הכוזרי ה

1קאל אלכׄזרי, לא בד מן אלתחאמל עליך אן תסמעני כלאמא קריבא מכׄלצא פי אלאצול ואלעקאיד עלי טריקהׄ אלמתכלמין אלגדליין, ויחל לי סמאעהא כמא חל לך עלמהא, אמא לאעתקדהא, ואמא ללרד עליהא. אדׄ קד פאתתני תלך אלדרגה אלעאליה מן כׄלוץ אלאעתקאד דון בחתׄ. וקד תקדמת לי שכוך וטׄנון ומפאוצׄהׄ פלאספה ואהל מלל ואדיאן מכׄתלפה, אלאולי בי אלעלם ואלתחדׄק פי רד אלארא אלפאסדה מן אלגהל. ואנמא יגמל אלתקליד מע טיב אלנפס, ואמא מע כׄבתׄהא פאלבחתׄ אולי, לא סימה אדׄא אכׄרג אלבחתׄ אלי תחקיק דׄלך אלתקליד, פחינידׄ תגתמע ללאנסאן אלדרגתאן, אעני אלעלם ואלתקליד מעא.

2קאל אלחבר, ומן לנא בנפס צבורה גׄיר מנכׄדעה ללארא אלתי תמר בהא, מן ארא אלטביעיין ואלמנגמין ואלמטלסמין ואלסחרא ואלדהריין ואלמתפלספין וגׄירהם, פלא יצל אלי אלאימאן אלא וקד גאז עלי מראתב כתׄירה ללזנאדקה, ואלעמר קציר ואלצנאעה טוילה אלא אלאפראד יקע להם אלאימאן באלטבע ותנבו ענהם הדׄה אלארא כלהא ויקע פי נפוסהם ללחין מואצׄע אגׄלוטאתהם וארגו אנך מן אולאיך אלאפראד, פאן כאן ולא בד פלסת אסלך בך טריק אלקראיין אלדׄין ארתקוא אלי אלעלם אלאלאהי דון דרג. לכני אלכׄץ לך עיונא תעינך פי אלתצור ללהיולה אלמשתרכה תׄם אלאסתקצאת תׄם אלטביעה תׄם אלנפס תׄם אלעקל תׄם אלעלם אלאלאהי תׄם אעטי אקנאעאת פי אסתגׄנא אלנפס אלנאטקה ען אלגסד, תׄם אלמעאד, תׄם פי אלקצׄא ואלקדר בגׄאיהׄ אלאיגאז ואלאכׄתצאר. פאקול אן אלמחסוסאת אנמא אדרכנא כמיתהא וכיפיתהא בחואסנא וקצׄי אלעקל באנהא מחמולאת פי מוצׄע, ודׄאך אלמוצׄע יצעב תצורה, וכיף לנא נתצור שייא לא כמיה לה ולא כיפיה אלא אעראץׄ לא תקום באנפסהמא, ולא בד להמא מן חאמל, וסמת אלפלאספה הדׄא אלחאמל היולי, וקאלת אן אלעקל ידרכהא אדראכא נאקצא לנקצאנהא פי דׄאתהא, לאנהא ליסת מוגודה באלפעל לא תסתחק צפה מן אלצפאת, ואן כאנת באלקוה פאלצפה גמסאניה. קאל אריסטוטאליס כאנהא תסתחי מן אן תטׄהר עריאנה, פהי לא תטׄהר אלא לאבסה צורה. וקד טׄן בעץׄ אלנאס אן אלמים אלמדׄכור פי אול בראשית כנאיה ען הדׄה אלהיולי, ואן רוח אלהים מרחפת על פני המים אנמא הי אראדהׄ אללה ומשייתה אלנאפדׄה פי גמיע אגזא אלהיולי יפעל פיהא מא שא, כיף שא, מתי שא, כמא יצנע אלפכׄארי באלטינה אלתי לא צורה פיהא, וכני בעדם אלצורה ואלנטׄאם בחשך תהו ובהו. תׄם אן אלאראדה ואלחכמה אלאלאהיה אקתצׄת אדארהׄ אלפלך אלאעלי אלדׄי ידור דורה פי כל כׄדׄ סאעה, וידיר מעה גמיע אלאפלאך באן יחדתׄ פי הדׄה אלהיולי אלתי הי חשו פלך אלקמר תגׄאייר בחסב חרכאת אלאפלאך. ואולהא אחתמא אלגו אלקריב מן פלך אלקמר לקרבה מן מוצׄע אלחרכה פצאר נארא אתׄירא, והו ענד אלפלאספה אלנאר אלטביעיה לא לון להא ולא אחראק, לכנהא גסם לטיף שפאף כׄפיף סמוה פלך אלנאר, תׄם פלך אלהוא, תׄם פלך אלמא, תׄם כרה אלארץׄ אלתי הי אלמרכז, תׄקלת וגׄלטׄת לבעדהא ען מוצׄע אלחרכה. פהדׄה אלארבע ענאצר מן אמתזאגאתהא תכון אלמתכונאת.

3קאל אלכׄזרי, ואראהא ענדהם חאדתׄה באלאתפאק, כקולהם אנה אתפק למא קרב מן אלפלך גדא אן יכון נארא, ומא בעד אן יכון ארצׄא, ומא תוסט כאן בחסב אלקרב אלי אלמחיט או אלי אלמרכז אמא הוא ואמא מא.

4קאל אלחבר, בל אלצׄרורה תצׄמהם אלי אלאקראר באלחכמה פי אנפצאל גוהר ען גוהר. פאנה לם ינפצל גוהר אלנאר ען גוהר אלהוא, ואלהוא ען אלמא, ואלמא ען אלארץׄ באלאקל ואלאכתׄר ואלאשד ואלאצׄעף כל בצורה כׄאצה בכל ואחד מנהא געלת הדׄא נארא והדׄא הוא והדׄא מא והדׄא ארצׄא. ואלא פללקאיל אן יקול שחנת אלפלך כלהא ארצׄא בעצׄהא ארק ארצׄיה מן בעץׄ. וללאכׄר אן יקול בל כלהא נארא לכן כל מא אנחדר כאן אגׄלטׄ נאריה ואברד. ונחן נרי אלתקא ענצר בענצר וכל ואחד מנהא יחרז צורתה וגוהריתה, נרי אלהוא ואלמא ואלארץׄ פי מוצׄע ואחד תתמאס ולא תתשאבה חתי תסתחיל בעצקהא אלי בעץׄ באסבאב אכׄר תחילהא, פיקבל אלמא צורהׄ אלהוא, ואלהוא צורהׄ אלנאר, פחינידׄ יסתחק אלאסתקס אסם צאחבה פתמיז אלגואהר בצורהא חאשי אעראצׄהא ידעו אלפלאספה אלי אלקול באן הנאך עקלא פעאלא אלאהיא יעטי הדׄה אלצור כמא יעטי צור אלנבאת ואלחיואנאת והי כלהא מן אלארבע ענאצר. וליס תמיז אלדאליה מן אלנכׄלה באעראץׄ לכן בצור געלת גוהר הדׄא גׄיר גוהר הדׄא ואנמא ינפצל באעראץׄ דאליה מן דאליה ונכׄלה מן נכׄלה באן הדׄה מתׄלא סודא והדׄה ביצׄא והדׄא אחלי מן הדׄה והדׄה אטול ואקצר ואגׄלטׄ וארק וגׄיר דׄלך מן אלאעראץׄ. וליס פי אלצור אלגוהריה אקל ואכתׄר, פליס פרס אקל פרסיה מן אכׄר ולא אנסאן אכתׄר אנסאניה מן אכׄר. לאן חדוד אלפרסיה ואלאנסאניה חאצלה לגמיע אשכׄאצהמא. פאלפלאספה אקרוא צׄרורה באן הדׄה אלצור אנמא יעטיהא אמר אלאהי יסמונה עקל ואהב אלצור.

5קאל אלכׄזרי, הדׄא לעמרך אלאימאן אדׄא אצׄטרתנא צׄרורהׄ אלעקל אלי אלאקראר במתׄל הדׄא. פמא דעאנא אלי אלקול באלאתפאק, ולם לא נקול אן אלדׄי געל הדׄא פרסא והדׄא אנסאנא באלחכמה אלתי לא נדרך נחן תפצילהא הו אלדׄי צור אלנאר נארא ואלארץׄ ארצׄא ללחכמה אלתי ראהא תעׄ לא ללאתפאק מן קרב אלפלך או מן בעדה.

6קאל אלחבר, והדׄה אלחגה אלשריעיה וברהאנהא בנו אסראיל ומא קלב להם מן אלאעיאן ומא אכׄתרע להם מן אלאכואן ואדׄא ארתפע הדׄא אלברהאן אסתוי מעך מנאטׄרך באן אלדאליה מתׄלא אנמא נבתת הנאך במא אתפק אן יקע פי דׄלך אלמכאן בזר אלענב וצורהׄ אלבזר אנמא כאנת במא אתפק מן דוראן אלפלך נסבהׄ מא אמתזגת בהא אלענאצר אמתזאגא מא גא מנה מא תראה.

7אמר הכוזרי, ואני אדבר עמו על הגלגל העליון עצמו מה הוא שיגלגלהו, ההיה דבר ההוא במקרה אם לא, ואחרי כן אדבר עמו בערכים ההם הגלגליים והם עד אין תכלית מרוב, ואנחנו רואים צורות הצמחים והחיים יש להם תכלית, עליהם אין להוסיף ומהם אין לגרוע. והיה ראוי שתתחדשנה עם חדוש הערכים צורות ותמחינה אחרות.

8אמר החבר, היא הטענה, כל שכן עם השגתנו מהחכמה בהרבה מהם ומה הצורך אליהם כאשר התברר בספר תועלת מיני החיים לארסטו, ובספר תועלת האברים לגאלינוס וזולתם, מפלאי החכמה. וכן יתבאר בבהמת הישוב כצאן והבקר והסוסים והחמורים שהם בכבור צורך האדם אליהם, כי אין התקנה בהם שיהיו מדבריות, אבל בישוב לתועלת בני אדם. וכל מה שרמז לו דוד ע"ה באמרומה רבו מעשיך הׄנדחות טענת אפיקורוס היוני אשר היה רואה כי העולם היה במקרה.

9קאל אלכׄזרי, ואן כׄרגנא קלילא מן אלגׄרץׄ עסי אן תלכׄץ לי גׄרץׄ הדׄא אלמזמור.

10קאל אלחבר, אנה ינאסק מע מעשה בראשית אבתדא עוטה אור כשלמה ישיר אלי יהי אור ויהי אור. נוטה שמים כיריעה אלי יהי רקיע. המקרה במים ישיר אלי המים אשר מעל השמים, תׄם מא יחדתׄ פי אלגו מן אלסחאב ואלריאח ואלניראן ואלברוק ואלצואעק, ואנהא כלהא באדׄן כמא קאל כי בם ידין עמים. פעבר ען הדׄא בקולה השם עבים רכובו המהלך על כנפי רוח. עושה מלאכיו רוחות משרתיו אש לוהט. יעני אנהא רסלהׄ חיתׄ שא במא שא. וכל דׄלך מתעלק באלרקיע. תׄם אנתקל אלי יקוו המים ותראה היבשה בקולה יסד ארץ על מכוניה ואן אלמא בטבעה מחיט פוק אלארץׄ יגׄטיהא כלהא כאלתׄוב סהלא וגבאלא כמא קאל תהום כלבוש כסיתו על הרים יעמדו מים. לכן אלקדרה ואלחכמה אכׄרגתה ען דׄלך אלטבע וחצרתה אלי אלאעמאק חיתׄ אלבחאר חתי יכון ההנא מוצׄע נשו אלחיואן וטׄהור אלחכמה פקאל מן גערתך ינוסון כנאיה ען אנחצארהא פי אלבחאר ותחת אלארץׄ, ואלי הדׄא ישיר בקולה לרוקע הארץ על המים לאנה קול יצׄאד פי אלטׄאהר לקולה תהום כלבוש כסיתו. פהדׄא בחסב טבע אלמא ודׄאך בחסב אלקדרה ואלחכמה וכמא קאל גבול שמת בל יעבורון בל ישובון לכסות הארץ וכל הדׄא מקצוד למנאפע אלחיואן כמע ידפע אלאנסאן בחילה וצנאעאתה אכתׄר מיאהׄ אלאודיה באלאסדאד וגׄיר דׄלך ליאכׄדׄ מן אלמא מקדאר חאגתה ללרחא ואלסקי וגׄיר דׄלך. כדׄלך אשאר ההנא בקולה המשלח מעינים בנחלים לתכון ישקו כל חיתו שדי אדׄא כׄלקת אלחיה ויכון עליהם עוף השמים ישכון אדׄא כׄלק אלעוף. תׄם אנתקל אלי תדשא הארץ בקולה משקה הרים מעליותיו כנאיה ען ואד יעלה מן הארץ למנאפע אדם ודׄריתה. פמא קיל מצמיח חציר לבהמה לילא יחקר באלחציר לאנה מן מנאפע אלחיואן אלאהלי בקרא וגׄנמא ודואב כני ענהא בעבודת האדם יעני אלפלאחה ליסתכׄדם הו בהא ליסתכׄרג לבאב אלנבאת לנפסה כמא קאל להוציא לחם מן הארץ נטׄיר קולה הנה נתתי לכם את כל עשב זורע זרע, יעני לבאבהא ללאנסאן וקשורהא לסאיר אלחיואן כמא קאל ולכל חית הארץ ולכל עוף השמים את כל ירק עשב לאכלה. ודׄכר אלאגׄדׄיה אלתׄלאתׄ אלתי תסתכׄרג באלפלאחה והי דגן ותירוש ויצהר. וכלהא לחם. תׄם דׄכר מנאפעהא יין ישמח לבב אנוש. תׄם שמןלהצהיל פנים משמן, ולחם אלדׄי הו אלכׄבז כׄצוצא לבב אנוש יסעד. תׄם עטף עלי מנפעהׄ נזול אלמטר ללאשגאר בקולה ישבעו עציׄ ה׳‎. ומנפעהׄ אלשגר אלעאליה ללחיואנאת כמא קאל אשר שם צפרים יקננו. כמא אן אלגבאל אלשאמכׄה מנאפע לחיואנאת אכׄר כמא קאל הרים הגבוהים ליעלים ... סלעים מחסה לשפנים. אנטוי גמיע הדׄא פי דׄכר אליבשה. פאנתקל אלי יהי מאורות בקולה עשה ירח למועדים. ודׄכר מנאפע אלליל ואן אלליל מקצוד מן קבלה לא באלאתפאק, לא עבתׄ פי פעלה ולא פי אלאעראץׄ אלתאבעה לפעלה, לאן אלליל אנמא הו מדהׄ עדם אלשמס, לכנה מע הדׄא מקצוד למנאפע כמא קאל תשת חשך ויהי לילה ומא יתבעה מן אלקול פי דׄכר אלחיואן אלמודׄי ללאנסאן ותצרפה פי אלליל וכמונה באלנהאר. ואלאנסאן ואלחיואן אלמואלף ללאנסאן בעכס דׄלך כמא קאל יצא אדם לפעלו ולעבודתו עדי ערב. פקד אנגרת לה אלחיואנאת אלארצׄיה כלהא פי דׄכר אלאנהאר. תׄם פי דׄכר אלאנואר ואנגר מעהא דׄכר אלאנסאן, ולם יבק אלא דׄכר אלחיואן אלמאיי ואכתׄר אחואלה מגהולה. ואלחכמה פיהא ליסת טׄאהרה אלינא כטׄהורהא פי הדׄה. פסבח עלי דׄכר הדׄה אלתי אלחכמה פיהא טׄאהרה בקולה מה רבו מעשיךׄ ה׳‎. תׄם עטף עלי דׄכר אלבחר ומא פיה ואתבעה בקולה יהי כבודׄ ה׳‎ לעולם ישמחׄ ה׳‎ במעשיו כנאיה ען קולה וירא אלהים את כל אשר עשה והנה טוב מאד כנאיה ען יום השביעי וישבת ויברך ויקדש למא אנכמלת אלאפעאל אלטביעיה אלתי תנקצׄי פי זמאן ואנתהת באלאנסאן אלי רתבהׄ אלמלאיכה אלמסתגׄניה ען אלקוי אלטביעיה אדׄ הי עקול לא יחתאג פי אפעאלהא אלי זמאן כמא נרי אלעקל יתצור פי אן ואחד אלסמאות ואלארץׄ פהו עאלם אלמלכות ועאלם אלראחה אדׄא אתצלת אלנפס בה אסתראחת. ולדׄלך קיל פי אלסבת אנה מעין עולם הבא. ולנרגע אלי כלאמנא עלי ראי אהל אלקיאס אן אלענאצר למא אמתזגת אמתזאגאת מכׄתלפה בחסב אכׄתלאף אלמואצׄע ואלאהויה ואלנסב אללכיה אסתחקת צורא מכׄתלפה מן ענד מעטי אלצור. פכאן גמיע אלמעאדן [...] אן קואהא וכׄואצהא וגואהרהא מזאגיה פקט מסתגׄניה ען צור אלאהיה, ואן אלצור אנמא תחתאג פי אלנבאת ואלחיואן אלתי תנסב אליהא אלנפס. ולמא אמתזגת אמתזאגא אלטף אסתחקת צורה אשרף תטׄהר פיהא אלחכמה אלאלאהיה אכתׄר, פכאן אלנבאת אלדׄי לה בעץׄ שעור ואדראך וגרא אלי אלארץׄ פהו יגׄתדׄי מן אלארץׄ אלטיבה אלנדיה ואלמא אלעדׄב, וינקבץׄ ען צׄד דׄלך, ויכבר חתי אדׄא אולד אלמתׄל ועמל בזרא וקף עמלה וטלב דׄלך אלבזר מתׄל דׄלך אלעמל ללחכמה אלגׄריבה אלמגׄרוזה פיה אלמסמאה ענדהם טביעה, והי קוה תעני בחפטׄ אלנוע אדׄ לא ימכן בקא אלשכׄץ בדׄאתה לאנה מרכב מן אשיא מסתחילה פכאן כל מא לה הדׄה אלקוי ללנמו ואלתוליד ואלאגׄתדׄא לא יתחרך אלחרכה אלמכאניה פהו אלדׄי תדברה אלטביעה עלי קול אלפלאספה. ובאלחק אן אללה ידברהא פי רתבהׄ מא ומלכהׄ מא סם אן שית תלך אלרתבה טביעה או נפסא או קוה או מלכא. ולמא לטף אלמזאג אכתׄר ואסתעד לטׄהור אלחכמה אלאלאהיה פיה אכתׄר, אסתחק זיאדהׄ צורה חאשי אלקוה אלטביעיה חתי ינאל אגׄדׄיתה מן בעד ותכון גמיע אעצׄאיה מצׄבוטה לא תתחרך אלא באראדתה ויכון אמלך לאגזאיה מן אלנבאת אלדׄי לא יקדר אן יחתגב ממא יודׄיה ולא יקצד אלי מא ינפעה ואלריח תלעב בה פכאן אלחיואן דׄו אלאלאת אלמחרכה לה פי אלמכאן וסמית אלצורה אלמוהובה לה זאידא עלי אלטביעה נפסא ואכׄתלפת אלאנפס אכׄתלאפא מתפאותא בחסב תגׄאלב אלטבאיע אלארבע מע קצד אלחכמיםלחיואן חיואן לחאגהׄ גמלה אלעאלם אליה ואן לם נדר נחן מא אלמנפעה פי אכתׄרהא כמא לא נדרי מנאפע אלאת אלמרכב ונטׄנהא עבתׄא וידריהא צאחב אלמרכב ומנשיה, בל כמא נגהל מנאפע כתׄיר מן עטׄאמנא וסאיר אעצׄאינא לו נתׄרת בין אידינא למא עלמנא מנפעהׄ עטׄם עטׄם ועצׄו עצׄו עלי אנא בהא. נתצרת ונתחקק אנה אן נקצנא ואחדא מנהא לנקצת אפעאלנא ואפתקרנא אליה. והכדׄא גמיע אגזא אלעאלם מעלומה מצׄבוטה ענד באריהאעליו אין להוסיף וממנו אין לגרוע. פוגב אכׄתלאף אלאנפס פוגב אן תכון אלאת כל נפס משאכלה להא פיעטי אלאסד אלאת אלכׄלב באלאניאב ואלמכׄאלב מע אלגראה, ויעטי אלאיל אלאת אלהרב מע אלגבן, וכל נפס תתשוק אלי תצריף קואהא עלי מא היית לה ולם תתעאדל אלטבאיע פי שי מן אלחיואן אלבהימי, פלם יתשוק אלי קבול צורה זאידה עלי אלנפס אלחיואניה, לכן תעאדלת פי אלאנסאן ותשוקת אלי צורה זאידה ולא בכׄל ענד אלאמר אלאלאהי פאפאץׄ עליה צורה זאידה תסמי אלעקל אלהיולאני אלמנפעל. ואלנאס איצׄא יכׄתלפון לאן אכתׄרהם מנחרף אלטבאיע פימיל עקלה מע דׄלך אלאנחראף, אן כאן מע אלצפרא פמעה אלטיש ואלתהור, ואן מאל אלי אלסודא פמעה אלתאני ואלתׄבות, ואלאכׄלאק תתבע אלמזאג, חתי אדׄא וגד אלאנסאן מתעאדל אלטבאיע ואצׄדאד אלאכׄלאק ענדה פי מלכה מתׄל כפתי אלמיזאן אלעדל פי יד אלוזאן ימילהא חיתׄ שא בזיאדהׄ אלצנג ונקצאנהא, פדׄלך אלאנסאן לא מחאלה פארגׄ אלקלב מן אלשהואת אלמפרטה ותשוק אלי רתבה פוק רתבתה והי אלרתבה אלאלאהיה פהו יקף חאירא פימא ינבגׄי לה אן יאתיה פי תגׄליב טבאיעה ואכׄלאקה פלא יעטי אלקוה אלגׄצׄביה סואלהא ולא אלשהואניה ולא גׄירהא אלא מסתשירא מסתרשדא אן ילהמה אללה אלי אלארשאד, פדׄלך הו אלדׄי יפיץׄ עליה רוח אלאהי נבוי אן אסתחק אלנבוה, ואלהאמי אן כאן דון דׄלך, וכאן וליא לא נביא אדׄ לא בכׄל ענדה תעׄ בל יעטי כל שי חקה, ויסמי אלפלאספה מעטי הדׄה אלרתבה אלעקל אלפעאל ויגעלונה מלכא דון אללה ואן עקול אלאדמיין אדׄא אתצלת בה פהי גנתהא ובקאהא אלאבדי.

11קאל אלכׄזרי, עסי להדׄה אלגמלה תפצילא מוגזא.

12קאל אלחבר, יתבין וגוד אלנפס באלחרכאת ואלאחסאס ללחיואן מכׄאלפה ללחרכאת אלאסתקציה פסמי סבבהא נפסא או קוה נפסאניה ותנקסם אלקוה אלנפסאניה אלי תׄלאתׄ, מא אשתרך פיה אלחיואן ואלנבאת והי אלקוה אלנבאתיה, ומא אשתרך פיה אלאנסאן וסאיר אלחיואן והי אלקוה אלחיואניה, ומא כׄץ בה אלאנסאן פיסמי קוה נטקיה, ויתבין אמר אלנפס אלכליה אלגנסיה באעתבאר אלאפעאל אנהא מן קבל אלצור אלחאצלה פי אלמאדה, לא מן קבל אלמאדה מן חיתׄ הי מאדה, פאן אלסכין ליס יקטע מן חיתׄ הו גסם לכן מן חיתׄ לה צורהׄ אלסכין, וכדׄלך אלחיואן ליס יחס ויתחרך מן קבל מא הו גסם לכן מן קבל מא לה צורהׄ אלחיואניה והי אלמסמאה באלנפס, פסמית הדׄה אלצור כמאלאת לאן בהא תכמל הויאת אלאשיא פאלנפס כמאל, ותׄם כמאל אול וכמאל תׄאן, פאלאול הו מבדא ללאפאעיל, ואלתׄאני דׄאת אלאפאעיל אלצאדרה ען אלמבדא, ואלנפס כמאל אול לאנהא מבדא לא צאדר ען אלמבדא, ואלכמאל אמא כמאל לגסם ואמא כמאל לגוהר ליס בגסם. פאלנפס כמאל לגסם טביעי, ואלגסם אלטביעי אמא אלי ואמא גׄיר אלי אעני אן תתם אפעאלה באלאת או דון אלאת, פאלנפס כמאל לגסם טביעי אלי דׄי חיאה באלקוה אי מצדר ללאפעאל אלחיואניה באלקוה ומתהיי להא, ויתבין אן אלנפס ליסת צאדרה ען אמתזאג אסתקצאת אלבדן, לאן אלשי אלחאדתׄ ען אמתזאג מפרדאת אמא אן יגׄלב פיה אחד אלמפרדאת או אכתׄר מן ואחד פתכון אלצורה אלחאצלה בחסב דׄלך ואמא אן תתגׄאלב אלמפרדאת חתי לא יבקי ואחד מנהא עלי צורתה פיחדתׄ מן דׄלך צורה מן וסאיטהא, ואלנפס ליסת מן קביל שי מן מפרדאת אלבדן, פליסת אלא צורה מן כׄארג כאלנקש מן קבל אלטאבע פי אלטינה אלמולפה מן אלמא ואלתראב פאנה ליס אלנקש מן קביל צור אלמא ואלתראב. ואול אלקוי אלקוה אלגׄאדׄיה והי כאלמבדא, ואלמולדה כאלגׄאיה, ואלמנמיה כאלאוסטה, ואלראבטה בין אלמבדא ואלגׄאיה, וללמולדה סבוק ותקדם ואן טרת מתאכׄרה פאנהא תסתולי אולא עלי אלמאדה אלמהיאה לקבול אלחיאה, ותלבסהא צורה אלמקצוד בכׄדמהׄ אלמנמיה ואלגׄאדׄיה, תׄם תתרך אלתדביר להמא אלי וקת אלתוליד, פאלמולדה מכׄדומה ואלגׄאדׄיה כׄאדמה ואלמנמיה כׄאדמה ומכׄדומה, וללגׄאדׄיה, אלארבע קוי אלמשהורה אלכׄאדמה להא כל מתחרך באראדהׄ חאס מתחרך, ואלא כאן אלחס עבתׄא, ואלחכמה לא תעטי שייא עבתׄא ולא צׄארא, ולא תמנע צׄרוריא ולא נאפעא חתי דׄואת אלאצדאף ואן טׄהרת סאכנה פאן להא אנקבאצׄא ואנבסאטא ואן קלבת עלי טׄהורהא תחרכת חתי תנצרף עלי בטונהא ליקרב להא אלגׄדׄא, פאלחואס אלטׄאהרה משהורה ואמא אלבאטנה פאולהא אלחאסה אלמשתרכה לאן אלמנאפי ואלמלאים אנמא ידרכאן באלתגרבה, פוגב וצׄע קוה מתצורה ליחפטׄ בהא צור אלמחסוסאת והי אלחאסה אלמשתרכה, ואלקוה אלמתדׄכרה אלחאפטׄה לתחפטׄ בהא אלמעאני אלמדרכה מן אלמחסוסאת, ואלקוה אלמתכׄילה יסתעיד בהא מא אמחי ען אלדׄכר. ואלקוה אלמתוהמה ליקף עלי צחיח מא יסתנבט אלתכׄיל וסקימה צׄרבא מן אלוקוף אלטרי חתי יעידה אלי אלדׄכר. ואלקוה אלמחרכה לאגתלאב מא יחתאג אליה מן קרב ובעד ודפע אלצׄאר. וגמיע קוי אלחיואן אמא מדרכה ואמא מחרכה. ואלמחרכה הי אלשוקיה והי צׄרבאן אמא מחרכה לטלב מכׄתאר והי אלקוה אלשהואניה ואמא מחרכה לדפע מכרוה והי אלגׄצׄביה. ואלמדרכה צׄרבאן אמא טׄאהרה כאלחואס אלטׄאהרה ואמא באטנה כאלחואס אלבאטנה. ואלמחרכה אנמא תפעל בחכם אלמתוהמה באסתכׄדאם אלמתכׄילה והי אלגׄאיה מן אלחיואן אלבהימיה אדׄ לם יוצׄע לה אלקוה אלמחרכה ליצלח בהא אסבאב אלחס ואלתכׄיל בל אלחאסה אלמתכׄילה וצׄעת לה לתצלח אסבאב אלחרכה. ואלנאטק בעכס דׄלך אעטי אלחרכה לאצלאח אלנפס אלנאטקה אלעאמלה אלדראכה אלחואס אלכׄמס מעלומה ומדרכאתהא מעלומה בתוסטהא ידרך איצׄא אלשכל ואלעדד ואלעטׄם ואלחרכה ואלסכון תבין וגוד אלחאסה אלמשתרכה מן חכמנא עלי אלעסל מתׄלא אדׄא ראינאה אנה חלו. והדׄא אנמא הו באן ענדנא קוה משתרכה ללחואס אלכׄמס. והדׄה אלקוה הי אלמתצורה ותפעל פי אליקטׄה ופי אלנום. תׄם קוה תרכב מא אגתמע פי אלחס אלמשתרך ותפרק בינהמא ותוקע אלאכׄתלאף פיהא מן גׄיר אן תזול אלצור ען אלחס אלמשתרך, והדׄה הי אלמתכׄילה וקד תצדק וקד תכדׄב. ואמא אלמתצורה פצאדקא אבדא. תׄם אלקוה אלוהמיה. והי קוה חאכמה תקצׄי עלי שי באנה ינבגׄי אן יטלב ועלי שי באנה ינבגׄי אן יהרב ענה, וליס פי אלמתצורה ולא פי אלמתכׄילה חכם וקצׄא בל תצור פקט. תׄם אלקוה אלחאפטׄה מדׄכרה למעאני מא אדרכתה אלחואס מתׄל אן אלדׄיב עדו ואלולד חביב, פאלמחבה ואלאצׄראר ואלתצדיק ואלתכדׄיב ללוהמיה. ואמא אלחאפטׄה אלמדׄכרה פתחפטׄ מא צדקת אלוהמיה. ואלקוה אלמתכׄילה אדׄא אסתעמלתהא אלוהמיה סמית מתכׄילה. ואדׄא אסתעמלתהא אלנאטקה סמית מפכרה. ואלתצור פי מקדם אלדמאגׄ ואלתכׄיל פי וסטה. ואלתדׄכר פי מוכׄרה. ואלתוהם פי גמיעה ואכתׄרה פי חיז אלתכׄיל. וכל הדׄה אלקוי מאיתה פאניה בפנא אלאתהא. ולא בקא אלא ללנאטקה עלי אנהא קד תסתכׄלץ לנפסהא לבאב הדׄה אלקוי צׄרבא מן אלאסתכׄלאץ פתוגדהא בדׄאתהא. הדׄא תלכׄיץ אקואל אלקום פי מא דון אלנפס אלנאטקה. וקאלוא פי אלנאטקה אנהא אלעקל אלהיולני, אי אלעקל באלקוה שביה באלהיולי אלתי הי קרינה עדם באלפעל, והי כל שי באלקוה ותחצל פיהא אלצור אלמעקולה אמא באלהאם אלאהי ואמא באכתסאב. ואלתי באלאלהאם הי אלמעקולאת אלאולי אלתי אשתרך פיהא גמיע אלנאס אלדׄין עלי אלמגרי אלטביעי. ואלתי באלאכתסאב פהי באלקיאס ואלאסתנבאט אלברהאני כתצור אלחקאיק אלמנטקיה מתׄל אלאגנאס ואלאנואע ואלפצול ואלכׄואץ ואלאלפאטׄ אלמפרדה ואלמרכבה באלצׄרוב אלמכׄתלפה מן אלתראכיב ואלקיאסאת אלמולפה אלחקיקיה ואלכאדׄבה ואלקצׄאיא אלמנתגה נתאיג צׄרוריה ברהאניה או גדליה או כׄטאביה או סופסטאניה או שעריה וכתחקיק אלאמור אלטביעיה כאלהיולי ואלצורה ואלעדם ואלטביעה ואלמכאן ואלזמאן ואלחרכה ואלאגראם אלפלכיה ואלאגראם אלענצריה ואלכון ואלפסאד אלמטלקין, וכון אלמואליד אלכאינה פי אלגו ואלכאינה פי אלמעאדן ואלכאינה עלי אדים אלארץׄ מן נבאת וחיואן וחקיקהׄ אלאנסאן וחקיקהׄ תצור אלנפס לנפסהא ותצור אלאמור אלריאצׄיה מן אלעדדיה ואלהנדסיה אלמחצׄה ואלהנדסיה אלנגומיה ואלהנדסיה אללחניה ואלהנדסיה אלמנאטׄריה ותצור אלאמור אלאלאהיה כמערפהׄ מבאדי אלוגוד אלמטלק מן חיתׄ הו וגוד ולואחקה כאלקוה ואלפעל ואלמבדא ואלעלה ואלגוהר ואלערץׄ ואלגנס ואלנוע ואלמצׄאד ואלמגאנסה ואלאתפאק ואלאכׄתלאף ואלוחדה ואלכתׄרה ואתׄבאת מבאדי אלעלום אלנטׄריה מן אלריאצׄיה ואלטביעיה מן אלמנטקיה אלתי לא יתוצל אליהא אלא בהדׄא אלעלם כאתׄבאת אלמבדע אלאול ואלמבדע אלאול ואלנפס אלכליה וכיפהׄ אלאבדאע ומרתבהׄ אלעקל מן אלמבדע ומרתבהׄ אלנפס מן אלעקל ומרתבהׄ אלטביעה מן אלנפס ומרתבהׄ אלהיולי ואלצורה מן אלטביעה ומרתבהׄ אלאפלאך ואלנגום ואלכאינאת מן אלהיולי ואלצורה ולמא דׄא גבלת עלי הדׄא אלאכׄתלאף ואלתקדם ואלתאכׄר ומערפהׄ אלסיאסה אלאלאהיה ואלטביעה אלכליה ואלענאיה אלאוליה וקד תסתפיד הדׄה אלנפס אלנאטקה צורה מן אלחס באן תערץׄ עלי דׄאתהא מא פי אלמתצורה ואלחאפטׄה באסתכׄדאם אלמתכׄילה ואלוהמיה פתגד תלך אלצור ישתרך בעצׄהא מע בעץׄ פי צפאת ותפתרק פי צפאת אכׄר, ומן תלך אלצפאת צור דׄאתיה ומנהא ערצׄיה, פתפצלהא ותרכבהא ותסתנבט אלאגנאס ואלאנואע ואלפצול ואלכׄואץ ואלאעראץׄ תׄם תרכבהא תרכיבא קיאסיא פתנתג מנהא פואיד אלנתאיג באעאנהׄ אלעקל אלכלי אלמפיד להא ואן אסתעאנת אולא באלקוי אלחסיה פהי גׄיר מחתאגה אליהא פי תצור הדׄה אלמעאני פי דׄאתהא ופי תרכיב אלקיאסאת מנהא לא ענד אלתצדיק ולא ענד אלתצור וכמא אן אלקוי אלחסיה אנמא תדרך בתשבה מן אלמחסוס כדׄלך אלקוי אלעקליה אנמא תדרך בתשבה מן אלמעקול בתגריד אלצורה ען אלמאדה ואלאתצאל בהא, אלא אן אלקוה אלחאסה לא תפעל באראדה כמא תפעל אלנאטקה, בל תחתאג אלי אלקוה אלמחרכה ומעונהׄ אלוסאיט אלמוצלה אלצור אליהא. ואמא אלקוה אלעאקלה פתעקל בדׄאתהא ותעקל דׄאתהא מתי שאת, ולדׄלך קיל אלקוה אלחאסה מנפעלה ואלעאקלה פאעלה. וליס אלעקל באלפעל גׄיר צור אלמעקולאת מגרדה פי דׄאת אלעקל באלקוה. ולדׄלך קיל אן אלעקל באלפעל עאקל ומעקול מעא. ומן כׄואץ אלעקל אן יוחד אלכתׄיר ויכתׄר אלואחד באלתרכיב ואלתחליל, ואלעקל ואן טׄהר פעלה בזמאן פי תרכיב אלקיאסאת באלרויה ואלפכרה פאן תחצילה לנתיגה לא יתעלק בזמאן, בל דׄאת אלעקל מרפע ען אלזמאן. ואלנפס אלנאטקה אדׄא אקבלת עלי אלעלום סמי פעלהא עקלא נטׄירא. ואדׄא אקבלת עלי קהר אלקוי אלבהימיה סמי פעלהא סיאסה וסמי עקלא עמליא. וקד תסעד אלקוה אלנטקיה פי בעץׄ אלנאס מן אלאתצאל באלעקל אלכלי במא ינזההא ען אסתעמאל אלקיאס ואלרויה ותכפי אלמונה באלאלהאם ואלוחי ותסמי כׄאציתהא הדׄה תקדיסא. פתסמי רוחא מקדסא. ומן בראהין גוהריה אלנפס ואנהא ליסת גסמא ולא ערצׄא אנהא צורה אלגסם לא תתקסם בדׄאתהא כתקסם אלגסם ולא באלערץׄ כתקסם אלערץׄ בתקסם חאמלה פאן אללון ואלראיחה ואלטעם ואלחרארה ואלברודה קד תתקסם בדׄאתהא. ואלצורה אלעקליה אנמא הי אלמעקול. ואלמעקול מן אלאנסאן מתׄלא לא יקבל אלקסמה אדׄ לא יתצור נצף אנסאן ולא גז מן אנסאן אנסאנא כמא תתצור גזא מן אלגסם גסמא וגזא מן אללון לונא, וכדׄלך אללון ואלגסם מן חיתׄ המא מעקולאן פלא יתצור פיהמא קסמה. פלא נקול נצף לון מעקול ונצף גסם מעקול כמא נקול נצף דׄאך אלגסם מחסוס ונצף אללון אלמחמול עליה אלמשאר אליה, ולא יקאל נצף אלנפס אלנאטקה אלתי פי זיד כמא נקול נצף בדנה אדׄ לא תתמיז ולא תתחיז בגהה מן אלגהאת ולא ישאר אליהא. פאדׄא" לם תכן גסמא ולא ערצׄא קאימא באלגסם חאלא פיה, וקד טׄהר וגודהא במא יצדר ענהא מן אלאפעאל. פלם יבק אלא אן תכון גוהרא קאימא בדׄאתה מתצפא בצפאת אלמלאיכה ואלגואהר אלאלאהיה ואלאתהא אלאול אלצור אלרוחאניה אלמתשכלה פי וסט אלדמאגׄ מן אלרוח אלנפסאני באלקוה אלמתכׄילה תצירהא פכריה אדׄא תחכמת פיהא ורכבתהא תרכיבאת ופצלתהא תפצילאת תודי אלי אנתאג עלם. וקד כאנת קבל דׄלך תכׄייליה אדׄ כאנת תתחכם פיהא אלקוה אלוהמיה כמא יערץׄ פי אלאטפאל ופי אלבהאים ופי מא אנחרף מזאגה במרץׄ חתי תתעאמי תלך אלאשכאל עלי אלנפס פלא תתאתי לאסתיפהא אלנטׄר פי אלראי אלמקצוד פיאתי אלראי נאקצא והמיא כלה או בעצׄה, ומן אלדלאיל עלי מפארקהׄ אלנפס אלגסד ואסתגׄנאהא ענה אן אלקוי אלגסמיה תצׄעף במדרכאתהא אלקויה כאלעין ענד אלשמס ואלאדׄן ענד אלצות אלקוי בפסאד אלאתהא. ואלנפס אלנאטקה ליסת כדׄלך, בל תקוי כלמא אדרכת עלמא אקוי. ומן דׄלך אן אלהרם ינאל אלבדן ולא ינאל אלנפס, בל תקוי בעד אלכׄמסין סנה ואלבדן פי אלאנחטאט. ומן דׄלך אן אעמאל אלבדן מתנאהיה ואפעאל אלנפס גׄיר מתנאהיה אדׄ אלצור אלהנדסיה ואלעדדיה ואלחכמיה גׄיר מתנאהיה. ואלדליל עלי וגוד גוהר עקלי מפארק ללאגסאם יקום ללנפס מקאם אלצׄו ללבצר ואן אלנפס אדׄא פארקת אלאגסאם אתחדת בה אן אלנפס לם תחצל עלומהא באלתגרבה לאן מא חצל באלתגרבה ליס יחכם עליה קטעא, לאנה ליס יקטע אלאנסאן חכמא אן כל אנסאן לא יחרך אדׄניה כמא יקטע אן כל אנסאן חסאס, וכל חסאס חי, וכל חי גוהר, ואן אלכל אכתׄר מן אלגז, וגׄיר דׄלך מן אלמעקולאת אלאול. לאן אעתקאדנא צחהׄ אלארא ליס יצח בתעלם ואלא פיתסלסל אלי מא לא נהאיה לה פהו אדׄן מן פיץׄ אלאהי יתצל באלנפס אלנאטקה והדׄא אלפיץׄ מא לם יכן לה הדׄה אלצורה אלעליה אלכליה לם ימכן אן ינקשהא פי אלנפס אלנאטקה וכל מא פיה צורה עקליה פי דׄאתה פהו גוהר גׄיר מתגסם פאדׄא הדׄא אלפיץׄ גוהר עקלי לא מתגסם קאים בדׄאתה ותצור אלנפס ללצורה כמאל להא ואנמא יחצל ענד אלאתצאל בהדׄא אלגוהר אלעקלי, לכן עאק ען דׄלך אלאתצאל שגׄל אלבדן, פלא יצח אלאתצאל אלתאם אלא ברפץׄ גמיע קוי אלבדן, פאנה לא מאנע להא ען אלאתצאל בה גׄיר אלבדן, פאדׄא פארקתה בקית מכמלה מתעלקה בה, אמנה מן אלפסאד, מתצלה בהדׄא אלגוהר אלשריף אלמכני באלעלם אלאעלי וגׄיר הדׄא מן אלקוי פאנמא פעלה באלבדן פידׄהב בפסאד אלאלה לכן אלנפס אלנאטקה קד תצורתהא ואכׄדׄת לבאבהא כמא תקדם.

13קאל אלכׄזרי, ארי להדׄא אלכלאם אלפלספי פצׄל תדקיק ותחקיק עלי סאיר אלכלאם.

14קאל אלחבר, והדׄא אלדׄי כנת אכׄאפה עליך מן אלאנכׄדאע וסכון אלנפס אלי אראיהם למא צח ענהם אלברהאן פי אלעלום אלריאצׄיה ואלמנטק טאבת אלנפוס עלי כל מא קאלוה פי אלטביעה ופי מא בעד אלטביעה, וטׄן אן כל מא קאלוה ברהאן, פהלא שככת פי דעאויהם פי אלארבעה ענאצר אולא, וטלבתהם בעאלם אלנאר אלדׄי ידעון אן הנאך אלנאר אלאתׄיריה לא לון להא פימנע לון אלסמא ואלכואכב, ומתי אדרכנא נחן נאר ענצריה בל כיפיה חארה פי אלגׄאיה אן חלת ארצׄא כאנת גמרא ואן חלת הוא כאנת להיבא ואן חלת מאא כאנת מגׄלי. ומתי שאהדנא גסמא נאריא והואיא דאכׄלין פי מאדה אלנבאת ואלחיואן חתי נקצׄי אנה מרכב מן אלארבעה כלהא נאר והוא ומא וארץׄ, הב אנא אדרכנא אלמא ואלארץׄ ואסתחאלתהמא ודכׄולהמא פי מאדהׄ אלנבאת וללהוא ולחרארהׄ אלשמס מעונה פי אלכון בטריק אלכיפיה לא בגסם נאר ולא בגסם הוא, או מתי ראינאהא תנחל אלי אלארבע באעיאנהא אן אנחל גז אלי שביה אלתראב פליס תראבא בל רמאד יצלח לדוא מא. ואלגז אלמנחל אלי שביה באלמא פליס במא לכן עצארה או רטובה סמיה או גׄדׄאיה לא מא שרוב. ואלגז אלמנהל אלי שביה באלהוא כאן בכׄארא או קתארא לא הוא יצלח אן יתנפס בה. והדׄה איצׄא רבמא אסתחאלת אלי חיואן או אלי נבאת או אנעקדת פי אגזא אלארץׄ, וצארת מן אסתחאלה אלי אסתחאלה, ופי אלנאדר יקע להא אלאסתחאלאת אלי ענצר כׄאלץ. נעם אן בעד אלתתבע יכׄרג לנא אלאצׄטראר באלקול באלחרארה ואלברודה ואלרטובה ואליבוסה ואנהא כיפיאת אול אדׄ לא יכׄלו מנהא או מן וסאיטהא גסם מן אלאגסאם ואן אלעקל יחל אלמרכבאת אליהא וירכבהא מנהא ויצׄע להא גואהר חאמלה פיקול נארא והוא ומא וארצׄא באלתצור ואלקול לא באנהא כאנת קט בסיטה כׄארג אלדׄהן ותרכב מנהא כל מכון, וכיף יקולון הדׄא והם יקולון באלקדם, פלם יזל אלאנסאן מתכונא מן מני ודם, ואלדם מן אלאגׄדׄיה ואלאגׄדׄיה מן אלנבאת, ואלנבאת כמא קלנא מן בזור, ואלמא אלדׄי יסתחיל גׄדׄא משאכלא לה במעונה מן אלשמס ואלהוא ואלארץׄ. נעם ולגמיע אלכואכב ונסב אלאפלאך תאתׄיר ומעאון פיה, פהדׄא אלשך פי אלענאצר עלי ראיהם. ואמא עלי ראי אלשריעה פאן אללה קד אכׄתרע אלעאלם כמא הו וחיואנה ונבאתה מצורא, פלם יחתאג אלי תקדים בסאיט ותרכיב מרכבאת. ופי איגאב אלחדת תסהיל כל צעב ותוטיהׄ כל מתעדׄר אדׄא תכׄילת אן הדׄא אלעאלם לם יכן, תׄם כאן במשיהׄ אללה חין שא וכיף שא לם תשק פי אלבחתׄ כיף תכונת אלאגסאם, וכיף ארתבט בהא אלנפס, ולם תשמז נפסך מן קבול אלרקיע והמים אשר מעל השמים, ואלשיאטין אלתי תדׄכרהא אלאחבאר, ואלאכׄבאר אלמתנטׄרה מןימות המשיח ותחית המתים והעולם הבא. פמא חאגתנא אלי הדׄא אלתחיל פי בקא אלנפס בעד פנא אלגסד. ואלמכׄבר אלצאדק אלמקלד קד חקק ענדנא אלמעאד ודעהא תכון רוחאניה או גסמאניה. ואן תתבעת טריק אלמנטק לאתׄבאת אלארא פיהא ולאחאלתהא פני אלעמר דון נתיגה, ומן לנא בצחהׄ מא אורדנא באן אלנפס גוהר עקלי לא יתחיז במכאן ולא ידרכה כון ולא פסאד, ובמא דׄא תתמיז נפסי ען נפסך, או ען אלעקל אלפעאל וסאיר אלעלל, ואלעלה אלאולי, תׄם כיף לא תתחד נפס ארסטוטאליס ונפס אפלאטון וידרי כל ואחד מנהמא צאחבה ומעתקדה וצׄמירה וגמיע אלפלאספה, תׄם כיף לא יעקלון מעקולאתהם דפעה ואחדה כמא הי ענד אללה וענד אלעקל אלפעאל, וכיף ידרכהם אלנסיאן, ולם יחתאגון אלי פכר פי מעקולאתהם גזא בעד גז. תׄם כיף לא יגד אלפילסוף נפסה אדׄא נאם ואדׄא סכר ואדׄא תברסם ואדׄא אצאבתה צׄרבה פי דמאגׄה ואדׄא שאךׄ והרם, ומא אלדׄי נקצׄי עלי מן בלגׄ אקצי עלם אלפלאספה וערצׄה וסואס סודאני או ברסאם נפסי ונסי גמיע עלמה, אליס דׄאך הו הו בעינה אם נקול אנה גׄירה, תׄם נפרץׄ אנה ברי מן עלתה בתדריג וגעל יתעלם מן קבל ושאךׄ ולם ידרך אלעלם אלאול. הל תציר לה נפסאן מפארקתאן אלואחדה דון אלאכׄרי. תׄם נפרץׄ אן תבדל מזאגה אלי חב אלגׄלבה ואלשהואת, אנקול אן לה נפסא פי אלנעים ונפסא פי אלעדׄאב. ואי אלחדוד מן אלעלם הו אלדׄי תציר בה נפס אלאנסאן מפארקה ללגסד גׄיר תאלפה. אן כאן בגמיע עלם אלמוגודאת, פכתׄיר מא יבקי עלי אלפילסוף לא ידריה ממא פי אלסמא ופי אלארץׄ ופי אלבחר. ואן כאן יקנע באלבעץׄ פכל נפס נאטקה מפארקה. לאן אלמעקולאת אלאולי מגׄרוזה פיהא. ואן כאן אנמא תפארק אלנפס בתצור אלמעקולאת אלעשר ומא פוקהא מן מבאדי אלפכר ותנחצר פיהא אלמוגודאת כלהא באן יאכׄדׄהא מנטקיה דון תקץ לגזאיאתהא, פעלם קריב ידרך מן יומה ובעיד אן יציר אלאנסאן מלכא מן יומה, ואן כאן ולא בד מן תקציהא ואלאחאטה בהא מנטקיה וטביעיה פאמר גׄיר מדרך פהו תאלף האלך לא מחאלה עלי ראיהם. ולקד אנכׄדעת לכׄיאלאת פאסדה וטלבת מא לם ימכנך מנה כׄאלקך ולם יגעל פי גׄריזהׄ אלבשר אדראכה בקיאס לכן געל גׄלך פי גׄריזהׄ אלמצטפין מן צפוהׄ אלכׄלק באלשראיט אלתי דׄכרנאהא תחצל להם תלך אלנפוס אלתי תתצור אלעאלם באסרה ותרי רבהא ומלאיכתה ותרי בעצׄהא בעצׄא ויעלם בעצׄהא צׄמאיר בעצׄהא כמא קאלגם אני ידעתי החשו, ונחן לא נדרי כיף דׄלך ובמא דׄא, אלא אן יאתינא מן טריק אלנבוה. ולא כאן עלם אלפלאספה פי דׄלך חקא לאדרכוהא, אדׄ יתכלמון פי אלנפוס ופי אלנבוה והם כסאיר אלבשר. נעם אנהם פצׄלוא באלחכמה אלאנסאניה כמא כאן יקול סקראט לאהל אתיניא, יא קום אני לסת אנכר חכמתכם אלאלאהיה, לכני אקול אני לסת אחסנהא, ואמא אנא חכים בחכמה אנסאניה. ואנהם למעאדׄיר למא לגוא אלי קיאסאתהם לעדם אלנבוה ואלנור אלאלאהי ענדהם, אתקנוא אלעלום אלברהאניה אתקאנא לא גׄאיה וראה, ואנפרדוא לדׄלך ולא כׄלאף בין שכׄצין פי תלך אלעלום, ויכאד אלא אתפאק בין שכׄצין פי תלך אלעלום, ויכאד אלא אתפאק בין שכׄצין פי מא תכלפוא בעד דׄלך מן אלארא פי מא בעד אלטביעה. נעם ופי כתׄיר מן אלטביעה ואן וגדת גמלה מתפקין עלי ראי ואחד, פליס דׄלך לבחתׄ ונתיגה וקף עליהא ראיהם, בל אנהם שיעהׄ אחד אלמתכלמין יקלדונה. כשיעהׄ פיתאגורא ושיעהׄ אבנדקליס ושיעהׄ ארסטוטאליס ושיעהׄ אפלאטון וגׄירהם, ואצחאב אלמטׄלה ואלמשאיין והם מן שיעהׄ ארסטוטאליס, ולהם פי אלמבאדי ארא תסכׄף אלעקל ויסכׄפהא אלעקל, כתעלילהם פי דוראן אלפלך אנה יטלב כמאלא ינקצה ליכון מחאדׄיא לכל גהה, ולמא לם ימכן דׄלך דאימא ולכל גז טלבה עלי אלתעאקב. ומתׄל תכׄרצהם פי אלפיוץׄ אלפאיצׄה ען אלאול תעׄ, וכיף לזם ען אלעלם באלאול מלך, וען אלעלם בנפסה פלך, ותדרגת אלי יׄאׄ רתבה ווקפת אלפיוץׄ ענד אלעקל אלפעאל, ולם ילזם ענה לא מלך ולא פלך. ואשיא הי פי אלאקנאע דוןספר יצירה. ופי גמיע דׄלך אלשכוך, ולא אתפאק בין פילסוף וצאחבה, לכן יעדׄרון עלי כל חאל וישכרון עלי מא אנתגוא מן מגרד קיאסאתהם, וקצדוא אלכׄיר, ועמלוא אלנואמיס אלעקליה, וזהדוא פי אלדניא, פהם עלי כל חאל מפצׄלון אדׄ לא ילזמהם קבול מא ענדנא, ונחן ילזמנא קבול אלמשאהדה ואלתואתר אלדׄי הו כאלמשאהדה.

15קאל אלכׄזרי, עסי נכת מכׄתצרה מן אלארא אלתי תכׄלצת ענד אלאצוליין והם אלמסמון ענד אלקראיין באצחאב עלם אלכלאם.

16קאל אלחבר, לא פאיד פי דׄלך גׄיר אלתחדׄק פי אלכלאם, ואלעון עלי מא קיל הוי זהיר ללמוד מה שתשיב את אפיקורוס. לאן אלעאלם אלסאדׄג כאלאנביא מתׄלא קלילא מא יקדר אן יפיד אחדא בטריק אלתעלים ולא ירד עלי מסאלה בטריק אלכלאם, וצאחב אלכלאם יטׄהר עליה רונק עלם חתי אנה יפצׄלה אלסאמע עלי דׄלך אלסאדׄג אלכׄיר אלדׄי עלמה עקאיד לא יצרפה ענהא צארף. וגׄאיהׄ דׄלך אלמתכלם פי כל מא יתעלמה ומא יעלמה אן יחצל פי נפסה ופי נפס מתעלמיה אלעקאיד אלתי פי נפס דׄלך אלסאדׄג אלמטבוע. ורבמא אפסד עלם אלכלאם כתׄירא מן עקאיד אלחק עליה במא יורדה מן אלשכוך ואלארא אלמנתקלה, כאלדׄין נראהם מן אלדׄין יקריון אלאעאריץׄ וידקקון וזנהא, ונסמע געגעה וכלמאת חאילה פי עלם הין עלי אלמטבוע ידׄוק וזן אלשער ולא יגוז עליה זחף בוגה. וגׄאיהׄ אולאיך אן יצירוא מתׄל הדׄא אלדׄי יטׄהר גאהלא באלערוץׄ לאנה לא יקדר אן יעלמה, ואולאיך יקדרון עלי תעלימה. נעם ואן הדׄא אלמטבוע יעלם מטבועא אכׄר באקל אשארה וכדׄלך אלקום אלמטבועון ללתשרע ואלתקרב אלי אללה תעׄ תנקדח פי נפוסהם שראראת מן כלמאת אלאכׄיאר ותציר להם אנואר פי קלובהם. וגׄיר אלמטבוע הו אלדׄי יחתאג אלי עלם אלכלאם, ורבמא לם ינפעה, בל רבמא אצׄר בה.

17קאל אלכׄזרי, לם אטאלבך במא יגאל פי הדׄא אלמעני ואנמא אטלב נכתה אצוליה פי אלדין תדׄכרה לי, אדׄ קד קרעת סמעי ותשוקת נפסי אליהא.

18קאל אלחבר, פאול מא ינבגׄי אתׄבאת אלחדתׄ ללעאלם, אלקול פי אבטאל קדם אלעאלם, אן כאן אלמאצׄי לא אול לה פאלאשכׄאץ אלמוגודה פי סאלף אלדהר אלי וקתנא הדׄא לא נהאיה להא. ומא לא נהאיה לה לא יכׄרג אלי פעל, פכיף כׄרגת תלך אלאשכׄאץ אלי אלפעל והי לא נהאיה להא כתׄרה, לא מחאלה אן ללמאצׄי אולא וללאשכׄאץ אלמוגודה עדדא יתנאהי, לאן פי קוהׄ אלעקל אן יעד אלאפא ואלאף אלאף מצׄאעפה אלי מא לא נהאיה לה, הדׄא פי אלקוה, ואמא אן יכׄרגהא אלי חד אלפעל פלא. לאן מא יכׄרג אלי אלפעל יעד ואחדא, פדׄלך אלעדד אלכׄארג אלי אלפעל דׄו נהאיה לא מחאלה, ואמא מא לא נהאיה לה פכיף יכׄרג אלי אלפעל, פללעאלם אדׄא" אבתדא, ולדוראת אלפלך עדד מתנאה, ומן דׄלך אן מא לא נהאיה לה לא נצף לה ולא צׄעף ולא נסבה עדדיה, ונחן נדרי אן דוראת אלשמס גז מן אתׄני עשר מן דוראת אלקמר. וכדׄלך סאיר חרכאת אלאפלאך בעצׄהא ענד בעץׄ פיציר הדׄא בעץׄ הדׄא, וליס פי מא לא נהאיה לה בעץׄ, פכיף יציר הדׄא מתׄל דׄאך לא נהאיה לה והו דונה או פוקה, אעני אנה אזיד עדדא או אנקץ עדדא. ומן דׄלך כיף אנתהי מא לא נהאיה לה אלינא, אן כאן קבלנא מן אלכׄלק מא לא נהאיה לעדדהם, פכיף אנתהי אלעדד אלינא, ומא תנאהי אלי שי פלא בד לה מן אבתדא, ואלא פכל ואחד מן אלאשכׄאץ יחתאג פי וגודה אנתטׄאר וגוד אשכׄאץ קבלה לא נהאיה להא פלא יוגד אחד. פצל,אלעאלם חאדתׄ לאנה גסם. ואלגסם לא יכׄלו ען אלחרכה ואלסכון, והמא ערצׄאן חאדתׄאן עליה מתעאקבאן, פאלטארי עליה חאדתׄ לא מחאלה לטריאנה, ואלסאבק חאדתׄ לאנה לו כאן קדימא למא אנעדם, פכלאהמא חאדתׄאן. ומא לא יכׄלו ען אלחואדתׄ פהו חאדתׄ אדׄ לם יסבק אלחואדתׄ. ואלחואדתׄ חאדתׄה פהו חאדתׄ. פצל,לא בד ללחאדתׄ מן סבב יחדתׄה, לאן לא בד ללחאדתׄ מן וקת יכׄתץ בה ימכן אן יפרץׄ לה קבל ובעד, פאכׄתצאצה בוקתה דון מא קבלה ובעדה יצׄטר אלי אלמכׄצץ. פצל,אללה אזלי קדים לם יזל. לאנה אן כאן מחדתׄא אפתקר אלי מחדתׄ ויתסלסל דׄלך אלי מא לא נהאיה ולא יתחצל, או ינתהי אלי מחדתׄ קדים הו אלאול, והו מטלובנא. פצל,אללה אבדי לא יזאל. לאן מא תׄבת לה אלקדם אנתפי ענה אלעדם. לאן חדותׄ אלעדם מחתאג אלי סבב כמא אן חדותׄ אלחדתׄ מחתאג אלי סבב, פאנה לא ינעדם אלשי מן קבל נפסה לכן מן קבל צׄדה, ולא צׄד לה ולא מתׄל. לאן מא הו מתׄלה פי גמיע אלוגוה פהו הו לא יוצף באתׄנין. ואמא אלצׄד אלמעדם פלא ימכן איצׄא אן יכון קדימא, לאן הדׄא קד תבין קדם וגודה ולא ימכן אן יכון חדיתׄא, לאן כל חאדתׄ אנמא הו מעלול להדׄא אלקדים פכיף יעדם אלמעלול עלתה. פצל,אללה ליס בגסם. לאן אלגסם לא יכׄלו ען חואדתׄ. ומא לא יכׄלו מן אלחואדתׄ פהו חאדתׄ. ומן אלחמחאל תסמיתה ערצׄא, לאן אלערץׄ קיאמה באלגסם אלחאמל. פאלערץׄ מעלול ללגסם תאבע לה מחמול עליה, ואללה תעׄ לא יתחיז ול יכׄתץ בגהה דון אכׄרי. לאן הדׄא מן שרוט אלגסם. פצל,אללה תעׄ עאלם במא גל ומא דק, ולע יעזב ען עלמה שי, אדׄ תבין אנה כׄלק אלכל ורתבה ונטׄמה כמא קאלהנוטע אוזן הלא ישמע אם יוצר עין הלא יביט. וקאלגם חשך לא יחשיך ממך וׄגו׳‎. כי אתה קנית כליותי וׄגו׳‎. פצל,אללה תעׄ חי אדׄ קדׄ תבת לה אלעלם ואלקדרה. פקד תׄבת לה אלחיאה. לכן ליס כחיאתנא אלמחדדה באלחס ואלחרכה. לאכן חיאה מענאהא אלעקל אלמחץׄ והי הו והו הי. פצל,אללה תעׄ מריד. לאן כל מא צדר ענה פי אלאמכאן אן יצדר צׄדה או עדמה, או קבל אלוקת אלדׄי צדר או בעדה. וקדרתה עלי אלחאלין סוא, פלא בד מן אראדה תרד אלקדרה אלי אחדהמא דון אלאכׄר. ולקאיל אן יקול אן עלמה יגׄני ען קדרה ואראדה, אדׄ עלמה מכׄצוץ לאחד וקתין ואחד אלצׄדין, ועלמה אלקדים הו אלסבב פי כל חאדתׄ עלי מא הו, והדׄא יטאבק אלפלספה. פצל,אראדתה תעׄ קדימה מטאבקה לעלמה. פלא יטרא עליה שי ולא יתגׄיר ענדה. והו תעׄ חי בחיאה דׄאתיה לא מכתסבה. וכדׄלך קאדר בקדרה ומריד באראדה, לאן מן אלמחאל וגוד אלשי ונקיצׄה מעא. פלא יקאל קאדר בלא קדרה קולא מטלקא.

19קאל אלכׄזרי, הדׄא כאף ללתדׄכרה, ולא מחאלה אן הדׄא אלדׄי דׄכרתה פי אמר אלנפס ואלעקל והדׄה אלעקאיד אנמא הו מנקול מן חפטׄך למא קאלה גׄירך. ואנא לא אטלב אלא דׄוקך ועקידתך. וקד קלת לי אנך מערץׄ ללבחתׄ פי הדׄא ואמתׄאלה, ואטׄן אן לא מחיד לך ען אלבחתׄ פי מסאלהׄ אלקדר ואלאכׄתיאר אדׄ הי מסאלה עמליה, פלתקל לי פיהא ראיך.

20קאל אלחבר, ליס ינכר טיבעהׄ אלממכן אלא מתעסף ממאר יקול מא לא יעתקד, לאנך תרי מן אסתעדאדה למא ירגוה ויכׄאפה מא ידלך עלי אנה יעתקד אן אלאמר ממכן, וינפע פיה אלאסתעדאד. ולא אעתקדה צׄרוריא לאסתסלם ולם יסתעד בסלאח לעדוה ולא בקות לגועה מתׄלא, פאן זעם אן דׄלך אלאסתעדאד צׄרורי איצׄא למן יסתעד, ותרך אלאסתעדאד צׄרורי למן לא יסתעד, פקד אקר באלאסבאב אלמתוסטה ואן בהא קואם אלמתאכׄרה וסיצאדף אלאראדה פי גמלהׄ אלאסבאב אלמתוסטה, ואן אנצף ולא יתעסף פסיקר באנה יגד נפסה מכׄלי בינה ובין אראדתה פי אלאמור אלממכנה לה, אן שא פעלהא ואן שא תרכהא, וליס פי הדׄא אלאעתקאד אכׄראג שי ען חכם אללה תעׄ, בל אלכל ראגע אליה עלי וגוה מכׄתלפה עלי מא אבין. אקול, אן גמיע אלמעלולאת מנסובה אלי אלעלה אלאולה עלי צׄרבין, אמא עלי אלקצד אלאול, ואמא עלי טריק אלתסלסל, מתׄאל אלצׄרב אלאול אלנטׄאם ואלתרתיב אלטׄאהר פי אלחיואן ואלנבאת ופי אפלאך אלדׄי לא ימכן אלעאקל אלמתאמל אן ינסבה אלי אתפאק, בל אלי קצד צאנע חכים יצׄע כל שי מוצׄעה ויעטיה חטׄה. ומתׄאל אלתׄאני אחראק הדׄה אלנאר מתׄלא להדׄה אלכׄשבה, לאן אלנאר גסם לטיף חאר פעאל, ואלכׄשבה גסם מתכׄלכׄל מנפעל, ומן שאן אללטיף אלפעאל אן יפעל פי מנפעלה, ואלחאר אליאבס אן יסכׄן ויפני רטובאת אלמנפעל חתי תתפרק אגזאוה, ואסבאב הדׄה אלאפעאל והדׄה אלאנפעאלאת אדׄא טלבתהא לם יעזב עליך אדראכהא, ורבמא וגדת אסבאב אסבאבהא חתי תנתהי אלי אלאפלאך, תׄם אלי עלל אלאפלאך, תׄם אלי אלעלה אלאולי. פבחק קאל אלקאיל אן אלכל מן קדר אללה תעׄ. ובחק קאל אכׄר באלאכׄתיאר ואלאתפאק מן גׄיר אן יכׄרג שייא מן דׄלך ען קדר אללה. ואן שית קרבת תצור דׄלך בהדׄה אלקסמה אלתאתׄיראת אמא אלאלאהיה ואמא טביעיה ואמא אתפאקיה ואמא אכׄתיאריה. פאלאלאהיה אן אלסבב אלאול נאפדׄה ולא בד לא סבב להא גׄיר משייהׄ אללה תעׄ. ואמא אלטביעיה פען אסבאב מתוסטה מהייה להא ומבלגׄתהא אכׄר כמאלהא מהמא לם יעק עאיק מן קבל אחד אלתׄלתׄה אקסאם. ואמא אלאתפאקיה פען אסבאב מתוסטה איצׄא, לכנהא באלערץׄ לא באלטבע ולא בנטׄאם ולא ען קצד ולא להא תהיו לכמאל מא תבלגׄה ותקף ענדה, ויסתתׄני פיהא בסאיר אלאקסאם אלתׄלתׄה. ואמא אלאכׄתיאריה פסבבהא אראדהׄ אלאנסאן פי חאל אכׄתיארה. ואלאכׄתיאר מן גמלהׄ אלאסבאב אלמתוסטה וללאכׄתיאר אסבאב תתסלסל אלי אלסבב אלאול תסלסלא גׄיר צׄרורי לכון אלאמכאן מוגודא. ואלנפס מכׄלאה בין אלראי ונקיצׄה תאתי איהמא שאת, פוגב אן תחמד או אן תדׄם עלי דׄלך אלאכׄתיאר מא לא יגב דׄלך פי סאיר אלאסבאב אלמתוסטה פאנה לא ילאם סבב אתפאקי ולא טביעי ועלי אן אלאמכאן חאצׄר פי בעצׄהא, כמא לא תלום אלטפל ואלנאים אדׄא אדׄאך וכאן פי אלאמכאן כׄלאף דׄלך, אלא אנך לא תלומה לארתפאע אלפכר ענה. אתרי אלדׄין ינכרון אלממכן ליס יגׄצׄבון עלי מן יודׄיהם קצדא, והל יסתסלמון אלי מן יסרק תׄיאבהם פיודׄיהם באלברד כמא יסתסלמון אלי אלריח אלשמאליה אדׄא הבת פי יום קר חתי תודׄיהם, אם יזעמון אן דׄלך אלגׄצׄב קוה כאדׄבה גׄרזת עבתׄא ליגׄצׄב אלאנסאן עלי שי דון שי אכׄר. וכדׄלך אן יחמד ויסתחסן ויחב ויבגׄץׄ וגׄיר דׄלך פליס ללאכׄתיאר מן חיתׄ הו אכׄתיאר סבב צׄרורי, לאנה ירגע דׄלך אלאכׄתיאר אצׄטרארא פיציר כלאם אלאנסאן צׄרוריא מתׄל נבצׄה ופי הדׄא אנכאר אלעיאן. מהמא כנת פי מלך אלעקל ולם תמלכך אעראץׄ אכׄר, ולו כאנת אלחואדתׄ מקצודה קצדא אוליא ען אלעלה אלאולי לכאנת מכׄלוקה לחינהא מע אללחטׄאת, ולגאז אן נקול פי אלעאלם באסרה פי כל חין אנה אלאן כׄלקה אלכׄאלק ולם יכן ללטאיע פצׄל עלי אלעאצי אדׄ כלאהמא טאיעאן פאעלאן מא אנהצׄא אליה וחמלא עליה אלי שנאעאת עטׄימה תלחק הדׄא אלאעתקאד, ואשדהא אנכאר אלעיאן כמא קלנא. ואמא אלשנאעה אללאחקה במן יקול באלאכׄתיאר לאכׄראגה בעץׄ אלאמור ען קדר אללה תעׄ פיחתג עליהא במא תקדם אנה ליס יכׄרגהא ען קדר אללה באלגמלה בל ירדהא אליה בטריק אלתסלסל, ותלחקה בעד דׄלך שנאעה אכׄרי והי אכׄראגה תלך אלאמור ען עלמה, לאן אלממכן אלמחץׄ מגהול בטבעה, וקד כׄאץׄ פי דׄלך אלמתכלמון, פכׄרג להם אן אלעלם בה באלערץׄ וליס אלעלם באלשי סבבא לכון דׄלך אלשי, פלא ינכר עלם אללה ללכאינאת והי מע דׄלך ממכנה אן תכון ולא תכון, אדׄ ליס אלעלם במא סיכון הו אלסבב פי כונה, כמא אן אלעלם במא כאן ליס סבבא לכונה בל דליל עליה, כאן אלעלם ללה, או ללמלאיכה או ללאנביא או ללכהנה. ולו כאן אלעלם סבבא ללכון לוגב חצול קום פיגן עדןלעלם אללה אנהם צאלחון מן גׄיר אן יטיעוא. ואכׄרון פי גהנם לעלמה אנהם עאצון מן גׄיר אן ידׄנבוא, ולוגב אן ישבע אלאנסאן מן גׄיר אן יאכל לעלם אללה אנה סישבע פי וקת כדׄא, פתסקט אלאסבאב אלמתוסטה, ולו סקטת לארתפע וגוד אלמכׄלוקאת אלמתוסטה, פקד סאגׄ קולוהאלהים נסה את אברהםלאכׄראג טאעתה מן אלקוה אלי אלפעל ליכון סבבא לסעאדתה, יקוליען אשר עשית את הדבר הזה וגו׳‎ כי ברך אברכנו וׄגו׳‎. ולמא כאנת אלחואדתׄ מצׄטרה הל הי אלאהיה אם גׄירהא מן אלאקסאם, וכאן פי אלאמכאן אן תכון כלהא אלאהיה אתׄר אלגמהור נסבהא אלי אללה, לאן דׄלך אותׄק ואקוי פי אלאימאן. לכן לממיז אן ימיז קומא מן קום, ושכׄצא מן שכׄץ, וזמאנא מן זמאן, ומכאנא מן מכאן, וקראין מן קראין אכׄר. פירי אן אלחואדתׄ אלאלאהיה אנמא טׄהרת עלי אלאכתׄר פי ארץׄ מכׄצוצה והי אלמקדסה, ופי קום מכׄצוצין והם בנו אסראיל, ופי דׄלך אלזמאן, ומע אלקראין אלתי אקתרנת בהא מן פראיץׄ וסנן, טׄהר באנתטׄאמהא אלמרגׄוב, וטׄהר באנכׄראמהא אלמכרוה. ולא תגׄני אלאמור אלטביעיה ואלאתפאקיה במגׄני פי וקת אלאנכׄראם, ולא תצׄר פי וקת אלאנתטׄאם, ולדׄלך צאר בנו אסראיל חגה פי כל מלה עלי אלזנאדקה אלדׄין ירון ראי אפיקורוס אליונאני פי זעמה אן גמיע אלאמור אנמא תקע באלאתפאק, אדׄ לא יטׄהר פיהא קצד קאצד, ושיעתה יסמון אצחאב אללדׄה, אדׄ ירון אן אללדׄה הי אלגׄאיה אלמטלובה, ואנהא אלכׄיר באטלאק. ומטלוב אלמתשרע מן אלשארע אן יכון מרצׄיא ענדה יפוץׄ אכׄתיאראתה אליה תעׄ, טאלבא אלהאמאת אן כאן וליא, או מעגזאת וכראמאת אן כאן נביא או גמאעה מרצׄיה, מע אלקראין אלמדׄכורה פי אלתורה מן אלאזמנה ואלאמכנה ואלאפעאל, פלא יבאלי באלאסבאב אלטביעיה ואלאתפאקיה כל אלמבאלאה, ויעלם אן שרהא מדפוע ענה, אמא באלהאם יסבק לה פי אלתוטיה לדׄלך אלשר, ואמא בכראמה תצנע לה פי חין דׄלך אלשר, ואמא כׄיר אלאסבאב אלאתפאקיה פליס ימתנע עלי אלפאסק פצׄלא ען אלכׄיר, וסעאדאת אלאשראר אנמא הי בתלך אלאסבאב אלאתפאקיה ואלטביעיה תׄם לא דאפע לנחסהא אדׄא חל. ואמא אלאכׄיאר פיסעדון בתלך אלאסבאב, תׄם יאמנון מן נחסהא. וקד כדת אן אכׄרג ען גׄרצׄי, פלארגע אליה. ואקול, אן דוד עׄהׄ קד אתי בתׄלאתׄה אקסאם פי אסבאב אלמות, בקולהכי אםׄ ה׳‎ יגפנו, והו אלסבב אלאלאהי.או יומו יבא ומתוהו אלסבב אלטביעי.או במלחמה ירד ונספהוהו אלסבב אלאתפאקי באלערץׄ. ותרך אלקסם אלראבע אעני אלאכׄתיארי, לאנה לא יכׄתאר דׄו עקל אלמות, ואן כאן שאול קד קתל נפסה פליס לאכׄתיארה אלמות, לכן למנאפרתה עדׄאב אלעדו לה ועבתׄה בה. ומתׄאל הדׄה אלאקסאם פי אלנטק לאן נטק אלאנביא פי חין מלאבסהׄרוח הקדשלהם פי גמיע כלאמהם מקצוד מן אלאמר אלאלאהי וליס אלי אלנבי תגׄייר כלמה מן כלמאתה. ואלנטק אלטביעי הי אלאשאראת ואלאימאאת אלמשאכלה ללמעאני אלתי יראד אלתעביר ענהא, ותבעתׄ עליהא אלנפס דון אצטלאח מתקדם. ואמא אללגׄאת אלמצטלח עליהא, פמרכבה מן אלאמר אלטביעי ואלאכׄתיארי. ואמא אלנטק אלאתפאקי פהו נטק אלמגאנין חין גנוהם לא ינתטׄם מנה מעני ולא ינתהי אלי גׄרץׄ מקצוד. ואלנטק אלאכׄתיארי הו כלאם אלנבי פי גׄיר וקת אלנבוה, או כלאם אלעאקל אלמפכר יולף כׄטבה, יכׄתאר כלאמה בחסב מא יראה לאיק מקצודה, ולו שא לבדל כל כלמה מנהא בגׄירהא, בל לו שא לתרך מעני ואכׄדׄ גׄירה. וקד תנסב גמיע הדׄה אלאקסאם אלי אללה תעׄ בטריק אלתסלסל, לא באנהא ען קצד אול מנה, ואלא פכלאם אלטפל וכלאם אלמוסוסין וכׄטבהׄ אלכׄטיב ושער אלשאער כלאם אללה — תעאלי ען דׄלך. ואמא אחתגאג אלעאגז עלי אלחאזם בקולה אנה קד סבק פי עלם אללה מא סיכון, פליס בחגה, לאנה במנזלהׄ קולה לו קאל אן אלדׄי סיכון לא בד לה אן יכון, יקאל לה נעם, ולכן ליס תמנע הדׄה אלחגה מן אלאכׄדׄ באלראי אלאפצׄל פתסתעד באלסלאח לעדוך, ואלקות לגועך, אדׄא צח ענדך אן סלאמתך או הלאכך אנמא יתם באלאסבאב אלמתוסטה, ומן גמלתהא בל אכתׄרהא אכׄדׄך באלחזם ואלעזם או באלעגז ואלתואני, ולא תחתג במא יגרי עלי אלאקל ופי אלנאדר ובטריק אלאתפאק ואלערץׄ מן הלאך אלחאזם וסלאמהׄ אלמנהמל אלגׄאפל, לאן אסם אלאמן מעני מחצל גׄיר מעני אסם אלגׄרר, וליס יפר אלעאקל אלי מוצׄע גׄרר מן מוצׄע אמן, כמא יפר מן מוצׄע גׄרר אלי מוצׄע אמן. ומא גרי פי מוצׄע אלגׄרר מן סלאמה יקאל אנה נאדר. ומא יגרי פי מוצׄע אלאמן מן הלאך יקאל אנה אמר כׄראג ען אלטבע. פאלאכׄדׄ באלחזם ואגב, ומן אסבאב אלחזם ראיי הדׄא למן אעתקדה, ומן אסבאב אלאנהמאל אלראי אלמנאקץׄ להדׄא אלראי. ואלכל ראגע באלתסלסל אלי אללה תעׄ. ואמא אלדׄי יכון בקצׄא מגרד ודׄלך פי אלכראמאת ואלמעגזאת פהו יגׄני ען אלאסבאב אלמתוסטה ורבמא אלגא אליהא, כעצמהׄ משה עׄהׄ מן אלגוע טול ארבעין יומא דון אסתעדאד בקות. והלאך קום סנחריב דון סבב באד בל באסבאב אלאהיה ליסת ענדנא אסבאבא לגהלנא בהא. ופי תלך יקאל אנה אן כאן אלקצׄא חקא פאלגהד מחאל לאנה לא ינפע פיהא אלאסתעדאד, ודׄלך פי אלאסתעדאדאת אלמחסוסה, ואמא אלאסתעדאדאת אלנפסאניה והי אסראר אלשריעה למן עלמהא ואחכמהא, פהי נאפעה גאלבה ללכׄיר ודאפעה ללשר. פאדׄא אכׄדׄ אלאנסאן באלחזם פי אלאסבאב אלמתוסטה בעד אלתפויץׄ פימא כׄפי ענה אלי אללה באלניה אלכׄאלצה אצאב ולם יכׄב. ואמא אלתגׄריר אלצחיח אתכאלא ענד אמרה באלטאעה למן סבק פי עלמה אנה סיעציה או סיטיעה, פליס בעבתׄ לאנא קד קדמנא ובינא אן אלעציאן או אלטאעה אנמא יתם באלאסבאב אלמתוסטה, פכאן סבב טאעהׄ אלטאיע אלאמר באלטאעה. והכדׄא סבק פי עלמה עציאן אלעאצי באלאסבאב אלמתוסטה אמא בצחבהׄ אשראר או בגׄלבהׄ מזאג סו או מיל אלי דעה וראחה, וכאן פי ועטׄה תכׄפיף פי עציאנה, פאן מן אלמשהור אן ללועטׄ תאתׄירא פי אלנפס עלי כל חאל, ואן אלעאצי תנפעל נפסה בסמאע אלועטׄ ואן אקל אנפעאל, לא סימא אדׄא כאן אלועטׄ לגמהור, פאן פיהם עלי כל חאל קאבלא, פקד נפע פליס בעבתׄ. אול אלמקדמאתאלתי בהא קואם הדׄא אלראי, אלאקראר באלסבב אלאול, ואנה צאנע חכים, ליס פי אפעאלה עבתׄ, בל גמיעהא בחכמה ונטׄאם לא ישובהא אכׄתלאל, וקד תקרר הדׄא פי אלנפוס מן אסתקרא גל אלכׄלקה ומא תאצל מנהא פי נפס אלמתאמל חתי חצל לה אלאימאן באן לא כׄלל פי אפעאלה, ואן טׄהר אליה פי אלאקל כׄלל לם יכׄתל אימאנה בדׄלך, בל נסבה אלי גהל נפסה וקלהׄ תחצילה. ואלמקדמה אלתׄאניה,אלאקראר באסבאב מתוסטה, לכן ליסת פאעלה בל אסבאב עלי טריק אלמאדה או עלי טריק אלאלאת, פאן אלמני ואלדם מאדה ללאנסאן, ואעצׄא אלתנאסל תולך בינהמא, ואלארואח ואלקוי אלאת תתצרף באראדה אללה, פיתם שכלה ותכׄטיטה ונמוה ואגׄתדׄאוה, חתי פי אלשי אלמכׄתרע קד יחתאג פיה אלי אלסבב אלמתוסט, כאלתראב אלדׄי כאן מאדהׄ אדם, פלא גׄני ען אלאקראר באלאסבאב אלמתוסטה. אלמקדמה אלתׄאלתׄה,אן אללה יעטי כל מאדה אחסן מא ימכנהא קבולה מן אלצור ואחכמהא, ואנה תעׄ גואד לא ימנע לטפה וחכמתה ותדבירה ען שי, ואן חכמתה פי אלברגׄותׄ ואלבאעוץׄ מתׄלא ליסת מקצרה ען חכמתה פי נטׄאם אלאפלאך, לכן אכׄתלאף אלאשיא מן קבל מואדהא, פליס לך אן תקול לם לם יכׄלקני מלכא, כמא ליס ללדודה אן תקול לם לם יכׄלקני אנסאנא. ואלמקדמה אלראבעה,אלאקראר באן ללוגוד רתבא עאליה ודונא. ואן מא לה אדראך ושעור וחס אעלי ממא ליס לה דׄלך לקרבה מן רתבהׄ אלסבב אלאול אלדׄי הו עקל בדׄאתה. ואן אכׄס אלנבאת אעלי רתבה מן אשרף מעדן. ואכׄס בהימה אעלי רתבה מן אשרף אלנבאת. ואכׄס אנסאן אעלי רתבה מן אשרף בהימה. וכדׄלך אכׄס מתשרע בשריעה אללה תעׄ אעלי רתבה מן אשרף גאהלי. לאן אלשריעה אלתי הי מן ענד אללה תכסב אלנפוס סיר אלמלאיכה והיאתהם. ודׄלך מא לא ידרך באלאכתסאב. ואלדליל עלי דׄלך אן אלמדאומה עלי אעמאל תלך אלשריעה תנהץׄ אלי דרגהׄ אלוחי אלתי הי אקרב אלרתב אלאנסאניה אלי אלאלאהיה. פאלמתשרע אלעאצי כׄיר מן גאהלי, לאנה קד אכסבתה שריעהׄ אללה סירה מלכותיה אשרף בהא עלי רתבה אלמלאיכה. ואן כאן עציאנה קד שושהא עליה ואפסדהא, פאנה קד בקי לה מנהא אתׄאר, ובקי פי נאר אלתשוק אליהא, לכנה מע דׄלך לו כׄיר לם יכׄתר אן יציר פי רתבהׄ אלגאהליה. כמא אן אלאנסאן אדׄא מרץׄ ותעדׄב באלאמה לו כׄיר אן יציר פרסא או חותא או טאירא מתנעמא בגׄיר אלם, ויפרק בינה ובין אלעקל אלדׄי יקרבה מן רתבה אלאלאה למא אכׄתאר דׄלך. ואלמקדמה אלכׄאמסה,אן נפוס אלסאמעין תתאתׄר לעטׄהׄ אלועאטׄ אדׄא ועטׄ באמור מקבולה, פללועטׄ באלחק מנפעה עלי כל חאל, ואן לם ירד אלעאצי מן פעל אלשר, ינקדח פי נפסה מן דׄלך אלועטׄ שרארה ירי אן דׄלך אלפעל שר. והדׄא גז מן אלתובה ומבדא להא. אלמקדמה אלסאדסה,אן אלאנסאן יגד מן נפסה קדרה עלי פעל אלשר ותרכה פי אלאמור אלממכנה לה, ומא תעדׄר עליה אנמא תעדׄר עליה לעדם אלאסבאב אלמתוסטה, או לגהל אלאנסאן בהא. מתׄאל דׄלך פקיר גׄריב עדים אלסיאסה ירום אלתרוס עלי טאיפה, פיעתדׄר עליה, ולו חצׄרת אלאסבאב ויכון הו עאלם בתנאולהא, לתם מרגׄובה כמא יתם מרגׄובה פימא אסבאבה חאצׄרה וידריהא וידירהא, ממא יראס פי מנזלה עלי בניה וכׄדמה, ואכתׄר מן דׄלך אעצׄאה יחרכהא כיף שא ויתכלם במא שא. ואכתׄר מן דׄלך פכרה ותכׄילה יתכׄיל אלבעיד ואלקריב מתי שא וכיף שא לאנה ימלך אסבאבה אלמתוסטה, ולדׄלך לא יתפק אן יגׄלב אלצׄעיף אלקוי פי אלשטרנג, פליס יקאל פי חרב אלשטרנג סעאדה וחרמאן כמא יקאל פי חרב רייסין מתחארבין, לאן אסבאב חרב אלשטרנג חאצׄרה באסרהא פיגׄלב אלעאלם בתנאולהא אבדא, וליס יכׄאף סבבא טביעיא יסתתׄני בה, ולא סבבא אתפאקיא, אלא נאדרא מן קבל גׄפלה, ואלגׄפלה דאכׄלה פי אלגהל כמא קלנא. ומע הדׄא פאם ללסבב אלאול ינסב גמיע באלטריק אלמדׄכורה, ואמא עלי אלקצד אלאול פפי חואדתׄ בני אסראיל טול בקא אלשכינהspanבינהם. ואמא בעד דׄלך פאלאמר משכוך אלא פי קלוב אלמומנין הל הדׄה אלחואדתׄ קצד אול מן אללה תעׄ אם הי מן אסבאב פלכיה או אתפאקיה ולא חגה קאטעה. לכן אלאולי אן ינסב אלגמיע אליה תעׄ לא סימא מע עטׄם, כאלמות ואלהזאים ואלסעאדה ואלחרמאן ומא אשבה הדׄא.

21קאל אלחבר, הדׄא ואמתׄאלה ממא יחסן אלבחתׄ ענה וען כיפיהׄ אחכאם אללה פי עבאדה, ותעליקהא במא עלקהא אלנבי מן פוקד עון אבות על בנים לשונאיו ועושה חסד לאלפים לאוהביו ולשומרי מצותיו. ותנטׄיר דׄנב דׄנב אלי עקובה ממא גא פי אלמקרא ופי אתׄאר אלחכמים, ומא ירד מן דׄלך באלתשובה ומא לא ירד. ושרוט אלתשובה מא יאתי מן אלאמתחאן עלי סביל אלמחנה ואלתגרבה, ועלי סביל אלאקתצאץ מן דׄנב מתקדם. ועלי סביל אלתעויץׄ פי אלדניא, ועלי סביל אלתעויץׄ פי אלאכׄרה, או לדׄנוב אלאבא ומא יאתי מן נעמה לחסנה מתקדמה. או מן אגל זכות אבות, או לאמתחאן ולתגרבה. ואמתזאג הדׄה אלוגוה וגׄירהא ממא יגׄמץׄ וצׄוחה ויושך אן ינכשף ענד אלבחתׄ. ואכתׄר אלאסבאב פי צדיק ורע לו רשע וטוב לו. ומא לם ינכשף יסלם פיה אלי עלם אללה תעׄ ועדלה. ויקר אלאנסאן בגהלה פי הדׄה אלאסבאב אלגליה פצׄלא ען אלכׄפיה. ואדׄא וצל במנאטׄרתה אלי אלדׄאת אלאולי ומא יגב להא מן אלצפאת תברא ענהא וראי אן דונהא חגאב נור יבהר אלאבצאר פיעתדׄר עלינא אדראכהא לקצור אבצארנא פיעתדׄר עלינא אדראכהא לקצור אבצארנא ובצאירנא, לא לכׄפאיה ולא לנקצאנה, פאנה אבהר ואשהר ואטׄהר ענד דׄוי אלאבצאר אלנבויה מן אן יחתאג פיהא אלי אסתדלאל וגׄאיתנא מן מיז חקיקתה אן נמיז פי אלטביעיאת מא לם יכן פיה סבב שי מן אלטבאיע פננסבה אלי קוה גׄיר גסמאניה בל אלאהיה כמא יקול גאלינוס פי אלקוה אלמצורה ויפצׄלהא עלי סאיר אלקוי וירי אנהא ליסת מן קבל אלמזאג בל לאמר אלאהי. ופי אלמעגזאת אן נרי קלב אלאעיאן וכׄרק אלעאדאת ואכׄתראע מוגודאת לם תכן דון חילה מתקדמה. ודׄלך אלפרק בין מא עמל עלי יד משה עׄהׄ ובין עמל אלחרטומים בלטיהם אלתי לו פתש עליהם לוגדת אלחילה כמא קאל ירמיהו הבל המה מעשה תעתועים בעת פקדתם יאבדו, יעני אן תפקדתהא ופתשת עליהא תלאשת כאלשי אלמדלס. ואלאמר אלאלאהי כל מא פתשת עליה וגדתה כאלדׄהב אלאבריז. פאדׄא וצלנא הדׄה אלרתבה קלנא אן הנאך לא מחאלה אמרא ליס בגסמאני ידבר גמיע אלגסמאניאת תעגז אדׄהאננא ען אלבחתׄ ענה, פלנעתבר פי אפעאלה ונתוקף ען וצף דׄאתה, פאנה לו אדרכנא חקיקתה לכאן דׄלך נקצא פיה. פלא נבאלי בקול אלפלאספה אלדׄין יקסמון אלעאלם אלאלאהי אלי רתב. פכלהא ענדנא רתבה אלאהיה מנדׄ ננפצל מן אלתגסים פליס אלא אלאה מדבר ללאגסאם. ואלדׄי דעא אלפלאספה אלי תכתׄיר אלאלאהאת אעתבארהם חרכאת אלאפלאך חצלוהא ווצלוהא לאכתׄר מן ארבעין וראוא אן לכל חרכה מנהא סבבא גׄיר סבב אלאכׄרי ואכׄרג להם אלנטׄר אן תלך אלחרכאת אראדיה לא קסריה ולא טביעיה. פוגב אן תכון כל חרכה ען נפס ולכל נפס עקל. ודׄלך אלעקל הו מלך מפארק ללמאדה. פסמוא תלך אלעקול אללה ומלאיכה ועללא תׄואני וגׄיר דׄלך מן אלאסמא, ואכׄר רתבהא ואקרבהא אלינא אלעקל אלפעאל. זעמוא אנה מדבר הדׄא אלעאלם אלאדני. תׄם אלעקל אלהיולאני. תׄם אלנפס. תׄם אלטביעיה. תׄם אלקוי אלטביעיה ואלחיואניה. וקוהׄ עצׄו עצׄו. והדׄא כלה תדקיק יפיד אלתחדׄיק לא אלתחקיק, ואלמנכׄדע לה עלי כל חאל זנדיק, פדע אסתשהאד אלקראיין בוצייה דוד עׄהׄ לולדה ועתה שלמה בני דע את אלהי אביך ועבדהו. ואסתדלאלהם מן דׄלך עלי אנה יחתאג אלי מערפה אללה חק אלמערפה וחינידׄ תגב עבאדתה. בל אנמא חתׄ עלי תקליד ואלדה ואגדאדה פי אעתקאד אלהי אברהם ואלהי יצחק ואלהי יעקב אלדׄי צחבתהם ענאיתה ואנגז להם מואעדה פי כתׄרהׄ אלנסל ווראתׄהׄ אלשאם וחלול אלסכינה וגׄיר דׄלך, ומתׄל קולה אלהים אשר לא ידעום, ואשר לא ידעתם, לם ירד בדׄלך אלמערפה בחקיקתהא, בל אלתי לם תרוא מנהא לא כׄירא ולא שרא, פלא תרגונהא ולא תכׄאפונהא.

22תׄם אנה כאן מן אמר הדׄא אלחבר אנה עזם עלי אלכׄרוג מן בלאד אלכׄזר קאצדא ירושלם תׄוׄ פעז עלי אלכׄזרי פראקה פכׄאטבה עלי דׄלך קאילא מא אלדׄי יטלב אליום פי אלשאם ואלסכינה מעדומה מנהא, ואלתקרב אלי אללה מדרך פי כל מכאן באלניה אלכׄאלצה ואלתשוק אלשדיד, ולמא תתכלף אלגׄרר פי אלבר ואלבחר ואלאמם אלמכׄתלפה.

23פקאל אלחבר, אמא אלסכינה אלטׄאהרה עיאנא פהי אלתי עדמת, אדׄ לא תתגלי אלא לנבי או לגמהור מרצׄי פי אלמוצׄע אלכׄאץ והו אלמנתטׄר מן קולה כי עין בעין יראו בשובׄ ה׳‎ ציון, וקולנא פי צלאתנא ותחזינה עינינו בשובך לנוך לציון. ואמא אלסכינה אלכׄפיה אלרוחאניה פהי מע אסראילי צריח, זכי אלאעמאל, טאהר אלקלב, כׄאלץ אלניה לרב אסראיל, וארץׄ אלשאם כׄאצה ברב אסראיל ואלאעמאל לא תתם אלא בהא. וכתׄיר מן שראיע אלאסראיליה תסקט ען מן לא יסכן אלשאם. ואלניה לא תכׄלץ ואלקלב לא יטהר אלא פי אלמואצׄע אלתי יעתקדהא כׄאצה ללה. ולו כאן דׄלך תכׄיילא ותמתׄילא פכיף ודׄלך חקיקה כמא תקדם ביאנה, פיהיג אלשוק נחוהא ותכׄלץ אלניה פיהא, לא סימא למן קצדהא מן בעד, לא סימא למן סלפת לה דׄנוב וירום אלאסתגפאר, ולא סביל אלי אלקרבנות אלתי כאנת משרועה מן אללה לדׄנב דׄנב מן זדון ושגגה, פיאנס אלי קול אלחכמים גלות מכפרת עון. לא סימא אן כאן אלאגׄתראב אלי מוצׄע רצׄא. ואמא אלתגׄריר פי בר ופי בחר פליס בתגׄריר דאכׄל פי לא תנסו אתׄ ה׳‎, בל תגׄריר כמא יגׄרר מתׄלה לו כאנת לה סלעה ירגו אן ירבח פיהא ולו גׄרר אכתׄר מן הדׄא בגנב שוקה ורגא אלגׄפראן לכאן מעדׄורא פי תערצׄה ללמהאלך, בעד אן חאסב נפסה ושכר עלי מא מצׄי מן עמרה וקנע בה, וחבס בקיהׄ איאמה עלי רצׄא רבה. חמד ושכר, ואן אהלכה בדׄנובה רצׄי וצבר, ותחקק אנה אסתגׄפר במותתה אכתׄר דׄנובה. וראיי ארגח ראיא מן אלדׄין יגׄררון באנפסהם פי אלחרוב לידׄכרוא באלשגאעה ואלסבק או ליאכׄדׄוא אגרה כבירה, ואנה אכׄף תגׄרירא מן אלדׄין יצאדרון אלחרב ללאגר פי אלגהאד.

24קאל אלכׄזרי, קד כנת אראך תחב אלחריה, ואראך אלאן תסתזיד עבודיה מן לואזם תלזמך אדׄא סכנת אלשאם מן שראיע ליסת לאזמה לך ההנא.

25קאל אלחבר, אנמא אטלב אלחריה מן עבודיהׄ אלכתׄירין אלדׄין אטלב רצׄאהם ולא אדרכה, ולו גהדת מדי עמרי מפיה, ולו אדרכתה לם ינפעני, אעני עבודיהׄ אלנאס וטלב רצׄאהם. ואטלב עבודיהׄ ואחד ידרך רצׄאה באיסר מונה, והו נאפע פי אלדניא ואלאכׄרה, ודׄלך רצׄא אללה תעׄ, פעבודיתה הי אלחריה, ואלתדׄלל לה הו אלעז אלחקיקי.

26קאל אלכׄזרי, אדׄא אעתקדת כל מא דׄכרתה פקד עלם אללה תעׄ ניתך, ואלניה כׄאליה מע אללה עאלם אלניאת וכאשף אלכׄפיאת.

27קאל אלחבר, הדׄא חק אדׄא תעדׄר אלעמל. ואמא אלאנסאן מכׄלי בינה ובין אמלה ועמלה. פאלאנסאן מלום אדׄ לא יגלב אלאגר אלטׄאהר. ולדׄלך קיל והרעותם בחצוצרות ונזכרתם לפניׄ ה׳‎ אלהיכם והיו לכם לזכרון, וזכרון תרועה, ליס אן אללה מחתאג אלי אלתדׄכיר ואלתנביה, לכן לאן אלאעמאל מחתאגה אלי כמאל וחינידׄ תסתחק אלמגאזאה כמא תחתאג מעאני אלצלאה אלי אלנטק בהא עלי אכמל מא יכון מן אלתחנן ואלצׄראעה מתי ופית אלניה ואלעמל עלי מא יגב כאנת אלמגאזאה עליהא, פיציר דׄלך עלי מעהוד אלנאס כאנה תדׄכיר ודברה תורה כלשון בני אדם. ואן כאן אלעמל דון אלניה או אלניה דון אלעמל כׄאב אלסעי, אללהם אלא פימא לם ימכן. פאחצׄאר אלניה ואלאעתדׄאר ען אלעמל נאפע בעץׄ מנפעה, מתׄל אעתדׄארנא פי צלאתנא ומפני חטאינו גלינו מארצנו, ומא אשבה דׄלך. ופי תנביה אלנאס ותחריכהם אלי מחבהׄ דׄלך אלמוצׄע אלמקדס אגר ותאכיד ללאמר אלמנתטׄר כקולה אתה תקום תרחם ציון כי עת לחננה כי בא מועד, כי רצו עבדיך את אבניה ואת עפרה יחוננו, יעני אן ירושלם אנמא תבני אדׄא תשוק ישראל אליהא גׄאיהׄ אלשוק חתי יחנוא עלי חגארתהא ותראבהא.

28קאל אלכׄזרי, אן כאן הכדׄא פמנעך אתׄם, ומעונתך חסנה, אעאנך אללה וכאן לך נאצרא ווליא וענך רצׄיא במנה ושלום. תם אלכתאב בעון אללה תעׄ וחסן עונה ולואהב אלעון חמדא בלא נהאיה.