לם יכן קצדהם אלכׄרוג ען אלטאעה, בל כאנוא מגתהדין בזעמהם פי אלטאעה, ולדׄלך קצדוא הרון, וקצד הרון כשף סרירתהם, פסאעד פי עמלה, ואדרכתה אלמלאמה לאכׄראגה עציאנהם מן אלקוה אלי אלפעל. פהדׄה אלקצה תהול ותשנע ענדנא לארתפאע אלמעבודאת אלמצורה מן אכתׄר אלמלל פי זמאננא הדׄא, ותהון פי דׄלך אלוקת לכון גמיע אלמלל מתכׄדׄין צורא. פלו כאן דׄנבהם אנהם אתכׄדׄוא ביתא מא באכׄתיארהם ללעבאדה, וגעלוה קבלתהם וקרבוא פיה ועטׄמוה, למא עטׄם אלאמר למא נחן עליה אליום מן אתכׄאדׄנא אלביות באכׄתיארנא ותעטׄימנא להא ותברכנא בהא ורבמא קלנא אן אללה יחלהא ומלאיכתה תחף בהא. ולולא אלצׄרורה לתאליף גמאעתנא לכאן הדׄא מנכרא, כמא כאן פי איאם אלדולה ינכר עלי קום מגתהדין אן יתכׄדׄוא ביותא ללעבאדה תסמי בָּמוֹת, וכאן פצׄלא אלמלוך יהדמונהא כי לא יעטׄם גׄיר אלבית אלדׄי יכׄתארה אללה ואלהיה אלתי יאמר בהא ולא ינכר פיהא אלצור אלתי יאמר הו בהא מן אלכרובין, ומע הדׄא פקד חל אלעקאב באלדׄין עבדוא אלעגל מן יומהם וקתלוא, וכאן מבלגׄ עדדהם נחו תׄלאתׄהׄ אלאף מן גמלה סת מאיהׄ אלף. ולם יזל אלמן נאזלא לקותהם, ואלגׄמאם ללתטׄליל עליהם, ועמוד אלנאר להדאיתהם, ואלנבוה פאשיה מתזאידה פיהם. ולא צרף ענהם שי פצׄלוא בה גׄיר אללוחין אללדׄין כסרהמא מוסי עׄהׄ, תׄם שפע פי צרפהמא פצרפא עליהם וגׄפר להם דׄלך אלדׄנב.

104קאל אלכׄזרי, לקד אידת ראיי פימא אעתקדתה ומא ראית פי מנאמי אנה לא יצל אלאנסאן אלי אלאמר אלאלאהי אלא באמר אלאהי, אעני באעמאל יאמר אללה בהא ואלא פאכתׄר אלנאס מגתהד חתי אלמנגם ואלמטלסם ועאבד אלנאר ועאבד אלשמס ואלתׄנויה וגׄירהם.

105קאל אלחבר, נעם וכדׄלך הי שראיענא מנצוצה פי אלתוראה מן מכׄאטבהׄ אללה למוסי, וממא כתב מוסי ודפע אלי דׄלך אלגמהור אלעטׄים פי גמעהם פי אלתיה, לם יחתג פיה אלי רואיהׄ אסנאד אפראד סורה סורה ואיה איה, אן צפאת אלקראבין, וכיף תקרב, ופי אי מוצׄע, ולאי גהה, וכיף תדׄבח, וכיף יצנע בדמהא, ואעצׄאיהא מן צנאעאת מכׄתלפה, כלהא בביאן מן ענד אללה, כי לא ינקץ מנהא אקל שי פיפסד אלכל, כאלאכואן אלטביעיה אלתי תאתלף מן נסב דקיקה תדק ען אלאוהאם, אלתי לו אכׄתלת נסבהא אקל אכׄתלאל לפסד דׄלך אלמתכון. פלם יכן דׄלך אלנבאת או דׄלך אלחיואן או דׄלך אלעצׄו מתׄלא אלא פאסדא או עאדמא. וכדׄלך דׄכר כיף יעצׄי אלחיואן אלמקרב, ומא יפעל בעצׄו עצׄו, ומא ללאכל, ומא ללחרק, ומן יאכל ומן יחרק ומן יקרב מן טואיף מאמורה בהם לם יתעדהם, וכיף תכון צפאת אלמקרבין כי לא תכון פיהם נקיצה, חתי היאתהם ומלאבסהם, לא סימא אלהארוני אלדׄי אבאח לה אלדכׄול אלי מכאן אלאמר אלאלאהי חיתׄ אלסכינה מע אלתאבות ואלתוראה, ומא יקתרן בדׄלך מן אלתנטיף ואלתטהיר, ורתב אלתטהיראת ואלתקדיסאת ואלצלואת אמר יטול וצפה. ואנמא יחאל פיה עלי קראהׄ אלתוראה, ומא נקל אלאחבאר, ואלכל מן תכלים אללה למוסי. וכדׄלך הייהׄ אלקבה כלהא ערצׄת עלי מוסי פי אלטור אלקבה ואלכׄבא ואלמאידה ואלמנארה ואלתאבות ואלדאר אלמחיטה בהא, ואעמדתהא וסתורהא וגמיע צנאעתהא ערצׄת עליה רוחאניה ושכלהא גסמאניה עלי מא רסם לה. וכדׄלך אלבית אלמעטׄם אלדׄי בנאה סלימאן ממא ערץׄ עלי דאוד צורתה רוחאניה. ואלבית אלמובד אלמקדס אלדׄי ועדנא בה ממא ערץׄ עלי נבי יסמי יחזקאל, אלצורה ואלהייה. וליס פי עבאדה אללה תפרץׄ ותעקל ותחכם, ולו כאן הדׄא לכאנת אלפלאספה קד וצלת בחכמהם ועקולהם אלי אצׄעאף מה וצל אליה בנו אסראיל.

106קאל אלכׄזרי, במתׄל הדׄא תטיב אלנפס ללתשרע בה דון שך ולא ארתיאב מגי נבי אלי עביד מסתעבדין ממאליך יעדהם באלכׄרוג מן אלעבודיה מן וקתהם דון תואן ומטל עלי תלך אלצפה, ואדכׄאלהם ארץׄ אלשאם עלי סבע אמם כל ואחדה מנהא אקוי מנהם, וירסם לכל סבט נציבה מן אלארץׄ קבל וצולהם אליהא. ותם הדׄא כלה פי איסר מדה בגׄראיב מן אלמעגזאת, הדׄא יחקק עטׄאמה אלמרסל וגלאלהׄ אלרסול, ופצׄל אלמרסול אליהם כׄצוצא. ולו קאל אני בעתׄת לאהדי גמיע אלמעמורה, תׄם לם יתצל כׄברה פי נצפהא לכאן קדחא פי רסאלתה אדׄ לם יתם קצד אללה פי דׄלך, וכאן יעדׄר תמאמה כון כתאבה עבראניא ויכלף אלסנד ואלהנד ואלכׄזר פהמה ואלעמל בה אלא בעד מיין סנין אן יתפק להם אלאסתחאלה אליהם בגׄלבה, או במגאורה, לא במשאהדהׄ אלנבי בעינה, או נבי אכׄר ישהד לה ויוכד שריעתה.

107קאל אלחבר, לם ידע מוסי אלי שריעתה גׄיר קומה ואהל לסאנה, וועדהם אללה תאכיד שרעה מע אלאיאם באנביא, פפעל טול זמאן אלרצׄא וחלול אלסכינה.

108קאל אלכׄזרי, והלא כאנת אלהדאיה ללכל ודׄלך פי אלחכמה לאיק.

109קאל אלחבר, אוליס אלאולי אן יכון אלחיואן כלה נאטקא, אדׄא קד נסית מא תקדם פי נסק נסל אדם ואטראד חלול אלאמר אלאלאהי אלנבוי פי שכׄץ לבאב אלאכׄוה וצפוה אלאב קאבל לדׄלך אלנור, וגירה כאלקשור לא יקבלה, חתי גא בנו יעקוב צפוה ולבאבא יפארקון בני אדם בכׄצוציה אלאהיה תגעלהם כאנהם נוע אכׄר וגוהר אכׄר מלאיכי יטלב כלהם דרגהׄ אלנבוה פיטׄפר אלכתׄיר מנהם בהא, ומן לם יטׄפר מנהם בהא קארבהא באלאעמאל אלמרצׄיה ואלתקדיס ואלתטהיר ולקא אלאנביא. ואעלם אן מן ילקי נביא פאנה חין לקאיה לה וסמעה כלמאתה אלאלאהיה תחדתׄ לה רוחאניה, ויפארק גנסה בצפא אלנפס ותשוקהא אלי תלך אלדרגאת, ואלתזאם אלכׄשוע ואלטהארה, והדׄה כאנת ענדהם אלדלאלה אלטׄאהרה ואלאיה אלבאהרה אלקאהרה פי תׄואב אלאכׄרה, אדׄ אלמטלוב מנהא אנמא הו אן תציר נפס אלאנסאן אלאהיה, תפארק חואסה ותשאהד אלעאלם אלאעלי, ותלתדׄ ברויהׄ אלנור אלמלכותי, וסמע אלנטק אלאלאהי, פאן תלך אלנפס תאמן מן אלמות אדׄא פנית אלאתהא אלגסדיה, פאדׄא וגדת שריעה יוצל בעלומהא ועמלהא אלי הדׄה אלדרגה פי אלמוצׄע אלדׄי חדת, ומע אלקראין אלתי אמרת, פהי לא מחאלה אלשריעה אלמותׄוקה באבקא אלנפוס בעד פנא אלאגסאד.

110קאל אלכׄזרי, אן מואעד גׄירכם אמתן ואסמן מן מואעדכם.

111קאל אלחבר, לכנהא כלהא בעד אלמות, וליס פי אלחיאה מנהא שי, ולא שי ידל עליהא.

112קאל אלכׄזרי, נעם ולא ראית אחדא מן אלמעתקדין לתלך אלמואעד יחב אסתעגאלהא, בל לו אמכנה מטלהא ותאכׄירהא אלף אעואם, ויבקי פי קיד אלחיאה להדׄה אלשקוה ואלאנכאד אלדניאויה לאכׄתארהא.

113קאל אלחבר, פמא טׄנך במן ישאהד אלמשאהד אלעטׄימה אלמלכותיה.

114קאל אלכׄזרי, אנה לא שך יתמני אן תתמאדי נפסה עלי מפארקה חואסה ותבקי מלדׄתה בדׄלך אלנור, ודׄאך הו אלדׄי יתמני אלמות.

115קאל אלחבר, לכן מואעדנא אתצאלנא באלאמר אלאלאהי באלנבוה ומא יקרבהא, ואתצאל אלאמר אלאלאהי בנא באלענאיאת ואלכראמאת ואלמעגזאת, פלדׄלך לא יתכרר פי אלתוראה אנכם אן עמלתם הדׄה אלשריעה אעידכם בעד אלמות אלי גנאת ולדׄאת, לכנה יקול אנכם תכונון לי כׄאצה ואכון לכם אלאהא מדברא לכם, פיכון מנכם מן ידכׄל חצׄרתי ויצעד אלי אלסמא כאלדׄין כאנוא באנפסהם יתצרפון בין אלמלאיכה, ויכון איצׄא מלאיכתי יתצרפון פי מא בינהם פי אלארץׄ, ותרונהם אפראדא ואגנאדא יחרסונכם ויחארבון דונכם, וידום בקאכם פי אלארץׄ אלתי תעין עלי הדׄה אלדרגה, והי אלארץׄ אלמקדסה, ויתעלק כׄצבהא וגדבהא וכׄירהא ושרהא באלאמר אלאלאהי בחסב אעמאלכם, פיכון אלעאלם יגרי אמרה מגרי טביעיא חאשאכם, באנכם סתשאהדון מע חלול אלסכינה בינכם מן כׄצב בלאדכם ואנתטׄאם אמטארכם לא תתעדי אוקאתהא אלמחתאג אליהא, וטׄפרכם בעדוכם דון אעתדאד, מא תדרון בה אן אמרכם ליס יגרי עלי קאנון טביעי, לכם אראדי, כמא סתרון אן כׄאלפתם מן אלגדב ואלקחט ואלמותאן ואלחיואן אלמהלך, ואלדניא כלהא פי דעה, פתעלמון איצקא אן אמרכם ידברה אמר ארפע מן אלאמר אלטביעי, וכאן דׄלך כלה, פהדׄה שריעה מצׄמונהׄ אלמואעד, לא יכׄאף כׄלאפהא. ומואעד תלך אלשראיע כלהא ליסת מצׄמונה אדׄ היא בעד אלמות, ומואעדנא כלהא יעמהא אצל ואחד והו רגא אלקרב מן אלרב ומלאיכתה, פלא יכׄאף מן וצל תלך אלרתבה תלאפא. פהדׄה אלשריעה קד ערצׄת עלינא עיאנא, ומתׄלנא מתׄל אצחאב מתראפקין מתלאזמין פי מפאזה מן אלארץׄ, סאפר ואחד מנהם אלי אלהנד, וואפק מן מלך אלהנד תכרימא ותעטׄימא למא ערף ענה מן אולאיך אלאצחאב, וכאן יערף אבאהם קדימא וכאנוא אוליאה, פאעטאה דׄכׄאיר חמלהא לאצחאבה. וכסאה חללא, וארסל מעה מן חאשיתה קומא לם יכן פי אלטׄן אנהם סיכׄרגון מן חצׄרהׄ אלמלך ולא אן ינזלוא אלי תלך אלבאדיה, ואמרה באואמר ועהוד מן קבול טאעתה. פגא עלי אצחאבה מע אולאיך אלרסל אלהנדיין, פרחב בהם האולא אלאצחאב, וגדוא פי כׄדמתהם וכראמתהם, ובנוא להם קצרא סכנוהם פיה, וצארוא האולא אלאצחאב יתוסלון ללוצול אלי אלהנד ואלי רויה אלמלך באדון סעי בענאיה האולא אלרסל אלדׄין כאנוא יהדונהם אלי אלטריק אלאקצר ואלארשד, וערף גמיעהם אן מן שא אלוצול אלי אלהנד פאן דׄלך סהל עליה אדׄא אלתזם טאעה אלמלך וכראמה רסלה אלמוצלין לה אליה, פלם יחתאגוא אן יסאלוא למא דׄא נתכלף הדׄה אלטאעה, אדׄ אלעלה טׄאהרה עיאנא ליתצל באלמלך. ואלאתצאל בה הי אלסעאדה. פאלאצחאב הם בנו אסראיל. ואלמסאפר אלאול הו מוסי. ואלמסאפרון אלאכׄר סאיר אלאנביא, ואלרסל אלהנדיון אלסכינה ואלמלאיכה, ואלחלל אלנור אלמעקול אלדׄי חל נפסה באלנבוה, ואלנור אלמחסוס אלדׄי חל וגהה, ואלדׄכׄאיר אלמרסולה אללוחאן באלעשר כלמאת. ותלך אלנואמיס אלאכׄר לם ירוא שיא מן הדׄא, לכן קיל להם אלתזמוא טאעה מלך אלהנד כמא אלתזמהא אולאיך אלאצחאב, וסתתצלון באלמלך בעד אלמות. ואלא פסיבעדכם ויעדׄבכם בעד אלמות. פמנהם מן קאל מא גאנא אחד יכׄבר אנה פי גנה מדׄ מאת או פי נאר. ואלאכתׄר אתׄרוא אנתטׄאם חאלהם ואגתמאע כלמתהם, ואלתזמוא תלך אלטאעה ואטמעוא אנפסהם פי אלבאטן אטמאעא קויא מחקקא מתפוקין מסתטׄהרין עלי עאמתהם באלאימאן, פכיף יתטׄאהר האולא בדעוי מא יחצל להם בעד אלמות עלי אלדׄין יחצל להם דׄלך פי חיאתהם, אליס טביעהׄ אלאנביא ואלאוליא אקרב אלי אלבקא אלאבדי מן טביעה מן לם יקרב מן הדׄה אלדרגה.

116קאל אלכׄזרי, לקד יבעד ען אלקיאס אן יכון אלאנסאן תארהא בטבעה תאלפא גסדה ונפסה כאלבהאים, חאשי אלפלאספה עלי ראיהם. תׄם יקול אהל אלאדיאן אנה יציר חיא ללאבד פי נעים בכלמה יקולהא בפמה, ורבמא לם ידר טול עמרה גׄיר תלך אלכלמה ורבמא לם יפהם מענאהא, אן כלמה תנקל מן דרגה אלבהאים אלי דרגה אלמלאיכה לעטׄים, ומן לם יקל תלך אלכלמה יציר בהימה, אולו כאן פילסופא עאלמה עאבדא טול דהרה שוקא אלי אללה תעׄ.

117קאל אלחבר, נחן לא נסלב אחדא גזא פצׄילתה ענד אללה כׄאצה מן אי אמה כאן. לכן נרי אלפצׄל אלאתם ללקום אלמקרבין פי חיאתהם, פננסב דרגאתהם ענד אללה בעד ממאתהם תלך אלנסבה.

118קאל אלכׄזרי, ואלזם הדׄא אלמתׄל פי אלעכס ואנסב דרגתהם פי אלאכׄרה בדרגתהם פי אלדניא.

119קאל אלחבר, אראך תעירנא באלדׄלה ואלמסכנה. ובהמא יתפאכׄר אפצׄל הדׄה אלמלל, והל יסתטׄהרון אלא במן קאל מן לטם כׄדך אלאימן אעטה אלאיסר, ומן אכׄדׄ רדאך אעטה קמיצך, ווצל ואצחאבה ושיעתה מיין מן אלסנין מן אלהואן ואלצׄרב ואלקתל אלי אלחדוד אלמשהורה ענדהם. ואולאיך הם אלפכׄר. וכדׄלך צאחב שרע אלאסלאם וצחאבתה חתי טׄהרוא וטׄפרוא. ובאולאיך יפתכׄר ויסתטׄהר. לא בהאולא אלמלוך אלדׄין עטׄם שאנהם ואתסע מכאנתהם וגלטׄ חגאבהם והאל מרכבהם, פנסבתנא מן אללה אקרב מנהא לו כאן לנא טׄהור פי אלדניא.

120קאל אלכׄזרי, דׄלך כדׄלך לו כאן תואצׄעכם אכׄתיארא, לכנה אצׄטרארא, ואדׄא אצבתם אלטׄפרה קתלתם.

121קאל אלחבר, אצבת מקתלי יא מלך אלכׄזר, נעם לו כאן אכתׄרנא כמא תקול ילזם אלדׄל כׄצׄועא ללה ולשריעתה למא אהמלנא אלאמר אלאלאהי הדׄה אלמדה אלמדידה, לכן אקלנא עלי הדׄא אלראי, וללאכתׄר אגר לאנה יחמל אלדׄל בין אצׄטראר ואכׄתיאר, לאנה לו שא לצאר צאחבא וכפיא למן ידׄלה בכלמה יקולהא דון מונה, ומתׄל הדׄא לא יצׄיע ענד אלחאכם אלעדל, פלו חמלנא הדׄא אלגלא ואלבלא פי דׄאת אללה עלי מא יגב לכנא פכׄרא ללגיל אלמנתטׄר מע אלמסיח, פכנא נקרב אלאגל ללפרקאן אלמנתטׄר, ונחן לא נסאוי מע נפוסנא כל מן דכׄל פי דיננא בכלמה פקט, בל באעמאל פיהא שק עלי אלנפס מן תטהיר ותעלים ואכׄתתאן ואעמאל שרעיה כתׄירה, ואלאחרי אן יסיר סירתנא. ומן שראיט אלאכׄתתאן ואסבאבה אן יתדׄכר דאימא אנהא עלאמה אלאהיה שרעהא אללה פי אלהׄ אלשהוה אלגׄאלבה לתציר מגׄלובה, פלא תצרף אלא כמא ינבגׄי, פי וצׄע אלבזר חיתׄ ינבגׄי, פי אלוקת אלדׄי ינבגׄי, עלי מא ינבגי, עסי אן יכון בזרא נאגבא יצלח לקבול אלאמר אלאלאהי, ומן לזם הדׄא אלטריק פקד חצל לה ולנסלה גז צאלח מן אלקרב אלי אלאלאה. ומע הדׄא לא יסתוי אלדכׄיל פי דין אסראיל מע אלצריח, אדׄ אלצרחא כׄאצה אהל ללנבוה. וגׄירהם גׄאיתהם אלאקתבאס מנהם, ואן יצירוא אוליא עלמא לא אנביא. ואמא תלך אלמואעד אלתי אעגבתך פקד תקדם אחבארנא ברסם אלגנה וגהנם, וכאלוהא טולא וערצׄא, ווצפוא אלנעים ואלעדׄאב באכתׄר אסתקצא מן וצף אלמלל אלקריבה. ואנמא כלמתך מנדׄ אקבלת עלי מא גא פי נצוץ כלאם אלאנביא, פאנה לא יכתׄר פיהא מואעד אלאכׄרה בפציח כמא כתׄר פי כלאם אלאחבאר. נעם אן פי כלאם אלנבוה רגוע אלתראב מן גסד אלאנסאן אלי אלתראב, ורגוע אלרוח אלי אלכׄאלק אלדׄי והבהא, ופי כלאם אלנבוה אחיא אלמותי פי אלמסתאנף ובעתׄה נבי יסמי אליהו (אלכׄצר) קד בעתׄ פי מא מצׄי ורפעה אללה כמא רפע גירה. וקיל אנה לם ידׄק מותא. ופי אלתוראה דעא מן תנבא באדׄן אללה ודעא לנפסה באן תכון מיתתה סהלה ואן אכׄרתה כאכׄרהׄ בני אסראיל. וקד סאל בעץׄ אלמלוך והו טאלות לסמויל נביא מיתא, פתנבא לה בכל מא יגרי עליה כמא כאן יתנבא לה פי חיאתה, ואן כאן פעל הדׄא אלמלך מנכרא פי שריעתנא אעני מסאילהׄ אלמותי, פאנה ידל עלי אלקום כאנוא יעתקדון פי איאם אלאנביא אן אלאנפס באקיה בעד פנא אלאגסאד ולדׄלך יסאלון אלמית. ופאתחהׄ צלאתנא אלתי לם יכׄל מן חפטׄהא אלנסא, פצׄלא ען אלכׄאצה, יא רבי אן אלרוח אלתי נפכׄתהא פי מקדסה אנת כׄאלקהא ואנת חאפטׄהא ואנת אכׄדׄהא מני ואנת צארפהא עלי פי אלאכׄרה, פמהמא צחבתני אחמדך ואשכרך יא רב אלעאלמין, פסבחאנך יא מן ירד אלרוח פי אלאגסאד אלמיתה. ואלגנה בעינהא אלדׄי יכתׄר אלנאס דׄכרהא, אנמא אכׄדׄת מן אלתוראה, והי אלרתבה אלתי אעדת לאדם, לו לם יעץ לבקי פיהא מכׄלדא. וכדׄלך גהנם אנמא הו מוצׄע משהור קריבא מן בית אלמקדס, כׄנדק לא תנטפי מנה אלנאר, תוקד פיה אלעטׄאם אלנגסה ואלגיף וסאיר אלנגאסאת, ואללפטׄה עבראניה מרכבה.

122קאל אלכׄזרי, אדׄא" פלא גדיד בעד שריעתכם גׄיר גזאיאת אכׄבאר אלגנה ואלנאר ורתבתהא, ותכריר דׄלך ואלאכתׄאר מנה.

123קאל אלחבר, נעם ולא דׄאך איצׄא גדיד, לאן אלאחבאר קד אכתׄרוא פי דׄלך, חתי אנך לא תסמע מן דׄלך שיא אלא ותגדה ללאחבאר אן טלבתה.